Itorati 11
11
Uyupalhe wa Apwiiya Nlhuku
1“Wo yoyo nlhatu uyo etu, mwaattuneke Apwiiya Nlhuku inyu, ni uvarechesha malheheriyo ni iamuri chaya mahuku onkhaye. 2Lhelho muupuwelheke rata ittu yiittuchilhe inyu ukhuma wa Apwiiya Nlhuku. Mwiireke chiicho ukhalhawaya achishaana inyu, khachuwenlhe wala khayoonilhe ntwarusho wa Apwiiya Nlhuku, wooria waya ni machiri aya, 3ithikineeha chaya ni cho ushangiha chaya, chaapannge wa Nafarao amwene o Umisri ni ilhapo aya yonkhaye. 4Mwahoona chaapangenlhe aya miphingo cho attu o Umisri, vamoka ni afarasi ni mikukuta chaya cho ikhoto, wo utitimerihiya mbaharini Ushamu, ni chenre aya wo waalhakalhiha attu ottwarani utulhi alhe. 5Tho, muupuwelheke chittu chaapannge aya Apwiiya Nlhuku uwannyu, uthakoni ulhe vaari inyu nhinaaya uphiya vaa. 6Mwaatti muupuwelheke ni chittu chaapangenlhe aya Nadathani ni Naabiramu, achishaana a Naeliabu, aari anaaya Narobeni, ilhapo vaapatakuwilhe aya ni waamiria vamoka ni ashilhoko aya, maheema aya, ashinama aya ni akarumiya aya onkhaye, attu o Israeli onkhaye oonaka. 7Wo ikekhiaye, mwaatti mwahoona wo miitho inyu mitheko chonkhaye chulhupalhe chi, chaapangachilhe aya Apwiiya Nlhuku.
Ibarakha cho ilhapo ilheehiye
8“Nrumelhelheke iamuri chonkhaye chinoovahaakani lhelho chi, wiira mwoorie ukelha ni ukhalhelha ilhapo inolhukama inyu, 9wiira mwalhokelhe mahuku menchi yeyo ilhapo yorera ulhima ni uhuwelha mihuwo iyo. Ilhapo yaalhehilhe aya Apwiiya Nlhuku waavaha manyaapwiiya inyu ni iyari chaya. 10Ukhalhawaya ilhapo inokelha inyu ukhalhelha khiri thoko ilhapo yo Umisri ukhumilhe inyu uwo, waalhimilhe inyu choolhia ni upanga ntheko mulhupalhe wo umichera maashi imata chiyo. 11Nansho ilhapo inorwaa inyu ukhalhelha iyo, phi ilhapo yo miako ni yo makoote, ilhapo inotapwihiya ni ipulha yo wiirimu, 12ilhapo Apwiiya Nlhuku inyu inoshunga aya. Apwiiya Nlhuku anoowehaweha yeyo ikatema chonkhaye, toka nchokholha iyaakha mpaka mmalha iyaakha.
13“Paahi, mwavarecheshaka iamuri chaka, chinovahaakani lhelho chilha, ni waattuna Apwiiya Nlhuku inyu, ni uvara ntheko aya wo nrima winyu wonkhaye ni wo nnepa winyu wonkhaye, 14anoorupiha ipulha ilhapo inyu ikatema aya yaayaka, ntipashilhe ni iyitha, ni inyu nnoruweriacha choolhia chinyu, idivai inyu ni makhura inyu. 15Anoomelhiha manyashi mmamatani mwinyu cho ulhiha mihuwo chinyu, ni inyu chiicho nnokoolhia ni urupalhacha. 16Mwiishungeke, mirima chinyu chihiwe chaathepiachiya, nkamwaarukunuwa ni ukavihera mitheko cho milhuku chikina ni uthimicha, 17Mwapangaka chiicho, urushiya wa Apwiiya Nlhuku unouthepelhani. Anoottuka irimu wiira ipulha ihirupe, ilhapo inowuuma ni uhiya umelha mikoko chaya, ni inyu nnookhwacha, inakhalhaka ilhapo yorera inoovaha ayani Apwiiya Nlhuku iyo yorera chinene.
18“Nshungeeheke malhove aka alha mmamirimani mwinyu ni mmaminepani mwinyu. Nttukelheke mmiononi mwinyu thoko ithuphu ni uwara vayuchi winyu, wo uwupushani. 19Mweettuchiheke achishaana inyu alha malhove alha ikatema vanohalha inyu ukhalha mmanupani, kila vanorwaa inyu munkwahani, ama kila vanorwaa inyu urupani, ni kila vanonkwa inyu. 20Nlhepacheke alha malhehero alha vachulhu milhako cho inupa chinyu, ni vachulhu milhako cho ukelha mmawani mwinyu, 21wiira mwaatti ni achishaana inyu nlhokelhe mahuku menchi, aalhenhe aya Apwiiya Nlhuku inyu, wiira anowaavaha manyaapwiiya inyu, mahuku onkhaye irimu vanohalha aya ukhalha vachulhu ilhapo.
22“Mwarumelhelhaka ni uvarechesha iamuri chonkhaye chinouvahaakani chi, wiira mwaattune Apwiiya Nlhuku inyu, ni uttwara iphiro chaya chonkhaye ni waalhutaana, 23paahi Apwiiya Nlhuku anowoomolhacha makosho onkhaye ayo umihoolho winyu, ni inyu nnookhalhelha ilhapo yo makosho molhupalhe ni o machiri upwahani mwaatti. 24Kila vakittu vanohalha inyu unyikalha wo mieto chinyu vanookhalha vawinyu, ilhapo inyu inoowanelha ukhuma uthakoni, mpata wo uchawa, mpaka miako cho Ulebanoni, mpata wo uchulhu, ni ukhuma mwoolhoko wo Yufrati urii unosha nchuwa, mpaka ibahari yo Umediteraniya, uneelha nchuwa. 25Khaawo ntu riyoothe nohalha wooria uchiichihani. Vakittu variwoothe vanohalha inyu urwaa uwo, Apwiiya Nlhuku inyu, anowoopopiha attu wiira oove, thoko chinre aya wo ulhehera.
26“Mmweheke, lhelho kinouvahani nipesha no uthanlha, variyari wo ibarakha ni ulhaviya, 27ibarakha yakhalhaka nnoovarechesha iamuri cha Apwiiya Nlhuku inyu, anouvahaakani lhelho alha, 28ni nnoolhaviya mwaahirumelhelheke iamuri chinolhehera aka chi, ni uhiya iphiro chaya, nkamwaathimicha milhuku chikina chihinapacha inyu uchuwelha. 29Apwiiya Nlhuku vanohalha aya upiihani ilhapo inokelha inyu ukhalhelha iyo, nnokoohimiacha ibarakha ukhuma mwaako wo Ugerizimu, ni ulhaviya ukhuma mwaako wo Uebali. 30Chechiyo miako chiyo chiri ukhopelhelhe mwoolhoko wo Uyorodani, uneelhelha nchuwa ilhapo ya attu o Ukanaani, anokhalhacha Uaraba, vakhiviru ni Ugilgali. 31Nnoolhapuwa mwoolhoko wo Uyorodani wiira nkelhe mwakhalhelhe ilhapo inouvaha ayani Apwiiya Nlhuku inyu. Paahi, vanohalha inyu ukelha wowo ni ukhalhelha ilhapo iyo, 32mwakhalheke rata ni uvarechesha iamuri ni malhehero anouvahaakani lhelho alha.
Currently Selected:
Itorati 11: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
