Itorati 12
12
Vakittu vo yekha aya vo unlhapelha Nlhuku
1“Anottwara alha phi iamuri ni malhehero anohalha inyu utimiriha wiilhaponi unokelha inyu, uvahiye inyu ni Apwiiya Nlhuku inyu wiira ikhalhe yawinyu, mahuku inyu onkhaye o ulhokelha winyu vachulhu ilhapo va. 2Wowo mwaphomolhacheke kabisaa mapuro onkhaye unolhapelha aya attu milhuku chaya, vachulhu miako cho urekama ni miako chikani ni mmitholhoni. 3Mwaphomolhacheke madhubahu aya, ni uharariacha mapoto aya. Mwapahacheke mooro isinyago chaya cha nlhuku nthiyana Ashera, ni uparulhacha isinyago chihemanche aya, ni urihelha utayi, wiira nchina naya nihithimichiye tho vavawo vakittu vawo.
4“Ni mena nhaathimiche Apwiiya Nlhuku inyu wo iphiro thoko chinopanga aya yayo attu ayo, wa nlhuku aya. 5Nansho mwarweeke vakittu vanohalha uthanlhiya ni Apwiiya Nlhuku inyu, mmakoshoni mwonkhaye wiira attu awaache ni uthimicha nchina naya vavawo vakittu vawo. 6Wowo phi nohalha inyu urweeha isadaka chinyu cho upahiya vamooroni, ni isadaka chikina cho waavaha Apwiiya Nlhuku, izaka chinyu, isadaka cho uttuna winyu ni cho mattara anohalha uyariya ni ing'ope, ipuri ni ikhondoro chinyu. 7Wowo mwalhieke umihoolho wa Apwiiya Nlhuku inyu, ni uteelhiya nrima mwaatti vamoka ni attu o mmawani mwinyu, wo nlhatu no chittu chivaheriye inyu ni Apwiiya Nlhuku inyu.
8“Yeyo ikatema iyo yaayakaru, nhiwe mwaapanga thoko chinopanga ihu vano, kila ntu nothimicha wo iphiro chinothanana awe mwanene, 9ukhalhawaya khannaaya ukelha mapuro o wiittuwelha winyu ni vakittu vanokelha inyu uvahiya ni Apwiiya Nlhuku inyu, nkhalhe wo mpuha. 10Nansho vanohalha inyu ulhapuwa mwoolhoko wo Uyorodani ni ukhalha mwiilhaponi unokelha inyu uvahiya ni Apwiiya Nlhuku inyu, wiira ukhalhe wawinyu, ni vanowa inyu wiittuwihiya, nhiwe mwaahuvihachiya ni amalhaponi onkhaye anohalha urukureriani wiira nkhalhache rata. 11Paahi etu wowo, vakittu Apwiiya Nlhuku inyu unohalha aya uthanlha wiira nchina naya nikhalhe wowo, phi vavawo etu vanohalha inyu urweeha kila ittu inoolheheraakani, yaani isadaka chinyu cho upahiya vamooroni, ni isadaka chikina cho waavaha Apwiiya Nlhuku, izaka chinyu, ni isadaka choopenlhe inyu ishaani wiira nnookumiha wa Apwiiya Nlhuku. 12Wowo nnokooteelhiya mirima umihoolho wa Apwiiya Nlhuku inyu, mwaattiva vamoka na achishaana inyu ashilhopwana ni ashithiyana ni akarumiya inyu ashilhopwana ni ashithiyana, ni Alawi anokhalhacha munlhokoni mwinyu, ukhalhawaya kharina ilhapo aya ashinene munlhokoni mwinyu. 13Mweeshungeke rata nhikelhe mwakumiha isadaka chinyu cho upahiya vamooroni vakittu variwoothe vanohalha inyu woona, 14nansho vakittu vanohalha aya uvahani Apwiiya Nlhuku. Vavawo phi vakittu vanohalha inyu ukumiha isadaka chinyu cho upahiya vamooroni ni upanga chittu chikina cholhehenreakani wiira mpange.
15“Nansho mwaatti nhohiyeriya wiira mwaahitheke ni waakhura ashinama inyu vakittu variwoothe vanothanana inyu, ukhalha phi ibarakha cha Apwiiya Nlhuku inyu, chuvahenreayani. Attu onkhaye anorumelhelhiya umihoolho wa Apwiiya Nlhuku ama ahinorumelhelhiya, akhuureke chechiyo inama chiyo, thoko chinokhuura inyu inama cha anaahe ama cho ipaalha. 16Nansho nhilhie iphome yo yayo ashinama ayo, mwarihelheke iphome aya iyo vathi thoko maashi. 17Tho nhilhelhie mmanupani nnokhalhacha inyu mmo, chi chittu chinottwara chi: Isadaka cho milhipu cho choolhia chinyu, wala yo idivai inyu, ama yo makhura inyu o izeituni, wala cho mattara o ing'ope chinyu, ama o ikhondoro chinyu, ama o ipuri chinyu, ama isadaka chittukenlhe inyu ishaani, ama isadaka chinyu cho uttuna winyu mwaashinene, ama isadaka chikina. 18Nansho mwalhelhieke umihoolho wa Apwiiya Nlhuku inyu, vakittu vanohalha aya uthanlha Apwiiya Nlhuku inyu ayo vawo. Mwalhieke mwaattiva vamoka ni achishaana inyu ashilhopwana ni achishaana inyu ashithiyana, akarumiya inyu ashilhopwana ni ashithiyana, ni Alawi anokhalha mmawani mwinyu. 19Tho, chonte nhikelha mwaalhiyalha Alawi mahuku onkhaye anohalha inyu ukhalha mwiilhaponi mwinyu.
20“Apwiiya Nlhuku inyu vanohalha aya ukhanulha ilhapo inyu thoko chenre aya wo ulheha, ni inyu nkamweera, ‘Ninothanana ukhuura inama, ukhalhawaya mirima chihu chinoothanana ukhuura inama,’ mwakhuureke etu inama thoko chiriyoothe chinohalha inyu uthanana. 21Paahi etu, vakittu vanohalha aya Apwiiya Nlhuku inyu uthanlha wiira nipuro no uthimichelhiya, vavawo phi nohalha inyu uhitha ing'ope ama ikhondoro iriyoothe ivahiye inyu ni Apwiiya Nlhuku, thoko chinre aka wo ulheherani, ni inyu mwalhieke thoko chinothanana inyu, mmawani mwinyu. 22Ntu riyoothe norumelhelhiya umihoolho wa Apwiiya Nlhuku, ama hinorumelhelhiya, nowooria ukhuura yeyo inama iyo thoko chinokhuura inyu inama yo naahe ama yo ipaalha. 23Nansho chonte nhikelha mwalhia iphome, ukhalhawaya iphome phi ukumi, paahi etu nhilhie ukumi vamoka ni inama. 24Nhilhie iphome iyo, nansho nrihelheke vathi thoko maashi. 25Nhilhie iphome, ni inyu nnoovaheriya vamoka ni iyari chinyu, ukhalhawaya nnoopanga ittu yoombone umihoolho wa Apwiiya Nlhuku. 26Mwakusheke chittu chitakatifu chinohalha inyu ukumiha ni isadaka chinyu cho ishaani, ni urweeha vakittu vanohalha aya uthanlha Apwiiya Nlhuku. 27Vavawo mwakumiheke isadaka cho upahiya vamooroni, inama ni iphome umadhubahuni wa Apwiiya Nlhuku inyu. Mwarihelheke vathi vamadhubahuni wa Apwiiya Nlhuku inyu, iphome yo mwannama iyo, nansho inama nhohiyeriya, nkhuureke. 28Mwiishungeke ni uvarelha alha malhove kinoulheheraakani alha, wiira nvaheriye mwaattiva vamoka ni achishaana inyu anowa, wo mahuku o uhimalha, ukhalhawaya nnowa mwaapanga morera ni yo teelhiha umihoolho wa Apwiiya Nlhuku inyu.
Waamukiya mwaha wo ulhapelha isinyago
29“Apwiiya Nlhuku inyu, amalhihaka ukakhelha utayi makosho o umihoolho winyu, makosho anokelha inyu woomolhacha ayo ni waakumiha, nkamwaakhalha mwiilhaponi mwaya, 30mweeshungeke nhiwe mwaawaya wo nlhatu no waattwara, baada yo uthamihiya umihoolho winyu mwaashinene mwoonaka. Nhikelhe mwakohakoha wo uthanana uchuwelha mwaha wa milhuku chaya, mwiiraka, ‘Alha makosho alha anre chani wo uthimicha milhuku chaya? Wiira ni hii nithimiche thoko chiicho.’ 31Nhikelhe mwaathimicha Apwiiya Nlhuku inyu, thoko chiicho, ukhalhawaya kila nrusho nihinottuna aya Apwiiya Nlhuku, yayo attu ayo ahopangacha wo milhuku chaya, ata ahaapahacha vamooroni achishaana aya ashilhopwana ni ashithiyana wiira aakumihe isadaka wo milhuku chaya chiyo.
32“Nshungerereke ni upanga kila ittu ilhehenre aka uwannyu, nhuncherere ittu ama nhiwukulhe ittu.
Currently Selected:
Itorati 12: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
