Takatwasane Izipiti 32
32
Kingi ka lwange
(Tapelane Drekase 9.6-29)
1Ku mapapangale ki swa Iseraylri sadrele ki Musi ka taikaiyane lregelrege kai kaingananganai mulebe, makitwa kela mucucubungu ki Arungu isarubu, si iya kai iniane, “Kai nai wathingale kwidra wasangiluku naiane katwase Izipiti ka Musi luka kiapadradresenge ki manemane; lakamani kwidra ala pasikaiya naiane tutwaumase lani kela sangiluku naiane!”
2Ku Arungu la iya kai liniane, “Mwalra kwini lakingi ka lridingi ki labaibai numi si lalalake numi, la malra si baai nakwane.” 3Kwini lamapapangale la makitu mwalra kwini lakingi ka lridingi lini, satedre pucucubungu ki Arungu. 4Ku Arungu la malra kwini lalridingi drunguru, si gugu pwa ki tangidaredarepane, la darepe ku vaeva ku kingi ka lwange.
Ku mapapangale la iya kai, “Swa Iseraylri, kikai ala amani ku wasangiluku numiane katwase Izipiti ka twaumase!”
5Ku Arungu la picucubungu ki nitutwaumasane ka kingi ka lwange darepe ku vaeva ku tapatarumaramarane, la pelaela iya kai, “Lwiya pasikaiya ki Tamatama pasusu ki lrisi.” 6Saka makapusale ki mialrealre, ku mapapangale la mailuku ku lanilapulapwane, yakai ku twa Lama ka lrisi ka nilapulapwane, yakai ku twa Sulivatane ka lrisi si kane. Kwini lalasu wanene si pasilribate kanekane ungungulu, la pakilringau ku takapeapeaperavane.
7Ku Tamatama la iya kai ki Musi, “Lu kirimwa mulebe, asi lwiyane kikavai patwalaisu Izipiti sangiluku ka mapapangale pasalrisalriwnga, kalrasenga nakwane. 8Ka lalasu kiadailinga kwidra drekaseli liniane ku angukakaiyane ku kadalranane. Ka lalasu arakai ka kingi darepe tuvaeva ka lwange; la sukusukubu iniane, papia iniane patarumara. Ka lalasu la iya kai, kikai lwange amani ku wasangiluku liniane katwase ka Izipiti ka twaumase.”
9Ku Tamatama la iyanga kai ki Musi, “Wathingalaku kikai mapapangale ka makeelrathe turamuru. 10Kaiasasane, kusu madha teletelenge nakwane; lri kaelaelaku liniane, si amudu liniane. Kunaku lri tumaadravaku ka zuku muswane si lamwabaibalrithi muswane.”
11Ai ku Musi papia ki Tamatama ka Twaumaseini kitubi iya kai, “Tamatama! Asu kirimu pangimia kai kaelaela ki kawkawlusu? Kavai lalasu kaika arakaisu ku madradrau ka puku patwalai Izipiti palribulu? 12Asu pakawriva ki swa Izipiti iya kai, waranau sangiluku liniane pakatwase Izipiti, pakai ku apikaiyane lregelrege malra amudu liniane? Kiatubiaku muswane isadranga ku sakaelaelanesu, si siwlriwlri ku kidremedremesu, madha papiapia ki kawkawlusu pulebe ku maadrau ku amatikurwane. 13Kiatubiaku muswane ala ngulringava ki sasiakawlusu ka Aberahame, Isake, Yakubu, ngulringau ku tapapianesu liniane pudriadringai kiketekete, kalri paedhalesu ku lamwabaibalrithi liniane, mia ki latariau subelebelenge ku kalrane, si puvaga kulri pakaelresu kikai kadaengane patarumara ki lamwabaibalrithi liniane, ka palralrawthu ka tacekecekelane lini.” 14Ku Tamatama ala pela ku kidremedremeini, kai pulebenga ku amatikurwane makakai ki kawkawluini.
15Ku Musi la ngibangulu si siwlri mulebe, malra kwidra drusa ka nipacasane ku padradrekase ka alibi ka lrenege. 16Ku Twaumase ngiakakamani pia kikai drusa ka alibi ka lrenege, si malra kwini padradrekase pacase pibelenge.
17Ku Yesua kialalra ku makakaralealaele ku lingau ki mapapangale, la iya kai ki Musi, “Kialalraku ikai ki tasuladhane ku lingau ki makakaruburuburu!”
18Ku Musi la kawriva, “Kikai kai ngiamia kudra putariri ki akaci ku takikaruburane, la kai ngimia kudra takaralealane ki amaki ku takikaruburane, kikai yai wasenasenai ka lingau!”
19Ku Musi samwa arwa deethe ki tasuladhane, la drele ku samiamiange ka lwange si wadralradralai ka laumawmase, la kai beserenga la kalisi turamuru, la ikai kwini ki tali lrawdru ki lregelrege malra kwini ilukuini ka drusa ka alibi ka lrenege pwa cagecage picakena, si pakacacwake. 20La malra kwini darepe lini kwini lwange, drunguru si pangiderenau, la silribu pakalamenge, si sabulu pwa ki aciacilai, ungula la iya ki swa Iseraylri. 21La iya kai ki Arungu, “Kikai laumawmase watumane muswane, asu pia kai papasalriu liniane kikai mateelrege turamuru ka pasalrivane?”
22Ku Arungu la tubalre, “Madha kalisilisi nakwane, wathingalesu kikai laumawmase makecenge ku apasalrivane. 23Kwi lalasu amia kai nakwane, ‘Kai nai wathingale kwidra wasangiluku naiane katwase Izipiti ka Musi luka kiapadradresenge ki manemane; lakamani pasikaiya naiane darepe ku twaumase ani sangiluku naiane.’ 24Lu malra ku lakingi numi si baai nakwane la iyaku liniane; kwidra la piakai ku kingi la makitu mwa malra nguelre ku liniane, si baai nakwane. La malraku kwini lakingi cilri pwa ki apwi; kikai lwange la kirimu mutaluvaivai!”
25Ku Musi la drele ki Arungu ka kai maka waruthukunga ki mapapangale, kwini lalasu la makitu ngilralrainginga ku nau pia iya lini, la kitu sawlralrakadhanenga ki labadha. 26La acegecege icucubungu ki lrawlrawdru ki tasuladhane, si akwadrau kawriva, “Sanaka swakai ki Tamatama bwala mwaili kai!” Ku swa Lrivi ka umawmase makanaelre la makitu isarubu mwa iniane. 27La cunu liniane, “Ku Tamatama ka Twaumase ki swa Iseraylri wadrekase numiane ka tangeea makitu silrabwa, twaladha kai ki lrawlrawdru si mwa kavai ki lrawlrawdru, salraelrea ki tasuladhane, papacai ki betakane numi, ki talragi numi si pasiagiagisi numi.” 28Ku swa Lrivi la pasalaladha ku takipadrekadrekasane, kwini kivaivai ku papacai lini ikaai kau ta 3,000 ka umawmase. 29Ku Musi la kawriva ki swa Lrivi, “Kaikameane, ngiapapatarumara numi#32.29 “Kaikameane, ngiapapatarumara numi” patwalai ki sidrumane ka nihunyakane ka lahungu, ku pacase ki Hiburu yai “Kunumi kaikameane ngipapatarumara” ku “kunumi kaikameane kiapatukudhanga numi ka mabulanga” amia., pangimia ku awngane ki barakalai marasikai ki Twaumase, papacainga ki lalake si betakane numi, lakamani kwidra kunumi kiasubulrubulru numi ki Tamatama.”
30Sakakaiyane, ku Musi la kawriva ki mapapangale, “Pasalriwnga numi kai mateelrege turamuru kai pasalrivane. Kikai lri nguselaku mulregelrege, mwa ki Tamatama kavai, alau lri dulruaini madu pasikai numiane kitubi ki Tamatama anipacepe numiane.” 31Ku Musi la mwa ki Tamatama kavai, la iya kai, “Asiamia! Kikai mapapangale pasalriunga ku maadrau ka pasalrivane; kwini lalasu wadarepe ka kingi ka samiamiange si sukusukubu. 32Kiatubiaku muswane pacepa kavai pasalrivane lini; lu kai mia kwini, kiatubiaku muswane patwaladha ki lanagane ka pacase ki kawkawlusu mwalra supilri ku naganeli.”
33Ku Tamatama la tubalre, “Kwini apatwaladhane ki lanagane ka pacaseli mwalra yai amani kikavai lanagane ki pasalriu nakwane. 34Kikai kusu lu mwa, la mailuku ki mapapangale mwa kwini pelaelali muswane ka kadaengane. Lri sikawlaku ki sasiakawlu sacucubungu sangiluku muswane. Ai kwidra vai lri darurunga, lri pathavungaku sanaka pasalriu lini.”
35Ku Tamatama la pikai ki mapapangale pulebe ku swalrubu, amani sa vutha ki Arungu darepe ku kingi ka samiamiange ka lwange.
Currently Selected:
Takatwasane Izipiti 32: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
