Saka talialalai ki swa Yuda ku Uzia, si la icengeecenge ka talialalai ki swa Iseraylri ku lalake ki Yehuase ka Yerubuame, sa lri taradrusanga ka caili si kela ku madradrau ka lingilingi, ku Twaumase peaelaela pathingale ki swa Tikua ka taraagwagu ki kiu ka sia Amuse ku patharukai ki swa Iseraylri. Kikai lebe kai nipacasane yai vaga ki Amuse.
Ku Amuse amia kai kawriva,
Ku TAMATAMA twalai ka Ziyungu kaelaela,
patwalai Yerusalrime dreredrere.
Ku laubulu ki tapagwagwane marudame.
Ku laubulu lregelrege Karemele abwaburavane.
