Takatwasane Izipiti 33
33
Ku Tamatama wadrekase ki swa Iseraylri katwase lregelrege Hurebe
1Ku Tamatama kawariva ki Musi, “Kusu si kikai ilukusu ka mapapangale patwalai Izipiti lri katwasenga kikai ki taikaiyane kai ki kadaengane, mwa kwidra puvagangali lri baadhaku iya ki Aberahame, Isake, Yakubu si lamwabaibalrithi liniane ka kadaengane. 2Lri sikawlaku ki sasiakawlu sangiluku muswane; lri pakatwasaku ki swa Kanange, swa Amuri, swa Hite, swa Perizi, swa Hivi si swa Yebuse ka laumawmase. 3Kwini lrika amwanesu ka kadaengane mwalwalwaludru ku mireke si valu ka mathariri ka kadaengane. Ai, kainaku lri tupalra numiane; amani sa kakelrathe numi, amani lu ikaiyaku kadadalranane si amudu numiane.”
4Sa kilalranga ku mapapangale kikai vaga makitwa tubi, si kai kirimunga sisangiragelanane. 5Ku Tamatama wacunu ki Musi pelaela liniane, “Amani numi kudra makelrathe turamuru; lwiyasi la tupapalraku numiane, adravane ka edrekane ka vai, alau lri malraku numiane papacai demedeme. Kaiasasane mwalranga numi kwini sangiragelanane numi, lri kidremedremaku ku apangimiane pathavungu.” 6Lakamani kikai, sakatwasenga lregelrege Hurebe ku swa Iseraylri, kai wailukunga ku sangiragelanane lini.
Alrivilrivi ka balrawbau ki Tamatama
7Sana kingivale tutasulasuladhane ku swa Iseraylri, ku Musi wapaipai ku balrawbau pakidaaili ki tapikaiyane ki tasuladhane lini, si pasudalepe ka amani ku Alrivilrivi ka balrawbau ki Tamatama; sanaka yakai ku akitubianeini ki Tamatama lri dulru mwa kavai. 8Lu mwa ki Alrivilrivi ka balrawbau ku Musi, ku mapapangale makitwa acegecege ikai lrawlrawdru ki balrawbau lini, si papia ki Musi drele, pakela ku tamudaananenga ki Alrivilrivi ka balrawbau. 9Sana mudaanenga ku Musi, ku ulrudru ka ememe la mulebe, isadra ikai ki lrawlrawdru ki Alrivilrivi ka balrawbau; ku Tamatama la twalai ki ememe kawriva ki Musi. 10Ku mapapangale sana drele kwini ulrudru ka ememe lu isadra ikai ki lrawlrawdru ki Alrivilrivi ka balrawbau, la makitu ikai cucubungu ki balrawbau lini guruthungane sukubu. 11Ku Tamatama si Musi sana maicubungu makakawriva mia ki matatalragi ka makakawrivariva. Sa siwlringa mwa ki tasuladhane ku Musi, kudra yacengecenge ka taraparalubu iniane ka lalake ki Nunge ka Yesua la asusuru ikai ki Alrivilrivi ka balrawbau.
Ku Tamatama pwakawnu ku atapalrane ki kawkawluini
12Ku Musi amia kai ki Tamatama, “Tenganesu ka nawacunu nakwane ku asangilukane ki mapapangale mwa kwidra ki amwane, ai kaisu peaelaela nakwane ku asikawlane ki aneane kulri tupalra nakwane katwase mwa. Wathingalaku muswane, la kadalamaku muswane naamiasu. 13Ala kikai, kiatubiaku ala pelaelaili kudra kikakesu, la nau kipuawngane muswane, si parwakaikai icucubungu muswane kisubulrubulru. Tara ngulringava kai ki minzuku ka muswane.”
14Ku Tamatama la kawriva, “Lri ngikakamaniaku tupapalraku muswane; si pakasulivate ku kidremedremesu.”
15Ku Musi la tubalre, “Lwiyasi la kaisu ngikakamani tupapalra naiane, kiatubi nai madha pakatwatwase naiane kikai. 16Alaiyasi la kaisu tupalra naiane, aneane kulri thingale nakwane si kawkawlusu ka yacucubungu muswane kikilibake? Ku tatapalranesu yakai ku tamakakaelane nai ki drumane ka minzuku.”
17Ku Tamatama la kawriva ki Musi, “Lri pangimiaku ku takitubianesu; asi lwiyane wathingalaku muswane, la kadalamaku muswane.”
18Ku Musi la iya kai, “Kiatubiaku ala padrelaili ku lrigusu.”
19Ku Tamatama la tubalre, “Lri padrelanaku patuelre ku draredrare ikai ki tangukakaiyanesu, si pelaela ku saniange ka naganeli. Tamatamaku; nau kakalithi ki aneane lu iyaku, lri kakaalithaku ki aneane, nau tukurwane ki aneane lu iyaku, lri tukurwanaku ki aneane. 20Kainaku lri padrelane ku lringauli muswane, asi lwiyane sanaka wadrele nakwane kadrwa ku lri maka udripi. 21Ai ikai ki thilili yakai ku taluvale ku taikaiyane, lri maka acegecegesu ikai kwini belenge ki alrisapesape. 22Lu lribalribate ku lriguli, lri malraku muswane pwadringi ki libi ka barungulu, arakai ku alrimali paidringi muswane, ukalava ku alribataneli. 23Ala lri sawlriaku ku alrimali; lri drelesu ku lrilrikudruli, ai kaisu lri maka drele ku lringauli.”
Currently Selected:
Takatwasane Izipiti 33: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
