Mátiyu 10

Ndụ-ishi-ozhi iri l'ẹbo

(Mak. 3:13-19; Luk. 6:12-16)

1Ọo ya bụ, Jisọsu kua ụmadzu iri l'ẹbo ono l'etso ụzo iya tẹ whẹ byakfuta iya. Ọ bya ezhi whẹ tẹ whẹ gudeje ike chịfuje ọgvu, mẹe tẹ whẹ mejee iwhe bụ ndu ẹhu, dụ-gee iche iche l'emekaa tẹ whẹ mehu, mẹe ndu ẹhu mmaanụ ọdo, dụ iche iche l'emekaa tẹ whẹ mehukota. 2Ẹwha ndụ-ishi-ozhi ono whẹ iri l'ẹbo bụ:

onye nke mbụ bụ Sáyịmonu, bụ iya bẹ l'eekuje Pyita,

mẹe nwune iya Ánduru,

mẹe Jémusu nwa Zébedi,

mẹe nwune iya Jọnu Zébedi,

3mẹe Fílipu,

mẹe Batólomiyu,

mẹe Tọ́mosu,

mẹe Mátiyu onye l'ana akịriko,

mẹe Jémusu Álufiyọsu,

mẹe Tádiyọsu,

4mẹe Sáyịmonu ọwhu tso l'ọgbo l'adzọ tẹ alị ndu Ju dụru ndu Ju,

mẹe Júdasu Isukáriyọtu, bụ iya megeeru nọdu lẹ mgbazhi t'e gude Jisọsu.

Jisọsu l'ezhi ndụ-ishi-ozhi tẹ whẹ jee ozhi

(Mak. 6:7-13; Luk. 9:1-6)

5Ọ bụru ndụ-ishi-ozhi iri l'ẹbo-ọ bẹ Jisọsu zhiru tẹ whẹ je ekfua okfu Chileke. Nteke l'oozhi whẹ ozhi-ọma b'o kfuru whẹ iya rwụa whẹ iya arwụ lẹ nchị sụ whẹ: “T'unu ba abahụkwa ibe ndu l'ẹte abụa ndu Ju, unu ta abahụ lẹ mkpụkpu ndu Samériya. 6Iwhe unu l'e-me bụkwa t'unu tụgbulekwaruwho jekfu ndu Ízurẹlu ono bụ ndu dụ g'ọo ụnwu atụru tuwhashihuru etuwhashihu. 7Unu je ezhia whẹ sụ whẹ agha: ‘Chileke l'abyaakwaa egoshi l'ọo ya bụ eze.’ 8Unu emekwaawho ndu ẹhu l'eme tẹ whẹ mehu. Unu emee ndu nwụhuru anwụhu tẹ whẹ teta nọdu ndzụ. Unu emekwaawho ndu njọkirehu l'eme tẹ whẹ mehu t'a sọ-buhu whẹ nsọ, unu achịa ọgvu l'ẹhu ndu ọwhu ọgvu bu l'ẹhu. A nụru iya unu ẹwoma. O nokwawho g'unu l'a-nụ iya ndu ọdo ẹwoma. 9Unu be eyekwa okpoga l'ẹkpa uwe unu. 10T'unu be egudekwa ẹkpa l'ije unu ono, t'unu be eyekwa uwe nkwere labọ. Unu ba achịkwa akpọkpa ọdo nke iche, unu te egude oshi-o-gude-l'ẹka. O noo nkele ọo onye seru ese b'ọ gbarụ t'o rijee iwhe o seru anya iya.

11“Iwhe bụ mkpụkpu m'ọ bụ uwhu-mba unu bahụjeru, unu vujeru ụzo leeda ẹnya onye l'e-kweta t'unu bata. Onye natarụ unu, t'unu bulekwaruwho l'ibe iya. Unu be ejekwa obuwhe l'uwhu l'uwhu, unu bupyabekwa l'uwhu ọbu jeye nteke unu l'a-fụta l'ibiya ọwhu ọbu. 12Uwhu bụ-zhia uwhu, unu bahụjeru, t'unu vujekwaru ụzo kele whẹ ekele sụ whẹ: ‘T'ẹhu ọdu guu dụkwa unu.’ 13Nteke ọ dụ ndu ono ree mbụ abyabya unu byarụ, ọo ya bụ ekele ẹhu ọdu guu, unu keleru whẹ adụru whẹ lẹ ree. Ọle nteke bụ l'abyabya unu byarụ ta adụdu whẹ ree, ekele ẹhu ọdu guu unu keleru whẹ alwawhuru unu azụ. 14Ọle onye jịkaru t'unu ba abatashịru iya l'uwhu, jịkafua lẹ ya ta angabẹdu nchị l'okfu Chileke unu l'ekfu, unu -lụfudekwa l'ibe onye ono, ọbu lẹ mkpụkpu ono, t'unu jịshikwaa udzu-ẹja dụ unu l'ọbochi-ọkpa gude goshi whẹ l'ẹka unu lụfuakwaru iya. 15Ọle tẹ mu mekwaa ya t'o doo unu ẹnya ree: gẹ l'ọo-nwụru ndu alị Sódomu mẹe ndu Gọmóra l'e-gbekwaa bụru iwhe ahata amamẹ lẹge l'ọo-dụ obodo ono mbọku ikpe.

Mkpamẹhu, l'abya nụ

(Mak. 13:9-13; Luk. 21:12-17)

16“Unu lekwa! L'unu dụakwa g'ọo ụnwu-atụru, mu chịakwaru unu ye t'unu jeshia ẹka ágụ́ jiru eji. Ọo ya bụ, t'unu malẹkwaruwho mmamagụ gẹ agwọ l'amajẹ iya. Unu adụ odoo g'ọo ndo. 17Ọle t'unu zejekwaaru ndiwhe. O noo lẹ whẹ l'e-gudeshi unu kpụ-jeru ndu ikpe, e chia unu iwhe l'ụlo-ndzuko lile, whẹ nwe enwe. 18O noo ya, ya abụru l'iswi ẹhu mụbe Jisọsu bẹ l'ee-kwobe kpụkata unu bya edobe l'iwhu ndu ọ-chị-ọha mẹe l'iwhu ndu eze, nnta gẹ l'ee-shi t'unu kfuaru whẹ okfu ẹhu mụbe Jisọsu, kfukwaaru iya whọ ndu l'ẹte abụa ndu Ju. 19Ọle nteke whẹ gudeshiru unu, t'unu ba achịkwa uche l'ẹka nke iwhe unu l'e-kfu ọdua l'ọo g'unu l'e-dobe ọnu kfua ya kpefu onwunu. O noo lẹ oge iya -rwulewho, bẹ iwhe unu l'e-kfu l'a-gbabataa unu l'ọnu. 20O noo l'ọ tọ bụdu unubẹdua l'ekfu okfu ono, ọo Ume Chileke, mbụ Chileke ono bụ Nna unu ono, bu l'ime unu l'ekfu iya.

21“Sụa, nwune l'a-gbakwarụ nwune iya ye t'e gbua, nna agbarụ nwa iya ye t'e gbua, ụnwu madzụ awata okwefuru ndu nwụru whẹ nụ ike, bya emee t'a kpụta whẹ gbushia. 22Madzụ lile l'e-kwobe nke l'ọo l'unu bụ ndu nke mu kpọ unu ashị. Ọle onye dụ ike taa nshi nọpyabe mu l'ẹka jeye l'ikpazụ bẹ Chileke l'a-dzọfutalekwaa. 23Unu -bahụkwa lẹ mkpụkpu lanụ, whẹ -kpaa unu ẹhu, t'unu hakwaa mkpụkpu ọwhu ọbu tụgburu jeshia lẹ mkpụkpu ọdo. Ọle iwhe mu l'eme tẹ mu kfuru unu bụ l'unu te ejekotagekwa mkpụkpu lile dụkota l'alị Ízurẹlu l'owhu, tẹ Abụbu-Ndiwhe bẹka abyaa.

24“Onye l'anwụ iwhe l'ẹka onye l'ezhije iwhe ta akajẹkwa onye ono l'ọonwu iwhe l'ẹka iya onwe ẹnya, ọ kwarụ nno bụ gẹ nwozhi l'ẹte akajẹ onye nwe iya nụ shii. 25T'onye l'anwụ iwhe l'ẹka onye l'ezhije iwhe makwarụwho l'ọo-dakfukwa iya who lẹge ọ dakfuru onye ọbu l'ezhi iya iwhe, ya adakfukwawho nwozhi g'ọ dakfuru onye nwe iya nụ. Ọ -bụru l'ọo onye nwe ụlo bẹ whẹ kuru Biyélezebọbu, o chia nụ ndibe iya bẹ whẹ l'ẹte akadụ nụ anọ ekfubyishi.

Onye unu l'a-tsụje egvu

(Luk. 12:2-7)

26“Ọo ya bụ, t'unu ba atsụjekwa madzụ egvu. L'ọ tọ dụkwa iwhe e kpuchiru ekpuchi, l'ete emekochaa kpuhaa, tọ hẹ l'ọ dụ-zhia iwhe e domiru edomi, l'ete emekochaa madzuru. 27Iwhe mu kfuru unu l'ẹkpuroochi bẹ unu l'e-kfu l'iwhoro, iwhe unu nụru l'ẹka l'aadzụ iya lẹ ndzụdzuka, t'unu jekwa aryaa ya aryarya t'onyenọnu nụ-dzuru iya. 28Unu ba atsụkwa ndu bụ ogwẹhu mmaanụ bẹ whẹ l'a-dụ ike gbua egvu, mbụ ndu bụ, whẹ -gbugewaa ogwẹhu, whẹ eje adụhe ike gbua maa onye ọbu. Onye unu l'a-tsụje egvu bụ onye ono, bụ; o -gbugee egbu, ya enwekwaruwho ike l'oo-gude mee ogwẹhu onye ọbu yẹle maa ya, ya abụru iyi l'ọku-alị-maa. 29?Tọ bụnua peni lanụ bẹ l'eereje ọchi-l'igwe labọ? Ọle ọ tọ hẹkwanu m'ọo l'ọdu m'ọo nnanụ ọwhu l'adarwuje alị, m'ọ -bụa l'ọo uche Nna unu ono. 30Mbụkwa ẹgbushi, dụ unu l'ishi b'ọ gụkotakwaru ọgu nnanụ nnanụ. 31Ọo ya bụ, t'unu ba atsụshi egvu, l'unu ka mkpa karụ igweligwe ọchi-l'igwe.

Ọnodu l'edzudzu-ọha ekfu l'a bụ nke Kuráyisutu

(Luk. 12:8-9)

32“Ọo ya bụ l'iwhe bụ onye kfụru l'edzudzu-ọha kfua l'iya bụ nke mụbe Jisọsu bẹ mu l'e-kfukwawho lẹ mu bụ nke onye ono l'iwhu Nna mu ono, bu l'imigwe. 33Ọle onye kfụru l'edzudzu-ọha kfua lẹ ya ta amadụ onye mụbe Jisọsu bụ, onye ono bẹ mu l'e-kfukwawho lẹ mu ta amadụ onye ọ bụ l'iwhu Nna mu bu l'imigwe.

Ọ tọ dụ nchị-ọdu-ndoo, ọo ogu-ịgba

(Luk. 12:51-53; 14:26-27)

34“Unu ba arịkwa l'iwhe mu byarụ bụ tẹ mu bya emee tẹ nchị dụ ndiwhe ndoo lẹ mgboko. Mu ta abyakwa ome tẹ nchị dụ ndoo. O gbechikwa bụru ọgu e gude ogu-ịgba alwụ bẹ mu byarụ eyeye. 35O noo l'iwhe mu byarụ bụ tẹ mu seta nwoke yẹle nwa iya ishi l'ishi bugba, seta nwata nwanyị yẹle ne iya ishi l'ishi bugba, seta nyee nwa madzụ yẹle niko iya ishi l'ishi bugba. 36Ndu l'e-gbee bụru ọgu swiru madzụ l'a-bụ ndu ọnu-ụlo onye ọbu gẹdegede.

37“O noo l'iwhe bụ onye ka oye ne iya obu, ọbu l'ọ ka oye nna iya obu karụ g'onye ọbu yeru iya mụbe Jisọsu te ekweshikwa ọbu onye nkemu. O nokwawho g'onye ka oye nwa iya nwoke obu, ọdua l'ọo nwa iya nwanyị l'ekweshikwaawho ọbu onye nkemu. 38Iwhe bụ onye l'ete evutaa oswebe ọnwu iya vuru etso mu te ekweshikwa ọbu onye nkemu. 39L'iwhe bụ onye l'achọ tẹ ndzụ iya bụru iya urwu erita lẹ mgboko bẹ l'e-tuwha ndzụ iya. Ọle onye kwoberu iswi ẹhu mụbe Abụbu-Ndiwhe tuwhaa ndzụ iya l'e-nwe ndzụ tututu-mịmimi.

Obunggo

(Mak. 9:41)

40“Sụa iwhe bụ onye gude obu iya nata unu ree-ree-ree bẹ bụkwa mụbe Jisọsu bẹ onye ọbu gude obu iya nata ree-ree-ree. Onye gudekwanu obu iya nata mụbe Jisọsu ree-ree-ree bụkwa onye ono, zhiru mu nụ b'o gude obu iya nata ree-ree-ree. 41Iwhe bụ onye gude obu iya nata onye nkfuchiru Chileke ree-ree-ree, nke l'ọo l'onye ọbu bụ onye nkfuchiru Chileke bẹ Chileke l'e-bukwa obunggo, l'eebuje ndu nkfuchiru Chileke. Onye gudekwanu obu iya nata onye doberu onwiya chịriri ree-ree-ree, nke l'ọo l'onye ọbu doberu onwiya chịriri bẹ Chileke l'e-bukwawho obunggo, l'eebuje ndu dụ chịriri. 42Ọdo bụ l'iwhe bụ onye keru onye lanụ l'ụnwegirima-a mini, mbụ e -behukwaduru ọ -bụru m'ọo oku mini oyi lanụ, mbụ iwhe onye ọbu kwoberu kee ya mini ono bụru l'ọo l'ọ bụ nke mụbe Jisọsu, iwhe mu l'ekfuleruwho unu bụ l'onye ono bẹ Chileke bujekwa obunggo iya.”

Currently Selected:

Mátiyu 10: Ezaa

Highlight

Copy

Compare