Efexus 2

Dlim Ntawm Kev Tuag Lug Tau Txujsa

1Yaav taag lug mej saab ntsujplig tub tuag lawm, vim mej txuj kev tsi nooglug hab txuj kev ua txhum. 2Thaus ntawd mej tseem nyam ua ib yaam le tej tuabneeg kws nyob huv nplajteb nuav ua; hab mej ua lawvle tug ntsujplig kws kaav sau nruabntug qha mej, kws yog tug ntsujplig dlaab kws nwgnuav kaav cov tuabneeg tsi noog Vaajtswv lug. 3Qhov tseeb, yaav taag lug peb los zoo nkaus le puab hab, kws yog ua lub neej lawvle saab nqajtawv txuj kev ntshaw; peb ua txhua yaam lawvle peb lub cev hab peb lub sab nyam ua. Yogle ntawd, Vaajtswv yeej yuav rautxim rua peb ib yaam le Vaajtswv rautxim rua lwmtug lug ntawm Nwg txuj kev chim.

4Tabsis Vaajtswv txuj kev taabncuab luj heev, hab Nwg hlub peb kawg nkaus le. 5Txawm yog peb tub tuag ntawm saab ntsujplig vim peb tsi noog Vaajtswv lug lawm los, Vaajtswv tseem pub peb rov muaj txujsa nrug Khetos hab. Qhov kws mej dlim ntawd tub yog vim Vaajtswv txuj moovhlub nkaus xwb. #Kaulx 2:13 6Vim peb koomxeeb nrug Yexus Khetos, Vaajtswv txhaj tsaa peb nrug Nwg sawv rovqaab lug hab nrug Nwg kaav sau ntuj ceebtsheej. 7Tej kws Vaajtswv ua ntawd yog Nwg qha kuas yaav tomntej suavdlawg paub txug Nwg txuj moovhlub luj kawg nkaus kws tsi muaj ib yaam dlaabtsi yuav pev tau, kws Nwg tau ua rua peb nyob huv Yexus Khetos.

8Qhov kws mej dlim yog vim Vaajtswv txuj moovhlub, kws lug ntawm txuj kev ntseeg; tsi yog lug ntawm mej tug peevxwm, tabsis yog Vaajtswv cale pub rua mej xwb. 9Nwg tsi yog mej tug dlaag tug zug ua, sub txhaj tsi muaj leejtwg khaav tau. 10Peb yog cov kws Vaajtswv txhais teg puab. Vaajtswv tsim peb nyob rua huv Yexus Khetos kuas lug ua tegnum zoo kws Vaajtswv tub xub npaaj tseg ca rua peb ua lawm.

Koom Uake Rua Huv Khetos

11Mej cov kws tsi yog tsaav tuabneeg Yudais, kuas mej ncuntsoov tas yaav taag lug cov Yudais hu mej hu ua “cov kws tsi ua kevcai txav” tabsis puab hu puab has tas puab yog “cov kws ua kevcai txav” (kws yog yaam tuabneeg txhais teg ua rua tuabneeg lub cev). 12Ncuntsoov tas lub sijhawm ntawd, mej nyob dleb ntawm Yexus Khetos. Mej yog Lwmtsaav Tuabneeg, mej tsi yog cov kws Vaajtswv tau xaiv tseg. Mej tsi muaj feem koom nyob rua huv Vaajtswv tej lug cogtseg kws Nwg tau coglug rua cov tuabneeg kws Nwg tub xaiv tseg lawm, hab mej tsuas yog laam ua neej nyob huv nplajteb nuav xwb mej yeej tsi muaj chaw casab hab yeej tsi muaj Vaajtswv le. 13Txawm yog yaav taag lug mej nyob nrug dleb los xij, nwgnuav mej tub tau lug nyob rua huv Yexus Khetos lawm. Qhov kws mej tau lug le ntawd tub yog vim Yexus Khetos cov ntshaav#2:13: vim Yexus Khetos cov ntshaav; lossis vim Yexus txuj kev tuag. xwb.

14Ruaqhov Khetos tub coj txuj kev sis humxeeb lug rua peb, kws yog coj cov Yudais hab Lwmtsaav Tuabneeg lug ua tau ib paab lawm. Lug ntawm Nwg cev nqaj dlaim tawv, Nwg tau muab saab phaabntsaa kws ua rua muaj kev sisfaib hab kev ua yeebncuab ntawd rhuav povtseg lawm. 15Nwg tau muab cov Yudais tej Kevcai kws puab qha hab tej kws puab txwv rhuav huvsi, sub Nwg txhaj tsim tau ib paab tuabneeg tshab tawm huv ob paab tuabneeg ntawd lug nrug Nwg sis raugzoo; ua le ntawd txhaj muaj kev sis humxeeb. #Kaulx 2:14 16Khetos txuj kev tuag sau ntoo khaublig ua rua Nwg rhuav tau puab txuj kev ua yeebncuab; coj tau puab lug ua ib paab, hab coj tau puab rov lug cuag Vaajtswv. #Kaulx 1:20 17Khetos tau lug qhuabqha Txuj Moo Zoo kws yog has txug kev sis humxeeb rua suavdlawg, suav taagnrho mej cov kws yog Lwmtsaav Tuabneeg kws nyob nrug dleb Vaajtswv hab cov Yudais kws nyob ze Vaajtswv huv tuabsi. #Yaxaya 57:19 18Tsuas yog lug ntawm Khetos xwb, peb suavdlawg nrug rua cov Yudais hab Lwmtsaav Tuabneeg, txhaj muaj cuabkaav moog cuag tau Vaajtswv, ruaqhov peb puavleej koom Vaajtswv tuabtug Ntsujplig.

19Yogle ntawd, mej cov kws yog Lwmtsaav Tuabneeg, mej tsi yog Lwmtsaav Tuabneeg lossis tsi yog tuabneeg txawv teb txawv chaw ntxiv lawm, nwgnuav mej nrug Vaajtswv tsaav tuabneeg koom teb koom chaw hab mej yog Vaajtswv tsev tuabneeg lawm. 20Vaajtswv tsaa mej rua sau lub quatsev kws cov timthawj hab cov xwbfwb cev Vaajtswv lug tub ncaws ca lawm.#2:20: lub quatsev kws cov timthawj hab cov xwbfwb cev Vaajtswv lug tub ncaws ca lawm; lossis lub quatsev, kws yog cov timthawj hab cov xwbfwb cev Vaajtswv lug. Tug ncej zeb kws txheem lub tsev ntawd yog Yexus Khetos ntaag. 21Yexus yog tug kws txheem taagnrho lub tsev ntawd kuas khov hab ua kuas lujhlub, txhajle tau ib lub tuamtsev kws dlawbhuv zoo kawg nkaus rua Vaajtswv. 22Vaajtswv taabtom muab mej txhua tug kws koomxeeb nrug Nwg lug ua ib lub tsev rua Vaajtswv tug Ntsujplig nyob.

Currently Selected:

Efexus 2: HNJ2022

Highlight

Copy