Itorati 10
10
Ashinna Musa anoopochera iamuri malhehero khumi tho
(Utt 34:1-10)
1“Tho, Apwiiya Nlhuku nkayaakiirelha wiira, ‘Nhemeke ivibau piilhi cho malhuku thoko cho mpacho chilhe, ni nsanduku no imbau no uthokoreria ivibau chiyo, mwamalhihaka mmweeke uri aka umwaakoni uno. 2Ni mii kinoolhepa vachulhu ivibau chiyo, malhove aalhepiye vachulhu ivibau choothakanche inyu chilhe, yamalhaka nthokorerieke munsandukuni mmo.’
3“Paahi kahokoorosha nsanduku no imbau cho mwiri wo nsonobari ni ivibau piilhi cho malhuku thoko cho mpacho chilhe, nkakaavarelha mmathathani nkakaawelhana umwaakoni. 4Apwiiya Nlhuku nkayaalhepa vachulhu ivibau chiyo malhove thoko aalhempe aya mpacho alhe, iamuri khumi choovanhe ayani voolhumanche aya ukhumehelha vamooroni nihuku no uthukumaniya umwaakoni nne. Amalhihekeru, Apwiiya Nlhuku ahokivaha ivibau chiyo, 5nkakaarukunuwa ni ukhuruwa ukhuma umwaakoni thoko Apwiiya Nlhuku chenre aya wo ukilheehera. Nkakeesha ivibau chiyo munsandukuni mmo thoko Apwiiya Nlhuku chenre aya wo ukilheehera, ni chiyo chiri mwommo.”
6Attu o Israeli aheeta nkwaha wo ukhuma ulhushi wa attu o Uyakaani mpaka Umosera. Vavawo Naharuni ahorihiaa, nkayaavithiya. Naeleazari anaya ayo, ahokhalhelha ihiche aya ni ukhalha phi opochera ishaani. 7Ukhuma wowo, yahorwaa mpaka Ugudgoda, ni ukhuma Ugudgoda ahorwaa mpaka Uyoth Batha, ilhapo yo mashepa menchi o maashi. 8Yeyo ikatema iyo Apwiiya Nlhuku ahaathanlha attu o nikosho ni Alawi akhalhe phi attu o utwiichira Nsanduku no Malhehano a Apwiiya Nlhuku, avare ntheko wo ukhalha opochera ishaani ni o waavaha attu ibarakha mpaka lheho va. 9Phi nhatu etu attu o nikosho ni Alawi khayaapante nipuro no uhiyeriya mwiilhaponi, yayo vamoka ni ashilhoko aya. Ittu iponchere aya iri phi nthimicho wo ukhalha attu opochera ishaani a Apwiiya Nlhuku, thoko Apwiiya Nlhuku inyu chinre aya wo ulheha.
10Yamalheke, ashinna Musa ahothepa uhimia wiira, “Kahokhalha umwaakoni uwo mahuku makhumi ncheshe uthana ni uhiyu, thoko chenre aka mpacho valhe. Apwiiya Nlhuku ahokiiwelhelha tho, ni urumelhelha wiira khanowiivakachani. 11Tho, ahokiirelha wiira, ‘Nthameke nthepeke urwaa nkwaha inyu mwaaholhelhaka attu, wiira oorie ukelha ni ukhalhelha ilhapo yaalhupenlhe aka manyaapwiiya inyu wiira kinowaavaha.’ ”
12“Vano inyu mwaatti attu o Uisraeli, Apwiiya Nlhuku inyu, ittu anothanana aya phi ilha: Mwaathimicheke ni uttwara iphiro chaya chonkhaye. Mwaattuneke wo mirima chinyu chonkhaye ni wo minepa chinyu chonkhaye, 13nrumelhelheke iamuri ni malhehero aya, alha anouvahaakani lhelho alha, wo nlhatu winyu mwaashinene. 14Mwooneke, irimu ata irimu cho uchulhu chinene phi chawaya Apwiiya Nlhuku inyu, ilhapo ni chittu chonkhaye chiriwo chawaya. 15Tho, Apwiiya Nlhuku ahaattuna chinene manyaapwiiya inyu, nkayoothanlhani mwaatti ukhalha achishaana aya, vakittu va attu akina onkhaye thoko chiri aya lhelho va. 16Paahi etu toka lhelho, mwaarumelhelheke Apwiiya Nlhuku, nhikhalhe tho attu o itiyamaru. 17Ukhalhawaya Apwiiya Nlhuku inyu, phi Nlhuku o milhuku ni Athithi a manyaathithi inyu. Yayo phi Nlhuku mulhupalhe o machiri, ni o woopiha, khanommweha ntu wiitho, ni wala khanopochera irushwa. 18Anowaalhoha rata achishaana ohiiya, manyanankhwelhi ni alheto, phi naavaha yolhia ni ikuwo. 19Paahi etu, mwaattuneke alheto ni waakhalhana rata, ukhalhawaya ni inyu mwaatti mwaari alheto chiicho, Umisri. 20Mwaarumelhelheke Apwiiya Nlhuku inyu, mwaathimicheke yayo vekha aya. Nvareke mitheko chaya, mwaalhutaaneke ni ulhupelha wo uromolha nchina naya. 21Mwaashipeke yayo, yayo phi Nlhuku inyu oopangenlheni chittu chulhupalhe ni cho woopiha chonne inyu wo miitho inyu mwaashinene chi. 22Manyaapwiiya inyu vaarwelhe aya Umisri, yaari attu makhumi saba. Nansho vano Apwiiya Nlhuku inyu, ahoupangani mwaatti ukhalha attu enchi thoko ittotwa cho wiirimu.
Currently Selected:
Itorati 10: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
