Amuse 2
2
Patharukai ki swa Muabe
1Ku Tamatama amia kai, “Ku swa Muabe apapelaela pasalriu, lri tara pathaavungaku liniane. Kwi lalasu wamalra ku culrale ki talialalai ki swa Idume si lama paabunga. 2Lakamani lri lamaku ki swa Muabe, la kabebetethe ku daane ki talialalai ka Kiriuthe. Lu makakaralealeale si ngirapapa ku lakwapingi, ku swa Muabe ikai ki tamakakaruburuburane lri tara paacai. 3Lri papacadhaku ki tamatama ki swa Muabe, si papacai demedeme ki kiacapili ki lamabelenge lini.” Ku Tamatama amia kikai pelaela.
Patharukai ki swa Yuda
4Ku Tamatama amia kai, “Ku swa Yuda apapelaela pasalriu, lri tara pathavungaku liniane. Kwi lalasu wacilri ku sabulrwaneli, kai paluludu ku padradrekaseli. Kwi lalasu kiaililuku kudra ki samiamiange ka kisususu ki cucungulane lini, la katwasenga kidaili ki pacengecenge ka sabulrwane. 5Lakamani lri lamaku ki swa Yuda, la kabebetethe ku daane ki talialalai Yerusalrime.”
Tasaibangane ki Twaumase ki swa Iseraylri
6Ku Tamatama amia kai, “Kai swa Iseraylri apapelaela pasalriu, lri tara pathavungaku liniane. Kwi lalasu marau ki paisu, la kilangai ki mwalecege ka umawmase, arakai ku naika balrithane ki kece ka varazi ku paisu kilangai tuduri ki matiakukuru ka umawmase. 7Kai lalasu mabebetethe ki matiakukuru, la lrudrulu pakatwase ki yakadalranane ka matiakukuru. Ku lamatama la tara mwa pasalriu ki tangeangeea ka tiatiama ikai ki tasamiamiangane, twadrekasenga ki naganeli. 8Kai lalasu sikathuruanenga ikai thili ki tapatarumaramarane, si sapa arakai ku sadrepetane ki lalasu liniane ku laimai, kai lalasu sikathuruanenga ikai ki daane ki Twaumase, si malra ku nivuthane ka lapatwalai ki matiakukuru ku paisu si arakai langai ku bava la ungulu.”
9Lakawkawluli! Kai swa Amuri adravane ka ngiamia ki cedare ka laangatu ka baali ku adravane, la ngimia ki tharialupu ka angatu ku ngicaemane, ngwalai numiane wamudaku pakisalrunga liniane. 10Wamalraku numiane patwalai Izipiti, ikai calragulragu la ililukaku numiane taramasupatele ka caili, la baadhaku numiane ku kadaengane ki swa Amuri. 11Patwaladhaku ki lalalake numi pilri ku yuginsia, la patwaladhaku ki layacengecenge numi pacebe ku wadulru ngipapatarumara baai ki Twaumase#2.11 “ngipapatarumara baai ki Twaumase” ku wahunyake madu iya kai “Nazirite ka umawmase” amia, mwakalriivili ngikaketekete baai ki Twaumase ka umawmase. Kwi lalasu kiaketekete pelaela: Kai lri ungulu ku bava, kai lri kaciane ku isiu, kai lri ecenge ki kinawmasane ki wapacai.. Swa Iseraylri! Pasalrivaku lu iyaku kikai? Tamatamaku; ka amia kikai pelaela. 12Ai kunumi wavutha numi paungulu ku bava kwini ki la ngiapapatarumaranga baai ki Twaumase la pakaicilri numi ki yuginsia pelaela ku vagali. 13Lakamani lri patubakebakaku numiane pikai daedae, lri drepetaku numiane mia ki swaete ku taleke ka palridingi ka wadrepete ngubabelenge. 14Adravane ka ridaridare lailai lri kai maka mubere; ku sapukuane lri amalreme; ku kwapingi lai kai maka ngipapalribulu. 15Ku taralraili lri kai maka acegecege; ku maridare lailai ku kwapingi lai kai maka mubere; ku tarangurigirigi ka kwapingi kai lri maka ngipapalribulu. 16Ikai kwini ki vai, kudra magagaarangenga ka lakwapingi lri sarare ku laadreme, si kisaswarau mubere. Ku Tamatama amia kikai pelaela.
Currently Selected:
Amuse 2: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
