Loos 14

Tsi Xob Txavtxim Rua Lwmtug

1Mej yuavtsum txais yuav tug kws nwg txuj kev ntseeg tseem tsi tau ruaj-khov pistsawg, tabsis tsi xob nrug nwg siscaav txug nwg tej kev xaav tas yog lossis tsi yog. 2Muaj qeetug txuj kev ntseeg tsocai rua nwg noj tau txhua yaam, tabsis tug kws nwg txuj kev ntseeg tseem tsi tau khov tsuas noj tau zaub xwb. 3Tug kws noj tau txhua yaam tsi xob saib tsi taug tug kws tsi noj; hab tug kws noj zaub xwb, los tsi xob rautxim rua tug kws noj tau txhua yaam; ruaqhov Vaajtswv yeej leeg yuav tug ntawd hab. 4Koj yog leejtwg, es koj txhaj rautxim rua luas tug tubkhai? Txawm tug tubkhai ntawd yuav sawv hab qaug los nyob ntawm nwg tug tswv. Nwg yeej yuav sawv khovkho ruaqhov tug Tswv yog tug paab nwg.

5Muaj qeeleej xaav tas qee nub tseemceeb dlua qee nub, tabsis muaj qeeleej xaav tas txhua nub yeej tseemceeb ib yaam nkaus. Yogle ntawd ca nyag ntseeg lawvle nyag qhov kev xaav. 6Tug kws suav ib nub ua nub tseemceeb, yeej yog nwg fwm tug Tswv nwg txhaj ua le ntawd. Ib yaam nkaus le ntawd, tug kws noj tau txhua yaam yeej yog nwg fwm tug Tswv nwg txhaj noj, ruaqhov nwg tub ua Vaajtswv tsaug lawm. Tug kws caiv tsi noj yaam nuav yaam u los yeej yog nwg fwm tug Tswv nwg txhaj caiv, nwg yeej ua Vaajtswv tsaug ib yaam nkaus hab. #Kaulx 2:16 7Peb tsi yog muaj sa nyob pub rua peb, hab tsi yog tuag pub rua peb xwb. 8Yog peb muaj sa nyob, peb nyob rua tug Tswv; yog peb tuag, peb tuag rua tug Tswv. Yogle ntawd, txawm yog peb muaj sa lossis peb tuag, los peb yeej yog tug Tswv le tuabneeg. 9Ruaqhov Khetos tuag hab sawv huv qhovtuag rovqaab lug lawm, kuas Nwg txhaj ua cov tuabneeg caj hab cov tuabneeg tuag tug Tswv.

10Mej cov kws noj zaub xwb, ua lecaag mej txhaj rautxim rua mej cov kwvtij? Mej cov kws noj txhua yaam, ua lecaag mej pheej saib tsi taug mej cov kwvtij? Peb txhua tug yuav tau moog sawv taabmeeg Vaajtswv hab Nwg yuav txavtxim rua peb. #2Klt 5:10 11Ruaqhov Vaajtswv Txujlug has tas,

“Tug Tswv has tas, Kuv yog Vaajtswv tug kws muaj sa nyob,

txhua tug yuav txhuscaug ntawm Kuv xubndlag,

hab txhua tug lub ncauj yuav leeg has tas Kuv yog Vaajtswv.” #Yaxaya 45:23 (LXX)

12Yogle ntawd, peb txhua tug nyag yuav tau qha nyag zaaj rua Vaajtswv has tas vim lecaag peb txhaj ua le ntawd.

Tsi Xob Ua Rua Lwmtug Yuamkev

13Yogle ntawd, ca peb tso txuj kev kws pheej txavtxim rua lwmtug tseg. Tabsis mej yuavtsum tau txavtxim sab has tas mej yuav tsi ua ib yaam dlaabtsi kws yuav ua rua lwmtug dlawm lossis yuamkev ua txhum. 14Qhov kws kuv nyob rua huv tug Tswv Yexus, ua rua kuv paub meej tas yeej tsi muaj ib yaam zaub-mov kws yuav tsi huv le; tabsis yog leejtwg ntseeg tas yaam ntawd tsi huv, tes yaam ntawd yeej tsi huv rua nwg. 15Yog mej ua rua mej cov kwvtij ntxhuvsab lug ntawm tej yaam kws mej noj tes yog mej tsi hlub puab. Tsi xob ca tej kws mej noj ua rua tug kws Khetos tub lug tuag txhwv lawm raug kev puamtsuaj! 16Tsi xob ca yaam kws mej suav has tas zoo lawm raug lwmtug thuam has tas tsi zoo. 17Ruaqhov Vaajtswv lub Tebchaws tsi yog kev noj kev haus, tabsis yog kev ncaajnceeg, kev thaajyeeb, hab kev zoosab kws Vaaj Ntsujplig tug Dlawbhuv pub rua peb. 18Tug kws ua Khetos tegnum zoole nuav yog nwg ua hum Vaajtswv sab hab ua rua tuabneeg nrug pumzoo.

19Yogle ntawd, peb yuavtsum muab sab rau#14:19: peb yuavtsum muab sab rau; tej phoo ntawv qub kws xuas teg sau, muaj peb yeej ibtxwm muab sab rau. ua tej kws yuav ua rua suavdlawg nyob sis humxeeb hab tej kws ib leeg yuav txhawb tau ib leeg lub zug. 20Tsi xob ua rua Vaajtswv teg dlejnum puamtsuaj lug ntawm tej zaub-mov. Koj yeej noj tau txhua yaam zaub-mov, tabsis yog qhov kws koj noj ntawd ua rua lwmtug yuamkev ua txhum, tes koj ua tsi yog lawm. 21Yog koj noj nqaj lossis haus cawv lossis ua ib yaam dlaabtsi kws yuav ua rua koj cov kwvtij yuamkev ua txhum, tes koj tsi noj lossis tsi xob ua yuav zoo dlua.

22Yogle ntawd, ceev tej kws koj ntseeg txug tej yaam nuav ca rua Vaajtswv hab koj paub xwb. Tug kws tsi rov rautxim rua nwg tugkheej vim nwg paub tas tej kws nwg ua ntawd yog lawm, tug ntawd yeej muaj kev kaajsab. 23Tabsis tug kws ua xyemxyaav txug tej kws nwg noj, thaus nwg noj Vaajtswv yuav rautxim rua nwg, ruaqhov nwg tsi noj lawvle txuj kev ntseeg; txhua yaam kws tsi yog ua lug ntawm txuj kev ntseeg, tes yog kev txhum.

Currently Selected:

Loos 14: HNJ2022

Highlight

Copy