Loos 15

Ua Kuas Hum Lwmtug Sab

1Peb cov kws txuj kev ntseeg ruaj-khov lawm, tsimnyog peb yuavtsum paab ris cov kws txuj kev ntseeg tseem tsaugmuas lub nraa, es tsi xob ua le peb nyam xwb. 2Peb txhua tug yuavtsum ua kuas hum tej kwvtij zejzog sab hab, txhaj yuav zoo rua puab hab txhawb tau puab txuj kev ntseeg kuas luj tuaj. 3Ruaqhov Khetos tsi tau ua kuas hum Nwg sab xwb, tabsis lawvle Vaajtswv Txujlug has tas, “Tej lug kws cov tuabneeg txobthuam koj ntawd, tau poob lug rua Kuv lawm.” #Nnkauj 69:9 4Ruaqhov txhua yaam kws tau muab sau rua huv Vaajtswv tej Lug yog sau lug qha peb, kuas peb muaj kev casab lug ntawm kev ua sabntev hab muaj kev txhawbzug kws yog Vaajtswv tej Lug tau qha rua peb.

5Thov Vaajtswv tug kws muaj lub sabntev hab kev txhawbzug, paab kuas mej nyob sis humxeeb kuas mej txhaj ua tau lawvle Yexus Khetos tug yaamntxwv. 6Yog mej ua le ntawd, mej txhaj yuav koom tau ib lub sab hab ua ib tsoog lug qhuas Vaajtswv tug kws yog peb tug Tswv Yexus Khetos Leejtxiv.

Qha Txuj Moo Zoo Rua Lwmtsaav Tuabneeg

7Mej ib leeg yuavtsum zoosab hlo txais yuav ib leeg, ib yaam le Yexus Khetos tau txais yuav mej, sub Vaajtswv txhaj yuav tau ntsejmuag. 8Kuv qha rua mej has tas qhov kws Khetos lug paab cov tuabneeg Yudais, yog ua rua suavdlawg paub tas Vaajtswv yog tug ncaajnceeg, yog tug ua kuas tav lawvle tej lug kws Nwg tau cogtseg rua puab cov yawmkoob, 9hab ua kuas Lwmtsaav Tuabneeg paub qhuas Vaajtswv txug Nwg txuj kev taabncuab. Lawvle Vaajtswv Txujlug has tas,

“Yogle ntawd thaus kuv nrug Lwmtsaav Tuabneeg nyob,

kuv yuav hunkauj qhuas Koj lub npe.” #2Xamu 22:50; Nnkauj 18:49

10Hab has ntxiv has tas,

“Lwmtsaav Tuabneeg, mej cale nrug Vaajtswv tsaav tuabneeg zoosab!” #2Kev 32:43

11Hab tseem has ntxiv has tas,

“Taagnrho Lwmtsaav Tuabneeg, mej cale qhuas tug Tswv;

txhua tsaav tuabneeg cale qhuas Nwg!” #Nnkauj 117:1

12Hab Yaxayas has ntxiv has tas,

“Ib tug ntawm Yexis caajceg yuav tshwm lug;

Nwg yuav kaav Lwmtsaav Tuabneeg,

hab puab yuav muab puab txuj kev casab tso plhuav rua Nwg.” #Yaxaya 11:10 (LXX)

13Thov Vaajtswv tug kws mej casab rua, pub kuas mej puvnpo txuj kev zoosab hab kev nyaabxeeb, vim mej ntseeg Nwg, sub mej txuj kev casab txhaj yuav luj zujzug ntxiv lug ntawm Vaaj Ntsujplig tug Dlawbhuv lub fwjchim.

Paulus Qha Txug Vim Lecaag Nwg Sau Tsaab Ntawv Nuav

14Cov kwvtij, kuv paub tseeb has tas mej yog cov kws puvnpo txuj kev zoo, puvnpo kev txawjntse, hab ib leeg muaj cuabkaav ntuag ib leeg. 15Tabsis qhov kws kuv muaj cuabkaav sau qee zaaj nyob huv tsaab ntawv nuav tuaj rua mej, yog kuv xaav rov has kuas mej ncu tej zaaj ntawd kuas zoo. Vim Vaajtswv txuj moovhlub kws Nwg tau pub rua kuv 16lug ua Yexus Khetos ib tug tubkhai, zoo ib yaam le ib tug povthawj hlub, kws qha Vaajtswv Txuj Moo Zoo rua Lwmtsaav Tuabneeg, kuas puab peemtsheej zoole tej khoom fij kws hum Vaajtswv sab, hab raug ntxuav kuas dlawbhuv lug ntawm Vaaj Ntsujplig tug Dlawbhuv.

17Vim kuv nyob rua huv Yexus Khetos, kuv txhaj muaj cuabkaav khaav txug tej dlejnum kws kuv ua rua Vaajtswv. 18Kuv yeej tsi muaj cuabkaav khaav ib yaam dlaabtsi le, tsuas yog tej kws Khetos tau siv kuv moog coj Lwmtsaav Tuabneeg lug ntseeg Vaajtswv, kws yog lug ntawm tej lug kws kuv qha hab tej dlejnum kws kuv ua, 19hab lug ntawm tej txujci tseemceeb, hab lug ntawm tej kws Vaajtswv tug Ntsujplig lub fwjchim tau ua lawm xwb. Yogle ntawd, kuv txhaj qha Txuj Moo Zoo kws has txug Khetos puvntoob huv lub nroog Yeluxalees moog txug rua peg lub nroog Ilelikus. 20Kuv yeej ibtxwm muaj lub homphaj has tas kuv xaav moog qha Txuj Moo Zoo rua cov chaw kws tsi tau muaj tuabneeg nov txug Khetos zaaj dlua le, sub kuv txhaj tsi moog tsaa tsev rua ntawm lwmtug lub quatsev. 21Lawvle Vaajtswv Txujlug has tas,

“Cov kws tsi tau muaj leejtwg qha txug Khetos zaaj rua puab le, puab yuav pum;

hab cov kws tsi tau nov dlua le, los puab yuav totaub.” #Yaxaya 52:15 (LXX)

Paulus Npaajsab Moog Saib Lub Nroog Loos

22Muaj ntau yaam pheej taabkaum kuv, kuv txhaj tsi tau tuaj saib mej. #Loos 1:13 23Tabsis nwgnuav kuv tub ua kuv tej dlejnum tav huv tej cheebtsaam nuav lawm, hab kuv yeej npaajsab lug tau ntau xyoo lawm has tas kuv yuav tuaj saib mej 24thaus kuv moog tim tebchaws Xapees. Kuv casab has tas thaus kuv tuaj ntawd, kuv yuav pum mej hab tau nrug mej nyob ib ntus, tomqaab ntawd, mej yuav tau paab xaa kuv moog rua tim tebchaws Xapees.

25Taamsim nuav kuv taabtom moog paab cov ntseeg kws nyob nraag lub nroog Yeluxalees. #1Klt 16:1-4 26Ruaqhov cov ntseeg kws nyob huv Makedaunias hab Akhayas tau txaussab muab mivntsiv nyaj xaa moog paab cov ntseeg txomnyem kws nyob nraag lub nroog Yeluxalees. 27Puab yeej txaussab hlo ua le ntawd; hab tseeb tag, yeej tsimnyog puab pauj cov tuabneeg kws nyob nraag txajntsig. Ruaqhov cov Yudais tub ca Lwmtsaav Tuabneeg tau lug nrug puab koom txuj koobmoov ntawm saab ntsujplig lawm, yogle ntawd, Lwmtsaav Tuabneeg yuav tau ua koobmoov ntawm saab nqajtawv paab rua cov Yudais hab. #1Klt 9:11 28Thaus kuv ua tegnum nuav tav hab nqaa cov nyaj nuav moog cob rua puab lawm, tes kuv yuav moog rua tim tebchaws Xapees, tabsis kuv yuav xub tuaj saib mej tsaiv. 29Kuv paub tas thaus kuv tuaj rua tim mej, kuv yuav tuaj nrug Khetos txuj koobmoov kws puvnpo.

30Cov kwvtij, lug ntawm peb tug Tswv Yexus Khetos hab lug ntawm Vaaj Ntsujplig txuj kev hlub, thov mej nrug kuv koom kuv txuj kev nyuajsab lug ntawm kev thov Vaajtswv paab rua kuv. 31Thov Vaajtswv paab kuas kuv tsiv dlhau ntawm cov tuabneeg tsi ntseeg Vaajtswv kws nyob huv lub xeev Yudas txhais teg, hab thov Nwg paab kuas tegnum kws kuv moog ua paab cov ntseeg kws nyob huv lub nroog Yeluxalees hum suavdlawg sab. 32Yog Vaajtswv pumzoo, kuv yuav tuaj saib mej ntawm txuj kev zoosab kawg nkaus, hab thaus kuv tuaj pum mej lawm, kuv yuav zoosab hab yuav tau su lugsav heev. 33Thov Vaajtswv tug kws pub tau kev nyaabxeeb rua peb, nrug mej txhua tug nyob. Amees.

Currently Selected:

Loos 15: HNJ2022

Highlight

Copy