Kalatias 3

Kevcai Lossis Kev Ntseeg

1Cov tuabneeg Kalatias kws ruag! Leejtwg txawmsiv ua khawvkoob mooj tau mej lawm? Mej lub qhovmuag tub pum kag meej-meej txug qhov kws Yexus Khetos tau raug ntsa rua sau ntoo khaublig lawm. 2Mej sim qha ib qhov rua kuv seb: qhov kws mej tau txais Vaajtswv tug Ntsujplig ntawd yog vim mej coj lawvle txuj Kevcai los yog vim mej noog hab ntseeg Txuj Moo Zoo? 3Uacaag mej yuav ruag ualuaj le! Mej pib lug ntawm Vaajtswv tug Ntsujplig, tabsis nwgnuav mej ho yuav xaus lug ntawm saab nqajtawv nua lov? 4Txhua yaam kws mej tau raug lug lawm, txawm tsi muaj qaabhau rua mej le lov? Yeej muaj los sav! 5Qhov kws Vaajtswv pub Vaaj Ntsujplig rua mej hab ua tej txujci tseemceeb rua mej pum, yog vim mej coj lawvle txuj kevcai los yog vim mej noog hab ntseeg Txuj Moo Zoo?

6Kuas mej xaav txug Anplahaas lub neej; Vaajtswv Txujlug has tas, “Nwg ntseeg Vaajtswv, tub yog vim nwg txuj kev ntseeg ntawd Vaajtswv txhaj suav has tas nwg yog tug kws ncaajnceeg.” #Chiv 15:6; Loos 4:3 7Yogle ntawd, kuas mej totaub has tas tsuas yog cov tuabneeg kws ntseeg Vaajtswv xwb txhaj yog Anplahaas caajceg tag. #Loos 4:16 8Vaajtswv Txujlug tub xub has tseg lawm has tas, lug ntawm txuj kev ntseeg, Vaajtswv yuav coj Lwmtsaav Tuabneeg lug nrug Vaajtswv sis raugzoo, hab Vaajtswv tub xub qha Txuj Moo Zoo rua Anplahaas uantej has tas, “Lug ntawm koj, Vaajtswv yuav foom koobmoov rua txhua tsaav tuabneeg.” #Chiv 12:3 9Vim Anplahaas ntseeg Vaajtswv, Vaajtswv txhaj foom koobmoov rua nwg; yogle ntawd, txhua tug kws ntseeg Vaajtswv yuav tau koobmoov ib yaam le Anplahaas hab.

10Cov tuabneeg kws vaamkhom qhov kev coj lawvle txuj Kevcai, yog cov kws raug foom phem, ruaqhov Vaajtswv Txujlug has tas, “Yog leejtwg tsi ua lawvle txhua nqai kws sau ca rua huv phoo Kevcai, tes tug ntawd tub raug Vaajtswv foom phem lawm.” #2Kev 27:26 (LXX) 11Yogle ntawd, peb paub tseeb has tas tug kws coj lawvle txuj Kevcai, tsi yog tug kws Vaajtswv suav has tas ncaajnceeg, ruaqhov Vaajtswv Txujlug has tas “Tsuas yog tug kws ncaajnceeg rua Vaajtswv lug ntawm txuj kev ntseeg xwb txhaj tau txujsa.”#3:11: ncaajnceeg rua Vaajtswv lug ntawm txuj kev ntseeg xwb txhaj tau txujsa; lossis ncaajnceeg rua Vaajtswv txhaj tau txujsa vim nwg txuj kev ntseeg. #Hanpa 2:4 12Tabsis txuj Kevcai tsi yog has txug kev ntseeg. Vimle ntawd, Vaajtswv Txujlug txhaj has tas, “Yog leejtwg coj lawvle tej Kevcai ntawd has txhua nqai, tug ntawd yuav tau txujsa.” #Levi 18:5

13Qhov kws Khetos lug ris peb tej kev raug foom phem, tub yog Nwg lug txhwv kuas peb dlim ntawm txuj Kevcai kws tau raug foom phem lawm; ruaqhov Vaajtswv Txujlug has tas, “Tug kws raug dlai rua sau ntoo, tug ntawd tub raug foom phem lawm.” #2Kev 21:23 14Khetos ua le ntawd sub qhov koobmoov kws Vaajtswv tau coglug rua Anplahaas lawm txhaj yuav ndlwg ntawm Yexus Khetos moog rua Lwmtsaav Tuabneeg, hab vim peb txuj kev ntseeg, peb txhaj yuav tau txais Vaaj Ntsujplig lawvle Vaajtswv tau coglug tseg lawm.

Txuj Kevcai Hab Cov Lug Cogtseg

15Cov kwvtij suavdlawg, ca kuv muab ib qhov yaamntxwv kws peb najnub ua lug rua peb saib. Yog tas muaj ob leeg tau has hum ua ib yaam dlaabtsi hab tau suamnpe ca lawm, yeej tsi muaj leejtwg yuav rhuav tau lossis yuav ntxiv tau ib yaam dlaabtsi rua. 16Zagnua, Vaajtswv tub coglug rua Anplahaas hab nwg tug xeebntxwv lawm. Vaajtswv Txujlug tsi tau siv lulug kws has tas, “cov xeebntxwv,” kws yog has txug coob leej, tabsis Vaajtswv Txujlug siv lulug kws has tas, “xeebntxwv,” kws has txug tuableeg, kws yog Khetos xwb. 17Lub ntsablug kws kuv has yog le nuav: Vaajtswv tau coglug tseg rua Anplahaas lawm, mas Vaajtswv yeej yuav ua lawvle Nwg lulug cogtseg ntawd. Vaajtswv tub coglug tseg tau 430 xyoo lawm, maamle muaj txuj kevcai. Yogle ntawd, txuj Kevcai yeej yuav rhuav tsi tau hab hloov tsi tau Vaajtswv lulug cogtseg. #Tsiv 12:40 18Yog qhov koobmoov kws Vaajtswv yuav muab rua peb ntawd tseem yog ua lawvle txuj Kevcai xwb, tes kuj tsi yog muab lawvle lulug cogtseg. Tabsis Anplahaas tau txais Vaajtswv txuj koobmoov yog lawvle qhov kws Vaajtswv tau coglug tseg lawm. #Loos 4:14

19Yogle ntawd, tseem yuav muaj txuj Kevcai ua dlaabtsi hab? Qhov kws muaj txuj Kevcai ntawd lug ntxiv, tub yog xaav qha kuas tuabneeg paub tas kev txhum yog dlaabtsi, hab txuj Kevcai ntawd tsuas nyob moog txug thaus Anplahaas tug xeebntxwv kws Vaajtswv tau coglug tseg lawd lug txug xwb. Txuj Kevcai ntawd yog cov timtswv ceebtsheej muab rua ib tug kws yog tug cevlug rua suavdlawg. 20Tabsis tsi taag yuav muaj tug cevlug, yog tas tegnum ntawd tsuas muaj tuableeg ua xwb; tug ntawd yog Vaajtswv.#3:20: tug ntawd yog Vaajtswv; lossis Vaajtswv tuableeg ua xwb.

Lub Homphaj Ntawm Txuj Kevcai

21Qhov nuav puas txhais tau has tas txuj Kevcai ntawd tawmtsaam Vaajtswv tej lug cogtseg? Yeej tsi yog le ntawd kag le! Yog muaj ib txuj kevcai kws ua rua tuabneeg muaj txujsa tau, tes txhua tug kws ua lawvle txuj kevcai ntawd yeej yuav muaj kev ncaajnceeg rua ntawm Vaajtswv xwb. 22Tabsis Vaajtswv Txujlug has tas lub nplajteb nuav nyob huvqaab fwjchim ntawm txuj kev txhum; kuas txhua tug kws ntseeg txhaj yuav tau txuj koobmoov kws Vaajtswv tau coglug tseg has tas Vaajtswv yuav muab pub rua cov kws ntseeg Yexus Khetos.

23Uantej kws txuj kev ntseeg tseem tsi tau lug txug peb, txuj Kevcai yeej muab peb khi zoole tej tuabneeg raug txim lug txug rua thaus kws txuj kev ntseeg nuav tau tshwmsim lug. 24Yogle ntawd, txuj Kevcai nuav txhaj kaav peb lug txug lub sijhawm kws Khetos lug, sub peb txhaj ua tau tuabneeg ncaajnceeg rua Vaajtswv vim yog txuj kev ntseeg. 25Nwgnuav txuj kev ntseeg tub lug txug peb lawm, yogle ntawd txuj Kevcai txhajle tsi kaav peb ntxiv lawm.

26Mej txhua tug yog Vaajtswv cov mivnyuas, vim mej ntseeg Yexus Khetos. 27Mej tub ua kevcai rausdlej rua huv kev koomxeeb nrug Khetos lawm, yog yuav muab has tes, mej tub muab Khetos lub neej coj lug naav zoole cev khaubdluag lawm. 28Yogle ntawd, yeej tsi txawv txaav dlaabtsi le, txawm yog cov Yudais lossis Lwmtsaav Tuabneeg, cov kws ua qhev lossis cov kws nyob ywjpheej, quaspuj lossis quasyawg, mej suavdlawg puavleej yog ib tug kws koomxeeb nrug Yexus Khetos. 29Yog mej nyob rua huv Khetos, tes mej yog Anplahaas caajceg, hab mej yuav tau txais tej kws Vaajtswv tau coglug tseg lawm has tas nwg yuav muab pub rua mej.

Currently Selected:

Kalatias 3: HNJ2022

Highlight

Copy