Kalatias 1

1Kuv yog Paulus, kws yog Vaajtswv ib tug timthawj. Qhov kws kuv tau ua Vaajtswv ib tug timthawj, tsi yog tuabneeg lossis yog ib lub koomhum ntawm saab nqajtawv twg tsaa kuv ua, tabsis yog Yexus Khetos hab Vaajtswv kws yog peb Leejtxiv tug kws tau tsaa Yexus sawv huv qhovtuag rovqaab lug tsaa kuv ua. 2Cov kwvtij ntseeg kws nrug kuv nyob, puab puavleej xaa lug nojqaab nyobzoo tuaj rua cov pawg ntseeg kws nyob huv Kalatias:

3Thov Vaajtswv kws yog peb Leejtxiv hab tug Tswv Yexus Khetos pub txuj moovhlub hab kev nyaabxeeb rua mej.

4Khetos muab Nwg txujsa lug txhwv peb lub txim, kuas peb dlim ntawm tej kev phem kws nyob rua tam nuav. Qhov kws Nwg ua le ntawd yog lawvle peb tug Vaajtswv kws yog Leejtxiv lub sab nyam. 5Thov kuas Vaajtswv tau koobmeej moog ibtxhab ibtxhis le! Amees.

Tsuas Muaj Tuab Txuj Moo Zoo Xwb

6Kuv xaav tsi thoob rua mej le, has tas uacaag tuabplag xwb mej cale muab Vaajtswv tug kws tau hu mej lug ntawm Khetos txuj moovhlub#1:6: Khetos txuj moovhlub; tej phoo ntawv qub kws xuas teg sau, muaj lug ntawm Nwg txuj moovhlub. ntawd tsotseg hab cale moog txais yuav lwm zaaj kws tsi yog Vaajtswv Txuj Moo Zoo. 7Qhov tseeb tag yeej tsi muaj “lwm Txuj Moo Zoo,” le. Kuv has le nuav ruaqhov muaj qeeleej ua rua mej ntxhuvsab, hab puab xaav hloov Yexus Khetos Txuj Moo Zoo. 8Txawm has tas yog peb lossis yog ib tug timtswv ceebtsheej kag, lug qha lwm zaaj rua mej kws txawv Txuj Moo Zoo kws peb tub xub qha rua mej lawm, tes kuas tug ntawd raug poob moog rua huv ntujtawg! 9Yaav taag lug peb tub has rua mej lawm, nwgnuav los kuv rov has dlua ib zag rua mej has tas, yog leejtwg tuaj qhuabqha lwm zaaj rua mej kws txawv Txuj Moo Zoo kws mej tub ntseeg lawm, tes kuas tug ntawd raug poob moog rua huv ntujtawg!

10Kuv has le nuav puas yog kuv has kuas tuabneeg qhuas kuv? Tsi yog le ntawd! Qhov kuv xaav tau yog kuas Vaajtswv txaussab rua kuv xwb! Puas yog kuv xaav kuas tuabneeg nyam kuv? Yog kuv tseem ua le ntawd, tes kuv yeej yuav ua tsi tau Yexus Khetos ib tug tubqhe.

Qhov Kws Paulus Tau Lug Ua Ib Tug Timthawj

11Cov kwvtij, kuv xaav qha rua mej paub tas Txuj Moo Zoo kws kuv qha nuav tsi yog has txug tuabneeg. 12Kuv yeej tsi tau kawm zaaj nuav ntawm leejtwg, lossis yeej tsi tau muaj tuabneeg qha zaaj nuav rua kuv le, tabsis tug kws muab zaaj nuav nthuav qha rua kuv yog Yexus Khetos.

13Mej tub nov txug kuv lub neej yaav taag lug thaus kws kuv tseem coj cov Yudais txuj kevcai, has tas kuv tsimtxom cov ntseeg Vaajtswv npaum lecaag hab xaav muab cov ntseeg ua kuas puamtsuaj taag huv tuabsi. #Tegnum 8:3; 22:4-5; 26:9-11 14Thaus kuv tseem coj cov Yudais txuj kevcai, peb cov kwvtij Yudais kws nrug kuv ib phaum, mas kuv yog tug kws ua tau tshaaj hab yog tug kws coj tau peb cov yawmkoob tej kevcai nruj dlua suavdlawg. #Tegnum 22:3

15Tabsis nyob rua huv Vaajtswv txuj moovhlub, Nwg tub xaiv kuv ca thaus nruabthab lug lawm, hab hu kuas kuv lug ua Nwg tegnum. #Tegnum 9:3-6; 22:6-10; 26:13-18 16Vaajtswv pumzoo qha Nwg tug Tub rua kuv paub, sub kuv txhaj moog qha tau Txuj Moo Zoo kws has txug Nwg tug Tub rua Lwmtsaav Tuabneeg. Kuv tsi tau moog nrug ib tug tuabneeg twg tuavxaam tswvyim 17lossis moog rua sau lub nroog Yeluxalees, es moog ntsib cov kws tub xub ua timthawj uantej kuv. Tabsis taamsim ntawd kuv cale moog rua tebchaws Alanpias hab dlhau ntawd tes kuv rovqaab moog rua huv lub nroog Damaxakas. 18Peb lub xyoos tomqaab ntawd kuv maamle moog saib Petus huv lub nroog Yeluxalees hab nrug nwg nyob tau kaum-tsib nub. #Tegnum 9:26-30 19Kuv yeej tsi pum lwmtug timthawj le, tsuas pum Yakaunpaus#1:19: lwmtug timthawj le, tsuas pum Yakaunpaus; lossis lwmtug timthawj le, tug kws kuv pum tes tsuas yog Yakaunpaus nkaus xwb. kws yog tug Tswv tug kwv xwb.

20Tej kws kuv sau tuaj rua mej nuav yog kuv has qhov tseeb xwb. Vaajtswv paub tas kuv yeej tsi dlaag mej!

21Tomqaab ntawd kuv txhaj moog rua tej cheebtsaam kws nyob huv lub xeev Xilias hab Kilikias. 22Thaus ntawd cov ntseeg kws nyob huv lub xeev Yudas, puab tseem tsi tau paub kuv meej pistsawg. 23Puab tsuas nov tej kws lwmtug has tas: “Tug tuabneeg kws thaus u txeev tsimtxom peb, nwgnuav nwg ho qhuabqha txug txuj kev ntseeg kws yaav taag lug nwg tau npaajsab yuav muab ua kuas puamtsuaj moog!” 24Yogle ntawd, puab txhaj ua Vaajtswv tsaug rua tej kws Nwg tau ua nyob rua huv kuv.

Currently Selected:

Kalatias 1: HNJ2022

Highlight

Copy