Amuse 1

1Saka talialalai ki swa Yuda ku Uzia, si la icengeecenge ka talialalai ki swa Iseraylri ku lalake ki Yehuase ka Yerubuame, sa lri taradrusanga ka caili si kela ku madradrau ka lingilingi, ku Twaumase peaelaela pathingale ki swa Tikua ka taraagwagu ki kiu ka sia Amuse ku patharukai ki swa Iseraylri. Kikai lebe kai nipacasane yai vaga ki Amuse.

2Ku Amuse amia kai kawriva,

Ku Tamatama twalai ka Ziyungu kaelaela,

patwalai Yerusalrime dreredrere.

Ku laubulu ki tapagwagwane marudame.

Ku laubulu lregelrege Karemele abwaburavane.

Tasaibangane ki Twaumase ki lakuni ki ngwadadethe ki swa Iseraylri

Patharukai ki swa Siria

3Ku Tamatama amia kai, “Ku laumawmase ki swa Damasekuse apapelaela pasalriu, lri tara pathaavungaku liniane. Kai lalasu arakai ku matiangeange ku sapathavungane ki swa Gileade. 4Lakamani lri arakaiyaku ku apwi lama ki daane ki Hazaele ka talialalai, si kabebetethe ku daane ki Bine Hadade ka talialalai. 5Lri burukaku ku lrawlrawdru ki cekele Damasekuse, si papacai demedeme ki yakai dratane Avingi ka laumawmase si abelenge ka tarasangililuku ki swa Bithe Edenge. Ku laumawmase ki swa Siria lri kiravase pu Kire.” Ku Tamatama amia kai pelaela.

Patharukai ki swa Pelisitine

6Ku Tamatama amia kai, “Ku swa Gaza apapelaela pasalriu, lri tara pathaavungaku liniane. Kai lalasu waravase ki umawmase ki pasiagisi ka kuni, si kilangai ki swa Idume tuduri. 7Lakamani lri lamaku ki laraedre ka kepale Gaza, si kabebetethe ku daane ki talialalaini. 8Lri papacadhaku demedeme ki laumawmase ki swa Asedude si mabelenge ka tarasangililuku ki swa Asekelungu. Lri pathavungaku ki cekele Ikerungu, ku yakaai adringi ki cekele Pelisitine ku umawmase lri pacai makanaelre.” Ku abebeelengenga ka Tamatama amia kai pelaela.

Ngwakai ki swa Tayre

9Ku Tamatama amia kai, “Ku laumawmase ki swa Tayre apapelaela pasalriu, lri tara pathavungaku liniane. Kai lalasu kai paluludu ku tamatutalragiane lini si makaketekete ki maelane ka cekele. Pakatuaselringa kwini ki laumawmase ki pasiagisi ka kuni mwa ka Idume paaduri. 10Lakamani lri lamaku ku raedre ka kepale Tayre, si kabebetethe ku daane ki talialalaini.”

Patharukai ki swa Idume

11Ku Tamatama amia kai, “Ku umawmase ki swa Idume apapelaela pasalriu, lri tara pathaavungaku liniane. Kadrwa ku kilibakane, arakai ku lrabu kabebetethe ki retesane lini ka swa Iseraylri. Ku ngikarakacanane lini kadrwa ku tapalikaiyane, ku lisiane lini kadrwa ku sasadra. 12Lakamani lri lamaku ku cekele ki swa Temange, si kabebetethe amudu ku daane ki talialalai Buzera.”

Patharukai ki swa Amune

13Ku Tamatama amia kai, “Ku swa Amune apapelaela pasalriu, lri tara pathaavungaku liniane. Pakai ku aparu swadravane ku daedae lini, kai lalasu pakeela kudra wabuci ku barange ki tawbaliri ki swa Gileade. 14Lakamani lri lamaku ku raedre ki cekele ka Raba, si kabebetethe amudu ku daane ki talialalai lini. Lu makaruruburunga, lri ikai ku mapapacapacai ku lingau, ku tamawlululucane lri mia ki waumumuku. 15Ku talialalai si tabebelenge lini lri katwase acaicali makanaelre.” Ku Tamatama amia kai pelaela.

Currently Selected:

Amuse 1: NDV

Highlight

Copy

Compare