Mátiyu 11

Ndu Jọnu baputizimu l'ezhi ozhi

(Luk. 7:18-35)

1Jisọsu zhigelewho ndu l'etso ụzo iya whẹ ụmadzu iri l'ẹbo ono iwhe, o shi l'ẹka ono gbashi je awata oozhi ozhi-ọma. Ọ tụko obodo g'obodo ha ezhi iya arya iya aryarya. 2Tọ dụ iya bụ lẹ Jọnu anọdu l'ụlo mkpọro l'ẹka ọ nọ, nụa eze iwhe Kuráyisutu ọbu l'emeshikaa. O ye ndu l'etso ụzo iya sụ tẹ whẹ je ajịta iya sụ iya: 3“?Ọo gụbedua bụ onye ọbu, l'abyanụ ọbu, tọo t'anyi leje ẹnya onye ọdo?”

4Jisọsu sụ ndu ono Jọnu zhiru ozhi ono sụ: “Unu je akọoru Jọnu iwhe lile-e, unu gude nchị unu anụkaa mẹe ọwhu unu gude ẹnya unu awhụkaa. 5Unu sụ iya lẹ ndu l'atsọ ìshì bẹ l'eeme tẹ whẹ whụlahaa ụzo, ndu ngvụru l'ejewaa ije, l'eeme ndu njọkirehu l'eme tẹ whẹ mehukota, ndu l'ada nkụchi l'anụwaa iwhe lẹ nchị, ndu nwụhuru anwụhu bẹ l'eemekwawho tẹ whẹ teta nọdu ndzụ. L'eezhi ndu ụkpa ozhi-ọma. 6Sụa, ẹhu-ụtso bụ nke onye ono mụbe Jisọsu l'ẹte abụa ụkfu akpọpyashi ọkpa.”

7Ndu ono Jọnu zhiru tụgbuleruwho ala, Jisọsu kfulahaaru igwe-ọha ono okfu ẹhu Jọnu sụ whẹ: “?Ọo gụnu bẹ unu jeru awhụwhu l'echi-ẹgu? ?Ọo ogọwa, whẹrewhere l'enwunga enwunga? 8?Ọ bụkwanuru gụnu bẹ unu jeru awhụwhu? ?Unu jeru t'unu je awhụ nwoke gbakụru onwiya ẹkwa, l'ama ụma? Unu lee lẹ ndu l'agbakụje onwowhe ẹkwa, l'ama ụma bụ ndibe ndu eze. 9Mbụ ?ọ hụnu gụnu kparụ iwhe unu lụfuderu? ?Unu jeru t'unu je awhụ onye nkfuchiru Chileke tọo gụnu? Ee! O noo iwhe unu jeru ndono. Ọle mu sụru unu; onye ono unu whụru bẹ gbekwa ka onye nkfuchiru Chileke nkajishi shinene. 10Ọo ya bụ onye ono Chileke kfuru okfu ẹhu iya l'ẹkwo Okfu Chileke sụ: ‘Lee onye ozhi mụbe Chileke, mu l'ezhi iya t'o vuru ghu ụzo je emechaaru ghu ụzo ghu.’ 11Iwhe mu l'eme tẹ mu kfuru unu bụ: l'ọ tọ dụkwa onye kabaa Jọnu baputizimu shii l'iwhe bụkota iwhe nwanyị nwụru anwụnwu. Ọle t'unu lenuwho l'onye e gbee sụ l'ọo ya bẹ ẹnya nkiya kagee ọlwa alị l'iwhe bụ ndu Chileke bụ eze whẹ bẹ ka Jọnu shii. 12Eshi nkeshi nteke Jọnu baputizimu byarụ byeye ntaa, bẹ Chileke shilekwawho goshita l'ọo ya bụ eze, ndu ọhogu iya shi nkeshi ono meta tẹ whẹ gude ikike-ọkpu kpọshia ya, ndu ọkpehu l'eme tẹ whẹ gude ikike-ọkpu wukfuta iya. 13O noo l'iwhe bụ okfu ndu nkfuchiru Chileke kfukotaru g'ọ ha mẹe iwu shi l'ẹka Mósisu bẹ shizhiawho kpata ẹka mata l'abụbu ono, Chileke bụ eze byeyegekwaa l'oge nke Jọnu. 14Ọo ya bụ, nteke bụ l'ọ -dụ unu uwhere ekweta, unu ekweta. Ọ kwa Jọnu bẹ bụ Eláyija ọbu e kfuru l'ọo-bya ọbu. 15Onye ụzo-nchị dụ t'ọ nụkwa iya whọ!

16“Ọle ọbu ?o zhia gụnu bẹ mu l'a-sụ lẹ ọgbo elenu-a dụ g'ọo ya? Whẹ dụlewho g'ọo ụnwegirima, dọru l'ọma aswa, ekuje ibe whẹ oku, ekfu eyeru whẹ asụje: 17‘Anyi whụru unu opu, unu te ekwe ote egvu; anyi gụa ọgu-ẹkwa, unu te ekwe tsọo áwhụ.’ 18O noo lẹ Jọnu bẹ byarụ nụ, tọ dụ iwhe l'ookweje eriri, t'ọ ngụje iwhe-angụngu, whẹ sụ: ‘Ọgvu bukwa nwoke-e ebu l'ẹhu.’ 19Mbẹdua bụ Abụbu-Ndiwhe bya abyakwanụ bya eride eri, ngụde angụ, whẹ sụ t'e leedawho lẹ nwoke-e bụ o-ri-nri, bụru angụngu anyị-g'anyị, bụru ọnya ndu akịriko mẹe ndu l'eme iwhe-dụ-ẹji. Ọle iwhe mmamagụ Chileke l'eme b'e gude marụ lẹ mmamagụ Chileke ono bụ iwhe kfụru nhamụnha.”

Iwhe l'ee-me obodo, jịkaru Jisọsu

(Luk. 10:13-15)

20Tọ dụ iya bụ lẹ Jisọsu abalahaaru obodo ono g'ọ ha mba, mbụ obodo ọ kagezhia o meshi igweligwe iwhe-awhụrulenya. L'ọobaru whẹ iya nke l'ọo lẹ whẹ te ekwedu daa onwowhe ụta, haa ome iwhe-dụ-ẹji lwakfuta Chileke. Ọ sụ whẹ: 21“Nshọo gụbe Kọrazinu! Nshọo gụbe Bẹtusáyida! Nkele nggẹ l'ọo iwhe e wotaru iwhe-awhụrulenya e meshiru l'ime unu je emeshia l'ime Taya yẹle Sáyịdonu mẹ whẹ gege eyehaakwaro uwe-ntsọmawhu, gwọo onwowhe lẹ ntụ gude goshi lẹ whẹ dawarụ onwowhe ụta, hawaa ome iwhe-dụ-ẹji whẹ l'emegbabe, lwakfuta Chileke nteke tehawaruro ẹnya. 22Ọle g'ọ dụ ẹgube-ẹ ntaa bẹ mu sụru unu: iwhe l'a-nwụru ndu Taya mẹe ndu Sáyịdonu mbọku Chileke l'e-kpe ikpe l'a-bụkwa iwhe ahata, amamẹ lẹge l'ọo-dụ unubẹdua. 23Gụbedua, bụ Kapániyọmu! ?Ọ dụ-gee ghu nke t'e kulia ghu t'i sukfuru l'igweli. ?Tị madụ l'aa-gbẹenu kwada ghu, kwadarwua ọku-alị-maa. O noo lẹ nggẹ l'ọo iwhe l'e wotaru iwhe-awhụrulenya ono e meshiru l'ime ghu je emee lẹ Sódomu; mẹ Sódomu gẹge adụkwa byeye ntanụ-a. 24Ọle iwhe mu l'ekfu bụ l'iwhe l'a-nwụru ndu Sódomu l'a-kwa iwhe ahata mbọku ono, Chileke l'e-kpe ikpe, amamẹ lẹge l'ọo-dụ gụbedua.”

Byakfuta Jisọsu bya atụta ume

(Luk. 10:21-22)

25Nteke ono kwawhọ bẹ Jisọsu yeru ọnu sụ: “Mu l'ekele ghu ekele Nna, bụ ghu bụ onye nwe igwe, nweru alị. Iwhe mu kwoberu ekele ghu bụ l'i domiru iwhe lile-e tẹ ndu marụ ágụ mẹe ndu iwhe l'edoje ẹnya ba ama iya. O gbechia bụru ụnwegirima nshị-a ya, l'ẹte amaa ágụ bẹ i gbechia bya atọkashiaru iya. 26Ee, Nna, o nolewho g'ọ zụru ghu nkwe l'obu, ọ bụkwaruwho nno bụ g'ọ dụ ghu ree t'i mee ya.

27“Sụa, Nna mu yekotawaru mu iwhe lile l'ẹka. Ọ tọ dụkwa onye marụ onye Nwa bụ gbahaa Nna. O nokwawho gẹ l'ọoto dụa onye marụ onye Nna bụ, gbahalẹwho Nwa, ọdo bụwaa l'ọo onye Nwa ono họtaru goshi iya.

28“Unu byakfuta mụbe Jisọsu g'unu ha bụru ndu l'esegbu onwunu l'anya, bụru ndu e boru ivu-ẹrwa. Mu l'e-zhi iya unu, t'unu tụta ume. 29O noo lẹ mu bụ odomodoo, bụru onye wozetaru obu alị. Unu bya tẹ mu l'unu lịru nggẹ unu nwụta mu iwhe l'ẹka. Mu l'e-me tẹ meji nmakfuru unu anmakfuru. 30L'iwhe mu boru unu tẹ unu vuru ta abụdu iwhe l'anyị ẹrwa. Ivu nkemu dụ wherekpongu.”

Currently Selected:

Mátiyu 11: Ezaa

Highlight

Copy

Compare