Kalatias 2

Paulus Hab Lwmtug Timthawj

1Kaum-plaub xyoos tomqaab ntawd, kuv nrug Npananpas rovqaab moog rua huv lub nroog Yeluxalees. Kuv kuj coj Titus nrug kuv moog hab. #Tegnum 11:30; 15:2 2Kuv moog vim Vaajtswv tau lug qha rua kuv has tas kuv yuavtsum tau moog. Kuv moog saablaaj nrug cov thawjcoj ntsagtu rua ib qho, kuv txhaj pav Txuj Moo Zoo kws kuv tau moog qha Lwmtsaav Tuabneeg lawm rua puab noog. Kuv ua le nuav, ruaqhov kuv tsi xaav kuas tegnum kws kuv ua, tsi has yaav taag lug lossis najnub nwgnuav cale taag dlawb taag dlo moog.

3Titus tug kws nrug kuv moog uake ntawd, nwg txawm yog tuabneeg Kilis los tsi muaj leejtwg yuav muab nwg yuam ua kevcai txav, 4txawm le ntawd los tseem muaj qeetug tuabneeg xaav kuas nwg ua kevcai txav hab. Puab cov nuav uatxuj tuaj has tas puab yog cov ntseeg, kuas puab nkaag tau lug rua huv peb paab, tabsis yog puab xaav tuaj soj saib seb vim lecaag peb cov ntseeg Yexus Khetos ho muaj kev ywjpheej. Puab xaav ntxag kuas peb ua puab qhev, 5tabsis peb yeej tsi kaam ua lawvle puab qha ib nyuas qhov le, sub qhov tseeb ntawm Txuj Moo Zoo txhaj yuav nrug tau mej nyob moog le.

6Tabsis cov tuabneeg kws puab has tas puab yog cov thawjcoj, txawm yog puab yuav nyob lub meejmom twg lug lawm los xij, tej ntawd tsi muaj qaabhau dlaabtsi rua kuv; ruaqhov Vaajtswv yeej tsi xaiv leejtwg ntsejmuag, cov thawjcoj ntawd yeej ntxiv tsi tau ib yaam dlaabtsi rua kuv le. #2Kev 10:17 7Yeej tsi yog le ntawd, puab pum tas Vaajtswv tau muab tegnum kws moog qhuabqha txug Txuj Moo Zoo rua Lwmtsaav Tuabneeg kws tsi ua kevcai txav ntawd rua kuv ua, ib yaam le Vaajtswv tau muab tegnum kws moog qhuabqha Txuj Moo Zoo rua cov tuabneeg Yudais kws ua kevcai txav rua Petus ua. 8Vaajtswv tsaa kuv ua ib tug timthawj rua Lwmtsaav Tuabneeg lecaag, Vaajtswv tau tsaa Petus ua ib tug timthawj rua cov tuabneeg Yudais ib yaam le ntawd hab.

9Yakaunpaus, Petus, hab Yauhaas puab cov kws yog thawjcoj nreg suavdlawg, puavleej paub tas Vaajtswv tub muab tegnum tshwjxeeb ntawd rua kuv ua lawm; puab txhaj tuav kuv hab Npananpas wb saab teg xis, ua lub cim qha has tas peb txhua tug yuav sis koomteg ua dlejnum. Peb txhaj pumzoo has tas ca Npananpas wb moog qha Lwmtsaav Tuabneeg, hab ca puab qha cov tuabneeg Yudais. 10Qhov kws puab thov tes yog kuas wb ncuntsoov paab cov tuabneeg pluag kws nyob rua huv puab paab, qhov ntawd tub yog qhov kws kuv yeej ibtxwm ua lug lawm.

Paulus Tshev Petus Huv Aati-aukias

11Thaus Petus tuaj rua huv Aati-aukias, kuv tau taabmeeg nrug nwg siscaav, ruaqhov kuv yeej pum meej tas nwg tau ua tsi yog lawm. 12Uantej thaus Yakaunpaus tseem tsi tau khaiv tuabneeg tuaj, Petus yeej nrug Lwmtsaav Tuabneeg kws ntseeg Vaajtswv noj mov uake. Tabsis thaus puab cov ntawd tuaj txug lawm, Petus txawm cale tsi nrug Lwmtsaav Tuabneeg noj mov uake lawm, ruaqhov nwg ntshai cov kws qha has tas Lwmtsaav Tuabneeg yuavtsum tau ua kevcai txav. 13Cov Yudais kws ntseeg Vaajtswv muaj qeeleej cale pib nrug Petus coj tug yaamntxwv kws ntaus sab yau le ntawd; txawm yog Npananpas los kuj cale yuamkev coj tug yaamntxwv zoole puab hab.

14Thaus kuv pum tas puab tsi ua lawvle qhov tseeb kws Txuj Moo Zoo tau qha, kuv txhajle has rua Petus taabmeeg puab suavdlawg has tas, “Koj yog tuabneeg Yudais, tabsis koj moog ua le Lwmtsaav Tuabneeg ua, koj tsi ua le koj yog tuabneeg Yudais lawm. Ua lecaag koj tseem yuam kuas Lwmtsaav Tuabneeg ua le cov tuabneeg Yudais ua hab?”

Cov Yudais Hab Lwmtsaav Tuabneeg Yog Dlim Lug Ntawm Txuj Kev Ntseeg

15Peb yeej yog tuabneeg Yudais, peb tsi yog “Lwmtsaav Tuabneeg kws muaj txim” le kws luas tej hu puab. 16Tabsis peb paub tas tug tuabneeg kws Vaajtswv suav has tas ncaajnceeg tsi yog tug kws coj lawvle Kevcai has, tabsis yog tug kws ntseeg Yexus Khetos. Txawm yog peb los kuj ib yaam nkaus le ntawd, qhov kws Vaajtswv suav has tas peb yog tuabneeg ncaajnceeg tub yog vim peb ntseeg Khetos, tsi yog vim peb coj lawvle txuj kevcai. Ruaqhov yeej tsi muaj leejtwg kws Vaajtswv yuav suav has tas nwg ncaajnceeg vim nwg coj lawvle txuj kevcai. #Nnkauj 143:2; Loos 3:20; Loos 3:22

17Thaus peb ua kuas peb yog tuabneeg ncaajnceeg rua huv Khetos, peb maamle pum tas peb yog tuabneeg txhum ib yaam nkaus le Lwmtsaav Tuabneeg hab; qhov nuav puas has tau has tas Khetos yog tug kws txhawb txuj kev txhum? Tsi yog le ntawd! 18Yog kuv tseem rovqaab moog khu yaam kws kuv tub muab rhuav lawm, tes kuv rov qha rua kuv has tas kuv yog tug kws ua txhum kevcai. 19Ruaqhov nyob rua huv txuj Kevcai ntawd tes kuv tub tuag lawm, sub kuv txhaj ua tau kuv lub neej pub rua Vaajtswv. Kuv tub raug muab ntsa nrug Khetos rua sau tug ntoo khaublig lawm, 20yogle ntawd, tug kws tseem cajsa nuav tsi yog kuv, tabsis yog Khetos tug kws nyob rua huv kuv. Qhov kws nwgnuav kuv ua neej nyob yog kuv ntseeg Vaajtswv tug Tub, tug kws tau hlub kuv hab muab Nwg txujsa lug txhwv kuv. 21Kuv yeej tsi novqaab Vaajtswv txuj moovhlub. Yog tuabneeg tseem ncaajnceeg tau lug ntawm qhov kws ua lawvle txuj Kevcai hab, tes txhais tau has tas qhov kws Khetos tuag ntawd yeej tsi muajnqes dlaabtsi le.

Currently Selected:

Kalatias 2: HNJ2022

Highlight

Copy