Loos 13

Noog Tej Numtswv Lug

1Suavdlawg yuavtsum noog tej numtswv kws muaj meejmom lug, ruaqhov tej meejmom ntawd yog Vaajtswv pumzoo kuas muaj txhajle muaj, hab tej meejmom ntawd puavleej yog Vaajtswv ua tug kws rhawv. 2Yog leejtwg tawmtsaam tej meejmom tes yog nwg tawmtsaam yaam kws Vaajtswv tau tsaa muaj; tug kws ua le ntawd yog nwg rov rautxim rua nwg tugkheej xwb. 3Cov tuabneeg kws ua zoo yeej tsi ntshai numtswv, tabsis cov kws ua phem txhaj ntshai xwb. Koj puas xaav kuas koj yog tug kws tsi ntshai numtswv? Yogle ntawd mas koj yuavtsum ua zoo puab txhaj yuav qhuas koj, 4ruaqhov puab yog Vaajtswv tej tubkhai kws ua num kuas muajnqes rua koj xwb. Tabsis yog koj ua phem, mas yeej tsimnyog koj yuavtsum ntshai puab, ruaqhov puab yeej muaj fwjchim rautxim rua koj tag! Puab yog Vaajtswv cov tubkhai kws Vaajtswv khaiv lug rautxim rua cov tuabneeg ua phem. 5Yogle ntawd, mej yuavtsum noog tej numtswv kws muaj meejmom lug, tsi yog vim mej ntshai nyobtsaam Vaajtswv rautxim rua mej xwb, tabsis vim mej lub sab yeej qha has tas mej yuavtsum noog puab lug.

6Vimle ntawd, mej txhaj yuavtsum tau them se, ruaqhov Vaajtswv yog tug has kuas tej numtswv ua tej dlejnum ntawd ntaag. #Math 22:21; Malak 12:17; Lukas 20:25 7Mej tshuav leejtwg nqe, mej yuavtsum them rua puab kuas taag: yog mej tshuav se laj se teb, se vaaj se tsev, se nyajtxag kws mej khwv tau lug, los mej yuavtsum them tej se ntawd huvsi; mej yuavtsum fwm hab saib taug txhua tug numtswv huv tuabsi.

Ib Leeg Hlub Ib Leeg

8Mej tsi xob tshuav leejtwg nqe, tuabqhov nujnqes kws mej tshuav tes yog ib leeg hlub ib leeg xwb; tug kws hlub lwmtug, yog nwg tub ua lawvle txuj Kevcai lawm. 9Tej kevcai qha has tas, “Tsi xob dleev luas quaspuj luas quasyawg; tsi xob tua tuabneeg; tsi xob ua tubsaab; tsi xob ntshaw luas tug”; taagnrho cov kevcai nuav hab lwm nqai kevcai, tau muab sau zog lug ua ib nqai has le nuav tas, “Hlub koj tug kwvtij zejzog ib yaam le koj hlub koj tugkheej.” #Tsiv 20:14; 2Kev 5:18; Tsiv 20:13; 2Kev 5:17; Tsiv 20:15; 2Kev 5:19; Tsiv 20:17; 2Kev 5:21; Levi 19:18 10Yog koj hlub lwmtug, koj yeej tsi ua phem rua puab ib zag le; yogle ntawd, kev hlub yog kev coj ua lawvle txuj Kevcai.

11Mej yuavtsum ua le nuav, ruaqhov mej tub paub lawm has tas tub txug lub sijhawm kws mej tsim huv nruab dlaabndlub lug lawm. Ruaqhov nwgnuav txuj kev cawmdlim lug ze peb dlua thaus kws peb nyavnyuas lug ntseeg lawm. 12Montuj tub yuav dlhau moog, nruabnub tub yuav tawm tuaj. Yogle ntawd, ca peb muab tej dlejnum montuj tsotseg, es cale muab tej cuabyeej nruabnub lug tuav. 13Peb yuavtsum ua peb lub neej kuas tsimnyog qhov kws peb yog tuabneeg nruabnub: tsi xob qw ua nqaaj ua nqug hab qaugcawv, tsi xob ua nkauj ua nraug hab ua le dlev le npua, tsi xob siscaav sistshe hab siskhib. 14Tabsis yuavtsum muab tug Tswv Yexus Khetos tej cuabyeej lug tuav; hab tsi xob quavntsej txug saab nqajtawv tej kev ntshaw hlo le.

Currently Selected:

Loos 13: HNJ2022

Highlight

Copy