Efexus 3
3
Paulus Teg Dlejnum Kws Ua Paab Rua Lwmtsaav Tuabneeg
1Tub yog vimle nuav kuv, kws yog Paulus, tug kws raug kaw rua huv tsev lojcuj vim kuv ua Yexus Khetos tegnum paab mej cov kws yog Lwmtsaav Tuabneeg, kuv txhaj thov Vaajtswv paab mej. 2Mej yeej nov meej-meej lawm has tas Vaajtswv tug kws muaj txuj moovhlub tau muab tegnum nuav rua kuv ua paab mej. 3Vaajtswv tau qha tej kws Nwg muab zais ca lawm rua kuv paub. (Kuv tub sau mivntsiv has txug zaaj nuav lawm, 4yog mej nyeem tej kws kuv tau sau ntawd, mej yuav paub tas kuv totaub lecaag txug Yexus Khetos zaaj kws tau muab zais ca lawm.) 5Yaav taag lug yeej tsi tau muab zaaj nuav qha rua leejtwg paub le, tabsis nwgnuav Vaaj Ntsujplig tub qha rua cov timthawj kws dlawbhuv hab cov xwbfwb cev Vaajtswv lug lawm. 6Zaaj kws tau muab zais ca ntawd yog qha has tas, lug ntawm Txuj Moo Zoo, cov kws yog Lwmtsaav Tuabneeg muaj feem nrug cov Yudais tau txais Vaajtswv tej koobmoov ib yaam nkaus. Ob paab puavleej zwm rua tuablub cev, hab suavdlawg puavleej yuav tau tej kws Vaajtswv coglug tseg lawm has tas Nwg yuav pub rua cov kws ntseeg Yexus Khetos. #Kaulx 1:26-27
7Kuv tau raug tsaa lug ua ib tug tubkhai qha Txuj Moo Zoo, tub yog vim Vaajtswv txuj koobmoov kws Nwg tau muab rua kuv, kws yog Nwg lub fwjchim kws taabtom ua dlejnum nyob rua huv kuv. 8Txawm yog kuv yog tug kws muaj fwjchim yau dlua txhua tug kws muaj fwjchim yau kawg nkaus huv Vaajtswv tsaav tuabneeg los Vaajtswv tseem muab teg dlejnum qha Txuj Moo Zoo kws has txug Yexus Khetos txuj koobmoov kws tsi paub xaus rua kuv coj moog qha Lwmtsaav Tuabneeg hab, 9kuas suavdlawg pum meej-meej tas Vaajtswv yuav ua lecaag rua tegnum kws Vaajtswv tau muab zais ca lawm kuas tav. Vaajtswv tug kws tsim txhua yaam huv tuabsi tau muab zaaj ntawd zais ca ib txheej dlhau rua ib txheej lug lawm, 10sub najnub nwgnuav cov timtswv ceebtsheej hab cov kws muaj fwjchim kaav sau ntuj txhajle paub txug txhua yaam kws yog Vaajtswv lub fwjchim ua nyob rua huv pawg ntseeg. 11Tej kws Vaajtswv ua nuav yog lawvle Vaajtswv lub homphaj kws Nwg tub xub npaaj tseg thaus u lug; lub homphaj ntawd tau ua tav nyob rua huv peb tug Tswv Yexus Khetos. 12Lug ntawm qhov kws peb koomxeeb nrug Khetos hab lug ntawm peb txuj kev ntseeg Nwg, peb txhaj muaj kev ruajsab hab muaj cuabkaav moog cuag tau Vaajtswv. 13Yogle ntawd, kuv thov kuas mej tsi xob qaugzug vim qhov kws kuv raug kev txomnyem paab mej; qhov kws kuv raug le nuav yog ua kuas muajnqes rua mej xwb.
Khetos Txuj Kev Hlub
14Tub yog vimle nuav kuv txhaj txhuscaug ndlua ntawm Leejtxiv lub xubndlag, 15tug kws txhua tsev tuabneeg sau ntuj ceebtsheej hab huv nplajteb nuav hu has tas, Leejtxiv. 16Kuv thov Vaajtswv tug kws muaj koobmoov nplua-mag pub fwjchim rua mej lug ntawm Nwg tug Ntsujplig kuas mej muaj lub sab tawv, 17hab kuv thov kuas Khetos lug nyob huv mej lub sab lug ntawm txuj kev ntseeg. Kuv thov Vaajtswv paab kuas mej cog caag kuas ruaj-khov rua huv txuj kev hlub, 18sub mej hab Vaajtswv tsaav tuabneeg txhua tug txhaj yuav muaj peevxwm totaub has tas Yexus Khetos txuj kev hlub dlaav lecaag, ntev lecaag, sab lecaag hab tub lecaag. 19Hab kuas mej paub Nwg txuj kev hlub kws tub tshaaj le qhov kws tuabneeg yuav paub txug, sub mej txhajle yuav puvnpo Vaajtswv tug yaamntxwv.
20Peb cale ua Vaajtswv tsaug, ruaqhov Vaajtswv lub fwjchim kws ua dlejnum nyob huv peb lub sab, muaj peevxwm ua tau ntau tshaaj le tej kws peb thov hab tej kws peb xaav. 21Thov kuas Vaajtswv tau koobmeej nyob huv pawg ntseeg hab nyob huv Yexus Khetos ib tam rua ib tam, moog taag ibtxhab ibtxhis le! Amees.
Currently Selected:
Efexus 3: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
