Takatwasane Izipiti 31

Lasialrima ka twa Alrivilrivi ka balrawbau

(Takatwasane Izipiti 35.30–36.1)

1Ku Tamatama amia kai ki Musi, 2“Patwaladhaku ki zuku ki swa Yuda pilringa ki agane ki Hure ka lalake ki Uri ka Bizale. 3Ku pukuli swaete iniane; patarwamaraku iniane ku thingalane, lrigilane, tapwalrimane, lai lri dulru pia ku makaelaela ku tapwalrimanane, 4kelrete ku lrika apangimiane ku pacase, arakai ku kingi, gingi, lriwlu darepe ku makaelaela ku lalawbubulu; 5la dulru twadreme ku tinukucingalrane ka lrenege; papacase ki angatu; la dulru pia ku drumane ku makaelaela ku tadememele ku tapwalrimane. 6La patwaladhaku ki zuku ki Dange sikawlu iniane kwini ki lalake ki Ahisamake ka Uhulriabe ka amani ku paraluralubu iniane. Kwini ki lasialrima ka laumawmase, mialriaku baai liniane ku lrigilane, dulru darepe ku cunuli ku makaelaela ku lawbubulu: 7Amani kudra balrawbauli, Langiane, sacaecaebane ki Langiane, si lararukudrane patueelre ki balrawbau, 8tapwane ku cukwi si lalawbubulu kakingiane ka tapikaikaiyane ki tinaki si sarakaikaiyane patuelre, si tapatarumaramarane ki taliane, tasinasinavane ka vintange si taneneane ki vintange, 9tapatarumaramarane ku Lama ka lrisi si sarakaikaiyane patuelre, 10tinupudriadringadhane ka Laimai ki barakalai ka Arungu si lalalakeini ka asilaimadhane lini lu kipuawngane marasikai ku awngane ki barakalai, 11Alrivilrivi ka lawlau, si nikelretane ki Alrivilrivi ka taikaikaiyane ku taliane. Kikai patueelre lri tara paluludu kwini lalasu pangimia ku tacunaneli.”

Pasusu ki Taisadrasadrane ka vai

12-13Ku Tamatama wacunu ki Musi ku apelaelane ki swa Iseraylri, iya kai, “Kunumi tara pasuswa ki Taisadrasadrane ka vaili; asi lwiyane kikai amani ku palralrawthu ku sapatuthingalane ikai nakwane si kunumi, sapadrelane kunaku ka Tamatama ka wapilriaku numiane tukawkawlu nakwane. 14Kunumi tara pasuswa ki Taisadrasadrane ka vai, asi lwiyane kikai vai amani ku tinusaniange ka vai. Sanaka kai pasusu kai ki vai, la tuthadaalrane twatwatumane ku umawmase lri tara kipapaacai. 15Kunumi yakai ku amakanemelane kaungu, ai ki samakapitulu amani ku mapapedrenge ka Taisadrasadrane ka vai, ka apatarumarane nakwane. Sanaka wakaungu ikai kai ki vai ku umawmase lri tara kipapaacai. 16Ku mapapangale ki swa Iseraylri lrika palralrawthu pasusu kai ki vai, tusapatuthingalane cegecege makaketekete. 17Kikai amani ku palralrawthu ka sapatuthingalane ikai ki swa Iseraylri si kunaku; asi lwiyane kunaku ka Tamatama ikai ki minakanemelane wabekacaku ki subelebelenge si kadaengane, ikai ki samakapitulu la idrengere ku awngane si isadra.”

18Ku Twaumase sa ikai lregelrege Sinai maka kawrivanga ki Musi kikai lavaga, la malra ku drusa ku alibi ka lrenege baai iniane. Ku Twaumase ngiakakamani pikai ki alibi ka lrenege pacase ku padradrekaseini.

Currently Selected:

Takatwasane Izipiti 31: NDV

Highlight

Copy

Compare