Yuile 3
3
Ku Twaumase lri saibange ki lakuni
1Ku Tamatama amia kai:
Ikai kwini ki vai,
lri tupelaku pangiradhekane ki Yuda si Yerusalrime.
2Lri dawlaku sanaka kuni mwa ka “Tasaibaibangane valrwalru”;
lri ngwaladhaku ku tadrimane tulisi ki kawkawluli si saibange liniane.
Kwi lalasu napathiarakupu ki swa Iseraylri mwa ki maelane ka kuni,
la apauvagai ki kadaenganeli Iseraylri.
3Kwi lalasu pangwakuzibiki ku apangimiane, ku lrika aneane ku lri malra ki niravasane ka umawmase.
Kwi lalasu wamalra ki lasawvalai labaibai ka lavavalake si kilangai tuduri,
matwase kibalrithi si malra ki pairairange si bava.
4“La swa Tayre, Sidune, si Pelisitine ka umawmase, lri papia numi nakwane bilri? Alaiyasi ka unu, lri kirarimwaku papia numiane bilri. 5Waribici numi ku kingi gingili, la malra numi ku tacekecekelaneli, si pikai ki biu numi. 6Kialangai numi ki yakai Yuda si Yerusalrime ka laumawmase baai ki swa Gurike, kwi lalasu la mwadaili katwase ki kuni lini. 7Kaiasasane lri patwaladhaku ki tapwane numi kilangai liniane malra ililuku liniane siwlri kainganai. Lri singikaiyaku ku tapiane numi liniane kiecebe numiane. 8Lri dawlaku ki umawmase si malra ki lalalake numi la kilangai baai ki swa Yuda; kwi lalasu lai lri malra ki lalalake numi patuluru kilangai baai ki swa adaaili ki swa Seba. Tamatamaku; ka amia kai pelaela.”
9Lri ikai numi ki sanaka kuni pelaela:
Padulrwa ku akikaruburane!
Sarubwa ki tarakikaruburuburu!
Payelrelrea sanaka kwapingi si arwa cucubungu!
10Tudramwa kwi laawlru ki pavilringi;
tuidira kwi latakawkau.
Adravane ka twaramuru ka umawmase lri mialri kikaruburu.
11Ngiathalringulu ka lakuni,
kirarimwa kainganai!
Yelrelrea ikai lregelrege valrwalru.
Tamatama, sikawla ki lakwapingisu si kikaruburu liniane!
12Lakuni maka padulrua,
si kainganai mwa “Tasaibaibangane valrwalru”.
Kwaku ka Tamatama lri ikaiyaku kwini tutasaibaibangane,
si saibange sanaka ngwadadethe ka lakuni.
13Maadrawnga turamuru kwi pasalrivane ki lalasu;
lri pulebeaku si kadrulu liniane,
mia ki kiataleke luka takitaletalekane;
lri drepetaku si baburau liniane,
mia ki budu ka yakai ki tapepeane tubava ka kiape,
pakela ku talrapesadhane ki bava.
14Ku tathathatha ku laumawmase yaelrelre ikai “Tasaibaibangane valrwalru”;
ku asaibangane ki Tamatama ka vai lri ikai kwini mulebe.
15Ku vai si dramare lri kadradrimiti;
ku latariau lai lri mialri kai ledranga.
Ku Twaumase lri patarumara ku akaesadhane si baai ki kawkawluini
16Ku Tamatama twalai Ziyungu kaelaela;
kwi lasu twalai Yerusalrime padreredrere.
Ku subelebelenge si kadaengane manwagiligili,
ai ku Tamatama lri palakebe ki kawkawluini,
si atapalakebane ki swa Iseraylri.
17Ku Tamatama amia kai, Iseraylri,
lukamaninga kwidra lri thingale numi ala ka Tamatamaku ka Twaumase numi.
Lri ikaiyaku Ziyungu ka saniange ka lregelrege;
kai Yerusalrime lri asaniange ka cekele,
ku maelane ka zuku kai lri paamakinga iniane palralrawthu.
18Lu kelanga kwini ki vai,
salraelre lregelrege ubulane lri mwalwalwaludrunga ku bavane ka bava;
ku la madrau tikiyane ka lregelrege lri asese si mwaludru ku mireke ki lwange;
ku lavaalru ki Yuda lai lri mwalwaludru kai kadrekadrekare,
yakai ku berai ka acilai lri twalai ki daane ki Tamatama kainganai mwaludru,
si pwacilai valrwalru Sitime.
19Izipiti lri anicilriane ka kadaengane,
Idume lri aubulane;
asi lwiyane kwi lalasu natwalisi ki Yuda,
si patueraerai ki kadrwa ku pasalrivane ka laumawmase.
20-21Lri bilriaku ki badha pasikai ki kiakabebetethe#3.20-21 “Lri bilriaku ki badha pasikai ki kiakabebetethe” patwalai ki sidrumane ka nihunyakane ka lahungu, ku pacase ki Hiburu yai “peaelaela ka kadrwa ku pasalrivane ki kiakabebetethe”.;
kai nau lri pisadra ki pasalriu.
Ai lrika palralrawthunga ikaikai ku umawmase Yuda,
kai Yerusalrime lrika tasueteane ku umawmase pakela ki lagagagane.
Kwaku ka Tamatama lri ikaiyaku lregelrege Ziyungu.
Currently Selected:
Yuile 3: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
