Mátiyu 9

Jisọsu l'eme onye iwhe lọnwuru ibẹhu lanụ t'o mehu

(Mak. 2:1-12; Luk. 5:17-26)

1Ọo ya bụ, Jisọsu bya abahụ l'ụgbo, daa eze-ẹnyimu ono, lwatashia mkpụkpu whẹ. 2O nweru ndu patarụ iya nwoke iwhe lọnwuru ibẹhu lanụ. Nwoke ono zẹe l'iwhe-azẹe a parụ iya bya. Jisọsu whụlewho lẹge ndu ono gude kwetabe lẹ ya l'a-dụ ike mee tẹ nwoke ono jee ije, ọ sụ nwoke ono iwhe lọnwuru ibẹhu lanụ: “Nwa mu, nweru iya obu. A gụwaru ghu nvụ lẹ iwhe-dụ-ẹji i metagbaberu.” 3Tọ dụ iya bụ, ndu o-zhi-iwu harụ arị l'ime obu whẹ sụ: “Nwoke-e l'etukwa onwiya Chileke.” 4Jisọsu malẹkwaruwho iwhe dụ whẹ l'obu, ọ sụ whẹ: “?Ọo gụnu meru iwhe unu l'arị ẹjo ọriri l'obu unu? 5?Ndẹe ọwhu ka ntse ekfukfu: ?ọo t'a sụ iya: ‘A gụwaru ghu nvụ l'iwhe bụ-zhia iwhe-dụ-ẹji i metagbaberu,’ tọo t'a sụ iya: ‘Gbalihu jee ije’? 6Ọo l'ọo nggẹ unu makwanụru lẹ Abụbu-Ndiwhe bẹ nweru ikike ọguru madzụ nvụ l'iwhe-dụ-ẹji onye ọbu metagbaberu lẹ mgboko-o.” Ọ sụ nwoke ono iwhe lọnwuru ibẹhu lanụ “Gbalihu l'ẹka ono pata iwhe-azẹe ghu lashia ibe ghu.” 7Nwoke ono zhilihu tụgburu lashia ibe iya. 8Igweligwe ndu ono whụlewho iwhe meru nụ, whẹ tsụlahaa egvu jalahaa Chileke, onye bụ iya meru tẹ ndu madzụ dụ ike mee ẹgube iwhe ono.

Jisọsu l'eku Mátiyu

(Mak. 2:13-17; Luk. 5:27-32)

9Tọ dụ iya bụ, Jisọsu fụta l'ẹka ono, tụgburu lụfushia. O jenyazhiawho l'echi-ụzo, ọ whụa nwoke lanụ ẹwha iya bụ Mátiyu g'ọ sụgaberu onwiya l'ụlo okpoga akịriko. Jisọsu sụ iya: “Mátiyu, tsoru mu.” Mátiyu gbashilekwawho tsoru iya. 10Ọo ya bụ, Jisọsu whẹ je erilahaa nri l'ibe Mátiyu. Igweligwe ndu akịriko ọdo mẹwaro ndu ọdo mmaanụ, l'aamakwarụwho ejo ẹka tụkokwawho bya anọdu l'ẹka ono, whẹ lẹ Jisọsu mẹe ndu l'etso ụzo iya tụko eri nri. 11Ndu Fárisii whụle iya whọ, whẹ sụ ndu l'etso ụzo iya: “?Ndẹnu g'e meru onye l'ezhije unu iwhe je anọdu yẹle ndu akịriko mẹe ndu ọdo mmaanụ, l'aamakwarụwho ejo ẹka tụko eri nri?” 12Jisọsu nụle iya whọ, ọ sụ: “Ndu ẹhu dụ mma ta akpajẹkwa ishi onye l'eme ọgvu, ọ kwa ndu ẹhu l'eme bẹ l'akpajẹ iya. 13Sụa, unu je anwụa iwhe okfu ọwa fụtaru: ‘Iwhe l'agụ mu ta abụkwa t'unu gwajẹ mu agwa. Iwhe l'agụ mu nụ bụ t'unu mejeeru madzụ obu-imiko!’ O noo nkele mu ta abyadụ oku ndu dụ chịriri, ọ kwa ndu l'eme iwhe-dụ-ẹji bẹ mu byarụ ekuku.”

Nke ọswi ẹgu

(Mak. 2:18-22; Luk. 5:33-39)

14Tọ dụ iya bụ, ndu l'etso ụzo Jọnu baputizimu byakfuta Jisọsu bya asụ iya: “?Ọo gụnu meru iwhe anyi lẹ ndu Fárisii l'atụkoje aswị ẹgu ekfu anụ Chileke nteke nteke, ọwhube ndu l'etso ụzo ghu ta aswịje?” 15Jisọsu sụ whẹ: “?Ọ dụ ree tẹ ndu e kuru tẹ whẹ bya aswaa ẹswa nwanyị gụje áwhụ l'ẹka onye ọbu kuru whẹ l'ẹswa-nwanyi ono kabẹkwadua nọdu swiru whẹ? Ọle mbọku nọkwaa abya nteke l'aa-nafụ whẹ onye ono, l'alụ nwanyị nke ọwhuu, bụ iya kuru whẹ l'ẹswa-nwanyị ono. O noo nteke whẹ l'aswịlahaa ẹgu ndono.

16“Ọ tọ dụdu onye l'ewotaje ẹkwa ọwhuu gude gbachia ẹka akahụ uwe lakahụru alakahụ. O noo lẹ nke ọwhuu ọbu, e gbee gude jee t'a gbachia ya l'a-lakabaa akahụ uwe ono, njọ ẹgbeenu kabaanụ njọ l'ẹgube ụzo, l'a-dụ iya nteke ono. 17O nokwawho gẹ l'eete awụjeru akụru mmẹe ọwhuu ye lẹ akahụ ẹda mmẹe#9:17 Ndu Ízurẹlu l'eyeje mmẹe l'ẹda e gude akpọ-anụ mee. Ẹda mmẹe nkewhe bẹ yẹle mbo mmẹe nke anyi bụ iwhe lanụ., l'akaa aka. Onye wụru iya ye iya, mmẹe ono agbafua ẹda mmẹe ono. Mmẹe ono awụshihu, ẹda mmẹe ono abụkwaruwho iwhe iyi yitaru. Akụru mmẹe ọwhuu bẹ l'aawụjeru ye l'ẹda mmẹe ọwhuu, karụ aka. Ọo ya bụ, whẹ ẹbo ono atụkokwanu dụ.”

Nwa onye ishi mẹe nwanyị nsọ l'eme

(Mak. 5:21-43; Luk. 8:40-56)

18Tọ dụ iya bụ, Jisọsu kpụkwaduru-a iwhe lile ono l'ọnu ekfuru whẹ, onye lanụ l'ime ndu ishi ụlo-ndzuko byakfuta iya bya abaarụ iya ẹja sụ iya: “Nwatibe mu nke nwanyị bẹ bụlekwawho ntaa b'ọ tubuhuru ume. Ọle g'ọ dụ lẹe, bya bya ebyia ya ẹka. Ẹka ghu -rwuzhiwa iya l'ẹhu bẹ l'ọo-nọdua ndzụ.” 19Jisọsu yẹle ndu l'etso ụzo iya wulihu tsoru iya, whẹ jeshia.

20O nweruwho nwanyị, nọ l'ẹka ono nsọ nwanyị mewaru awha iri l'ẹbo. Nwanyị ono shia Jisọsu ụzo azụ bya emee ẹka l'ogboromọnu uwe iya. 21O noo lẹ gụbe nwanyị sụhawaru onwiya: “Ẹka mu rwuzhiakwaa mbụkwaa m'ọo l'uwe Jisọsu bẹ mu l'e-mehulekwawho.” 22Jisọsu bya aghachi whụa ya, bya sụ iya: “Nwada mu, tẹ obu shihu ghu ike. Ekwekwe i kweru bẹ mewaru ghu i mehu ọbu.” Shitalewho nteke ono, nwanyị ono mehu.

23Jisọsu rwulewho ibe onye ishi ụlo-ndzuko ono, ọ bya akpolwu igwe-ọha nọ l'ẹka ono atụ ụzu mẹe ndu l'awhụ opu. 24Ọ sụ whẹ: “Unu fụta-gezhia g'unu ha. Lẹ nwamgbọko ono ta anwụhukwa anwụhu, ọ kwa mgbẹnya bẹ l'ooku.”

Whẹ nma iya ụzu nchịchochi. 25A chịshi-gelewho igweligwe ndu ono etezhi, Jisọsu bya ekpuba l'ime ụlo je alọta nwamgbọko ono l'ẹka. O teta gbalihu. 26Akọ iya ngakọta uswetuma iya ono mgburumgburu.

Jisọsu l'eme unwoke labọ, l'atsọ ishi tẹ whẹ whụje ụzo

27Jisọsu fụtakwa l'ẹka ono, tụgbua, jenyalewho l'echi-ụzo, unwoke labọ, l'atsọ ishi l'etso iya; whẹ l'echi mkpu asụje: “Nwa Dévidi, meeru anyi obu-imiko!” 28Jisọsu bahụlewho l'ụlo, ndu ono, l'atsọ ishi byakfuta iya l'ụlo ono. Jisọsu sụ whẹ: “Unu kwetaru-a lẹ mu l'a-dụ ike mee iwhe ono?” Whẹ sụ: “Ee!” 29Tọ dụ iya bụ lẹ Jisọsu abya emee whẹ ẹka l'ẹnya sụ: “T'ọ dụkwaru unu g'unu kwetaberu.” 30Whẹ sakọta ẹnya. Whẹ whụlahaa ụzo. Jisọsu bya anmashịaru whẹ ọkwa ike sụ whẹ tẹ whẹ be emekwa t'o nweru onye l'a-ma nụ. 31Whẹ tụgbulerua lụfu je ekfukashikota nke Jisọsu, ọ ngakọta alị ono mgburumgburu.

Jisọsu l'eme onye l'ete ekfu okfu t'o kfua okfu

32Whẹ lụfudelewho, e dutashiaru Jisọsu onye ọbu ọgvu bu l'ẹhu. Onye ono te ekfu okfu. 33Jisọsu chịfulewho ọgvu ono, nwoke ono kfulahaa okfu. Iwhe ono kpụbekota ndu ono, dọru l'ẹka ono ọnu okfu. Whẹ sụ: “Ha! Whẹ tẹke awhụbukwaa ẹgube iya ọwa lẹ Ízurẹlu.” 34Ndu Fárisii sụ: “Ọ kwa ike nke onye ishi iwhe bụkota ọgvu bẹ l'oogudeje achịshi ọgvu.”

Jisọsu l'emeru igweligwe madzụ obu-imiko

35Jisọsu tụko iwhe bụ obodo mẹe mkpụkpu ejewhe, ekfu okfu Chileke l'ụlo-ndzuko ndu Ju. L'ọonoje ezhi ozhi-ọma nke abụbu ono, Chileke bụ eze. L'oomekaa t'iwhe bụ ndu ẹhu l'eme mẹe ndu ẹhu mmaanụ ọdo l'eme mehukota, e -behuduru iwhe ọbu, l'eme whẹ nụ dụ ọ dụ agha. 36L'ọobuje nteke ọ whụru igweligwe ndu ono, imiko whẹ adụ iya, nkele whẹ bụ ndu iwhe larụ nghọgeka, whẹ ta amahẹ gẹ whẹ l'e-me iya. Whẹ dụ-gelewho g'ọo igweligwe atụru l'enwee onye l'eleta iya ẹnya. 37Jisọsu sụ ndu l'etso ụzo iya: “Iwhe e meberu l'alị dụakwaa nke t'a bya akpata iya. Iwhe ono bẹ kwatarụ paa ẹka shinene. Ọle ndu l'ese anya t'a kpata iya bẹ hanụka nwanshị. 38Unu kfuru nụ Nnajị nwe iwhe e meberu l'alị t'o ye ndu l'a-bya akpaaru iya iwhe ono.”

Currently Selected:

Mátiyu 9: Ezaa

Highlight

Copy

Compare