Takatwasane Izipiti 15

Senai ki Musi

1Ku Musi si mapapangale ki swa Iseraylri la papia ki Tamatama senai:

Lri senadhaku drengedrengere ki Tamatama, ngwalai ku tamalraneini ku lrigu ku tapamalebeane;

wamalra ki larigi si lapalridingi verevere puadringi ki laveke.

2Ku Tamatama amani ku makecenge ka tarapalakebe;

palribulu nakwane.

Amani ku Twaumaseli, lri senadhaku drengedrengere iniane;

amani ku Twaumase ki ama, lri senadhaku drengedrengere iniane.

3Ku Tamatama tarakikaruburu;

kikai Tamatama amani ku naganeini.

4Wamalra kwini kwapingi ki swa Izipiti si lapalridingi lini verevere puadringi ki laveke,

wamalra kwini ki talrilrigili ka kiacapili ki kwapingi renere pikai ki laveke Suize.

5Ku mwaadringi ka laveke warenere liniane;

mia ki lrenege museleke mwa cakena ki laveke.

6 Tamatama, ku vanalesu yakai ku kaika akiramavane ka puku;

Tamatama, wadulrusu tatithiri ki badha.

7Ku matisalrwanesu kadrwa kulri kiramau, pamalebenga ki badha;

ku lisianesu walama kabebetethe liniane mia ki walama ki sangukimugiane ka ubulu.

8Papiasu ki laveke ipi, ku acilai la isarubu,

mia ki balingibingi acegecege;

ku cakena ki laveke la akameamealane.

9Ku badha amia kai: Lri saladhaku liniane, ruthuku liniane;

lri apawvagavagadhaku ku tacekecekelane lini, la ngisasingikaai ravase malra.

Lri arakaiyaku ku dramu amudu liniane.

10Ai kusu ka Tamatama, akwavavaalesu ipi,

ku swa Izipiti la makitu murenere pacai;

kwi lalasu mia ki adreme muthene mwa adringi ki acilai.

11 Tamatama! Ikai ki latwaumase yakai ku miyaiya muswane?

Aneane ku miyaiya muswane, ikai ku saniangane matisalru?

Aneane ku miyaiya muswane, dulru pia ku pinangu Twaumasane ka puku ka matiasamali?

12Lu segesu ku vanale,

kai kadaengane wathamukulu amudu ki badha.

13Arakaisu ku kai maelaela ku sakialibake, sangiluku palribulu ki kawkawlusu;

arakaisu ku maadrau ku puku ililuku liniane mwa ki saniange ka daedaesu.

14Kialalranga sanaka kuni, la makitu manugiligili kathathiburu;

ku swa Pelisitine kiakabungu ki mukuludrane.

15Ku kiacapili ki swa Idume mwakuludru,

ku tamagarange ki swa Muabe makitwa manugeregere,

ku swa Kanange amalremenga makanaelre.

16Ku kiwcane si sakukuludrane wakela liniane!

Tamatama, makitwa drelenga ku maadrau ku pukusu;

mwakuludru ka kadrwanga ku apangimiane lini,

pakeela ku tapatwaladhanesu ki duri si palribulu ki kawkawlusu

si dadavace ngucacucubungu liniane.

17Wailukusu liniane mwa ki lregelregesu, ikai kwini la lapusu pacebe liniane;

kikwini amanisu ka Tamatama ka wapilri tudaane ka taikaikaiyane,

yakai ku ngitatudaanesu ka Alrivilrivi ka taikaikaiyane.

18 Tamatama, lrika palralrawlrawthusu atalialalai!

Senai ki Miriame

19Ku swa Iseraylri ngwakai ki kameamealane lribate ki laveke; ai ku lapalridingi, larigi si lakwapingi ki swa Izipiti samwadringi ki laveke, ku Tamatama paelre ki laveke, malra renere liniane.

20Ku taka ki Arungu ka Miriame la malra ku kalringikingi si bangebange, takalra ku labaibai ku twapapalra iniane, takubangebangebange, si dradradralrai, 21ku Miriame la mailuku liniane si senasenai:

Senadha drengedrengere ki Tamatama, wamalranga ku lrigu ku tapamalebeane;

kwi lasu wamalra kwini sakikaruburuburane ka rigi si lakwapingi verevere puadringi ki laveke.

Mapalili ka acilai

22Ku Musi wasangiluku ki mapapangale ki swa Iseraylri katwase ki laveke Suize, la daruru ka calragulragu ka Sure, ikai kwini calragulragu makatulrululringa dadavace, la kai maka kidringai ku natikianenga ku aungulane ku acilai. 23La daruru kavai Mala; kwini acilai kavai laka mapalili, kaika amakaungungulane. La ngwalai kikai, kwini kadaengane lakamani ku pasi Mara#15.23 “Mara” ku vaga ki Hiburu ku pacugane yai “mapalili” amia.. 24Ku lamapapangale la kirimu kaliliisi ki Musi, kivaga iniane, “Lalri unguluta ku manemane?” 25Ku Musi la pidruru ikai cakena kitubi ki Tamatama; ku Tamatama la padrele iniane ku vaeva ku padrungudrungu ka angatu. La malra kwini padrungudrungu si verevere puadringi ki acilai, kwini acilai la akabalrithi ka aungulanenga ka acilai.

Ku Tamatama la ikai kwini baai liniane ku tinukakudhanane si ikai kwini kilrialringau liniane. 26La iya kai, “Tamatamaku ka Twaumase numi, lwiyasi la pakaelre numi pasalaladha nakwane, pia kudra pacengecenge iyali ku tatumanane, paluludu ku padradrekaseli, kainaku lri arakai kudra pathavunguli ki swa Izipiti ku lacaemane si pathavungu numiane. Amaniaku ku wasulrau pawdringai numiane ka Tamatama.”

27Kwi lalasu lu darurunga ka Ilrime; ikai kwini yakai kavai ku talu 12 ku berai ka acilai si mapitulu ku abare. Kwi lalasu la ikai ki babiabila ki acilai cegecege ku tasuladhane lini.

Currently Selected:

Takatwasane Izipiti 15: NDV

Highlight

Copy

Compare