Takatwasane Izipiti 16
16
Mana si Tharingiebele
1Ku mapapangale ki swa Iseraylri makanaelre sa katwasenga Ilrime. Kudra takatwasane lini Izipiti saka samaka 15 ka vai ki saka taradrusa ka dramare, la daruru kwini ki sia Singi ka calragulragu ka kabicelrakane ki Ilrime si Sinai. 2Ku taikaiyane calragulragu, makitwa kalisi ki Musi si Arungu, 3la iya kai liniane, “Madadalame nai ku Tamatama ana pikaainga Izipiti naiane papacai. Ikai Izipiti, yakaiyana ku tadulrwane madu kane ku beate, la miaka makalra ku drumane ku laakaneane ku atara kabucukane nai. Ai kunumi la iluku numi naiane pwa kai calragulragu, ani pacai iya naiane ki silravane.”
4Ku Tamatama la iya kai ki Musi, “Lri patwaladhaku belenge pulebe baai numiane ku akaneane. Kai swa Iseraylri lukavaivai lri tara mulatadre si siludu ku amakakelretane lini kwini ki vaivai ku akaneane. Lu mia kai, lri maka kilrialringavaku liniane, dredrele liniane lu maka paluludu ku tapelaelaneli. 5Luka samakanemele, lri tara siludu ku amakapusalane ku akaneane, padulru ku akaneane.”
6Ku Musi si Arungu la iya kai ki swa Iseraylri, “Kaimaungu, kunumi lri thingale numi ala ka amani ku Tamatama ka wailuku numiane katwase ka Izipiti. 7Lwiya ki mialrealre, lri drele numi ku thelare ki Tamatama. Kialalranga ku kalisilisi numi; ngiamialringa kwini, kwini kalisilisi numi amani numi iniane, asi lwiyane kunai pangiamiamia nai ku tapelaelaneini sikakathane.” 8Ku Musi la iyanga kai, “Ku Tamatama lri pikai ki maungu baai pakane numiane ku beate, lri pikai ki mialrealre baai numiane pakane ku amakakelreetane ku pange, asi lwiyane kialalranga kwini kalisilisi numi iniane. Lu kalisi numi naiane, amani ki Tamatama ku kalisilisi numi!”
9Ku Musi la iya kai ki Arungu, “Lu paisarubwa ki mapapangale makanaelre acegecege icucubungu ki Tamatama, kialalranga ku kalisilisi lini.” 10Ku Arungu sakawrivariva ki mapapangale, kwini lalasu la ngibangulu drele papia tali calragulragu, la kirimu yasasaane drele ku thelare ki Tamatama athingalane ikai belenge ki ememe. 11Ku Tamatama kawariva ki Musi, 12“Kialalranga naku ku takalisiane ki swa Iseraylri. Kusu la pelaela liniane, ikai ki miauawbu, yakai ku akaneane lini ku beate; ikai ki mialrealre, yakai ku amakakelretane lini kane ku pange. Lungimia kikai, kwini lalasu lri thingale ala ka Tamatamaku, ka Twaumase lini.”
13Sakamiauawbu, la taruthathatha ku tharingiebele ngipalai kela, ku kalrane wakabungu ki taikaiyane ki balrawbau lini. Sakamialrealre, la kalamu ngithalringulu ki taikaiyane lini ki balrawbau; 14sana tulawlau ku lamu, kwini yakai calragulragu cakena la ikai ku malubiiri ku mia ki pasabu. 15Ku swa Iseraylri la drele kikai lamanemane, la kai thingale ka manemane, la makitu makivagavaga, “Manemane kikai?”
Ku Musi la kawriva liniane, “Kikai amani ku baai ki Tamatama ka taleke. 16Ku Tamatama nawacunu, ku tangeea lri malra ku amakakelretaneini, ki dadaanane ku tangeea lri maalra siludu ku drusa ka kunsenge.”
17Ku swa Iseraylri la singikai ku tacunane ki Musi, yakai ku umawmase ku ngwakalra, yakai ku ngwabekele siludu. 18Sakelretenga, ku ngwakalra kai pwatedra, ku ngwabekele mialri kai kawrame; ku tangeea ku umawmase ku siluduini makakelrete kudra murikaini. 19Ku Musi la kawriva liniane, “Kaika nipalraingane ku yakai ku pwatedra si pukaiyane.” 20Ai yakaai ku umawmase ku kai kialalra ku vaga ki Musi, la putedra. Sakakaiyane ki mialrealre, kikai niputedrane la alubalubadhane patuelre, si sangwaubilringi. Ku Musi la kalisi liniane. 21Lukamialrealre, ku laumawmase la singikai ku apingithaneini siludu ku taleke; lu kaculunga ku vai, kwini la taleke la ngiderenau.
22Lu kelanga ki samakanemele ka vai, kwini lalasu la siludu ngutaidrusane, ku tangeea supate ka kunsenge. Ku lakiacapili ki mapapangale la pelaela ki Musi kikai miyaiya kai ka awngane. 23Ku Musi la kawriva liniane, “Ku Tamatama wacununga, luiya yai Taisadrasadrane ka vai, ka lrika apatarumarane ki Tamatama. Kaikameane kunumi malra kwini akamane athingelrane tulreepengenga, kudra tedrane la pikaiya la kaneanga luiya.” 24Kwini lalasu la singikai ku tacunane ki Musi, la malra kikai latedrane si pukaiyane; kikai laakaneane la kai lubalubadhane kai maubilringi. 25Ku Musi la kawriva, “Kunumi kanea kwini nipasurane ku taleke! Asi lwiyane kaikameane yai apatarumarane baai ki Tamatama ka Taisadrasadrane ka vai, kai numi lri maka kidringai ilatadre ku akaneane. 26Kunumi lri ikai numi ki nimakanemelane ka vai siludu ku laakaneane, ai ki samakapitulu ka Taisadrasadrane ka vai, kadrwa ku akidringadhane numi ku namanemanenga.”
27Lu kelanga ki samakapitulu, la ikaiyana ku laumawmase ku matwaseana silape ku akaneane, ai kai makakiadringai ku namanemanenga. 28Ku Tamatama la kawriva ki Musi, “Pakelanga kaiasasane lri kai numi tarumarana kai drekaseli? 29Pulringava, Tamatamaku; wabadhaku numiane ku nimakavalane paisadra. Ngwalai kikai, ikai ki samakanemele ka vai baai ku amakapusalane ku akaneane, lu kela ki samakapitulu, sanaka aneanenga tara ikaiya tavanane, madha katwatwase mulatadre.” 30Lakamani kai swa Iseraylri luka samakapitulu kai mauawngu.
31Kai swa Iseraylri la malra kai ki akaneane pasi Mana#16.31 “Mana” yakai ku “manemane kikai” amia ku patharevane.. Mia ki tatiitiki ka lrawlrapungu ka berathe, lu kaneane mia ki nitupangeane ka valu. 32Ku Musi la kawriva, “Ku Tamatama wadrekase mitane ku asurane ku bekeelane ku Mana, si baai ki lamwabaibalrithi mitane, ku lrika adrelane lini ki Tamatama sa sangiluku mitane twalai Izipiti, ikai calragulragu kudra baaini mitane ku laakaneane.” 33Ku Musi la kawriva ki Arungu, “Malra ku vaeva ku kankange, la pwadringi ku drusa ka kunsenge ku Mana, la pikai ki taikaiyane ki Tamatama; kikai yai nipasikaiyane ki lamwabaibalrithi mitane pikai.” 34Ku Tamatama la pia kikai cunu ki Musi, ku Arungu la pangimia. Kwini lasu la malra ku kankange pikai ki Langiane cucubungu, pudringai. 35Ku swa Iseraylri taramasupatele ka caili kanekane kikai Mana, pakela ku tadarurane lini si sutelrainga ikai Kanange. 36(Ikai kwini kudra sakelrekelretane bungubungu tha ki mapusale ka kunsenge.)
Currently Selected:
Takatwasane Izipiti 16: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
