Takatwasane Izipiti 14

Talwabalre ki laveke Suize

1Ku Tamatama la kawriva ki Musi, 2“Lu pelaela ki swa Iseraylri ngibangula iya, la tutasuladhane ikai ka Pi Hahiruthe kwini kabicelrakane ki Migedule si laveke Suize, kwini adeethe ka Baale Zipungu. 3Ku talialalai ki swa Izipiti lai lri iya kai, amama ki kadalranane si kicelrepe ki enai ku swa Iseraylri. 4Lri pakakawlukulaku ku takidremedremaneini, lalri kainganai saladha numiane. Kikwini lri sabelengaku ki talialalai ki swa Izipiti si lakwapingini, lalri kirimu musakene nakwane, thingale ka Tamatamaku.” Ku swa Iseraylri la pangimia ku tacunane piya.

5Ku talialalai ki swa Izipiti sa kilalra ku takipelaelane, la thingale ku swa Iseraylri ka mwalrakawnga, ku kidremedremeini si kidremedreme ki lasasiakawluini la akabalrithi, la iya kai, “Ata mia kai kanganga turamuru? Pamwabereta ki swa Iseraylri, laka kadrwanga ku mapangale ku durita!” 6Ku talialalai ki swa Izipiti la mubelenge ki sakikaruburuburane ka palridingi, si sarubu ki lakwapingi. 7La iluku patuelre ku sakikaruburuburane ka palridingi katwase, paelre ku ta 600 ku nipilripilriane ku sakikaruburuburane ka palridingi, la kamani ku kiacapili ki kwapingi ku marasiakai. 8Ku Tamatama la pakakawlukulu ku takidremedremane ki talialalai ki swa Izipiti, la kainganai saladha ki swa Iseraylri, asi lwiyane kwini lalasu kadrwa ku ukuludrane#14.8 “kadrwa ku ukuludrane” ku wahunyake madu iya kai “ikai tailebe ki tapalakebane ki Tamatama”. lini katwase Izipiti. 9Ku lakwapingi ki swa Izipiti, matala larigi, lapalridingi si kwapingi, la katwase saladha ki swa Iseraylri, daruru kavai babiabila ki laveke kwidra taikaiyane lini tutasuladhane; kwini adeethe ka Pi Hahiruthe si Baale Zipungu.

10Ku swa Iseraylri sadrele ki talialalai ki swa Izipiti si lakwapingini padalinga liniane, la makitu mukuludru turamuru, la kitubi ki Tamatama ku akipalribulane. 11La kawriva ki Musi, “Bekace ka kadrwa ku taikaiyaneta kidralreke ikai Izipiti? Manemane ku malrasu iluku naiane pwa kai calragulragu kipapacai? Ku sangilukusu naiane katwase Izipiti; drela, manemane ku piangasu ku mathariri! 12Sa kaita katwaseana kai nai ka peaelaelanga muswane ka lri tara ngimia kai? La pelaelanga nai muswane madha thethengete ku angimiane nai, pikaiya naiane Izipiti aduri ka maesaesai. Lu aduriane silrialribate madu ki wapacai ikai calragulragu!”

13Ku Musi la tubalre, “Madha mukuludru! Acegecega kapapedrenge. Kaikameane lri drele numi ku Tamatama ka pangiatumane palribulu numiane! Kai numi lri peelanga drele kai ki swa Izipiti ka laumawmase. 14Ku Tamatama lri pasikai numiane kikaruburu; kunumi idrengera sikakathane.”

15Ku Tamatama la kawriva ki Musi, “Asu kirimu kitubi nakwane? Cuna ki swa Iseraylri, katwasa arwacucubungu. 16Cilika kwini ukudrusu, la sege papia ki laveke. Kwini laveke lri mauvagai, ku swa Iseraylri lai lri dulru maka ngukai ki kameamealane katwase lribate. 17Lri pakakawlukulaku ku takidremedremane ki swa Izipiti, kwi lalasu lai lri mwa ki laveke saladha numiane. Ai lri pamalebeaku ki talialalai ki swa Izipiti, ki kwapingini, si sakikaruburane ka palridingi si ngwarigirigi ka lakwapingi, kwini lalasu lai lri musakene nakwane. 18Lu pamalebenga naku liniane, kwini lalasu lalri makitu thingale ala ka Tamatamaku.”

19Kudra nasacucubungu ki swa Iseraylri ka sasiakawlu ki Twaumase, kikai la ngibangulu si asalrilrikudrunga; ku ememe ka ulrudru la mialri ngipalrici mwa tali lrilrikudru, 20la agisinga ki swa Izipiti si swa Iseraylri. Ku ememe la dralreke ki swa Izipiti ikai ki dradrimitane, ai paledraleedra ki swa Iseraylri, kwini ki maungane, ku lakwapingi ki swa Izipiti la kai maka dethe ki swa Iseraylri.

21Ku Musi sa sege ku alrima papia ki laveke, ku Tamatama la patwalai talrawane ku makecenge ku valrigi, la pasiwlri ki laveke. Wataleare valrigi, la pakameamealane kwini cakena ki laveke. Ku acilai la mauvagai, ngimia ki maecebe ka satelengane ka balingibingi; 22ku swa Iseraylri la dadavace ngukakai ki kameamealane, ngilribatenga ki laveke. 23Ku swa Izipiti la saladha liniane, matala larigi, sakikaruburane ka lapalridingi si kwapingi la makitu mwadringi ki laveke. 24Sakalialiare, ku Tamatama la twalai ki ememe ka ulrudru si apwi ka ulrudru drele ki kwapingi ki swa Izipiti, la pwa pakalrithavulu liniane. 25La pawthene ki dulrailraki ku palridingi ki swa Izipiti, kai maka ngipalrici. Ku swa Izipiti la iya kai, “Tamatama ka paralubu ki swa Iseraylri kikaruburu mitane. Ila takirarimu mubere!”

26Ku Tamatama la kawriva ki Musi, “Papia ki laveke sege kwi alrimasu, lani maelre kwini acilai, si renere ki swa Izipiti si lapalridingi si lakwapingi lini.” 27Ku Musi la papia ki laveke sege ku alrima; sakaliarenga, ku acilai la siwlriane ku natangimiane. Ku swa Izipiti takatwase mubere ki acilai sa iya, ku Tamatama pasiwlri liniane mwadringi ki laveke. 28La siwlriane ku laveke mia kuna tangimiane, si renere demedeme kwini wakela saladha ki swa Iseraylri ka lapalridingi, lakwapingi si latwaredelane ka swa Izipiti, kadrwa ku natangeanga ku waudripi. 29Ai ku swa Iseraylri wadadavace ngukakai ki kameamealane lribate ki laveke, ku acilai la mauvagai ngimia ki satelengane ka balingibingi.

30Ikai kwini ki vai, ku Tamatama la patwalai ki alrima ki swa Izipiti palribulu ki swa Iseraylri, ku swa Iseraylri la drele ku ngiasarade ikai babiabila ki laveke ku wapacai ku swa Izipiti. 31Sadrele ku swa Iseraylri ki Tamatama ku taarakaiyane ku maadrau ku puku si pamalebe ki swa Izipiti, kwini lalasu la musakene ukuludru ki Tamatama, sudralru iniane, la mialri kadralru ki sasiakawluini ka Musi.

Currently Selected:

Takatwasane Izipiti 14: NDV

Highlight

Copy

Compare