Gintí 16
16
1Aur Qorah bin Izhár bin Qihát bin Láwí ne baní Rúbin meṉ se Ilíáb ke beṭoṉ Dátan aur Abírám, aur Palat ke beṭe On ke sáth milkar âur ádmíoṉ ko sáth liyá; 2aur wuh aur baní Isráíl meṉ se ḍháí sau âur ashḳhás jo jamá‘at ke sardár aur chída aur mashhúr ádmí the, Músá ke muqábale meṉ uṭhe; 3aur wuh Músá aur Hárún ke ḳhiláf ikaṭṭhe hokar un se kahne lage, Tumhare to baṛe da‘we ho chale, kyúṉki jamá‘at ká ek ek ádmí muqaddas hai, aur Ḳhudáwand un ke bích rahtá hai: so tum apne áp ko Ḳhudáwand kí jamá‘at se baṛá kyúṉkar ṭhahráte ho? 4Músá yih sunkar muṉh ke bal girá. 5Phir us ne Qorah aur us ke kull faríq se kahá, ki Kal subh Ḳhudáwand dikhá degá, ki kaun us ká hai aur kaun muqaddas hai; aur wuh usí ko apne nazdík áne degá: kyúṉki jise wuh ḳhud chunegá, use wuh apní qurbat bhí degá. 6So, ai Qorah, aur us ke faríq ke logo, tum yúṉ karo, ki apná apná baḳhúrdán lo, 7aur un meṉ ág bharo, aur Ḳhudáwand ke huzúr kal un meṉ baḳhúr jaláo; tab jis shaḳhs ko Ḳhudáwand chun le, wuhí muqaddas ṭhahregá. Ai Láwí ke beṭo, baṛe baṛe da‘we to tumháre haiṉ. 8Phir Músá ne Qorah kí taraf muḳhátib hokar kahá, Ai baní Láwí, suno. 9Kyá yih tum ko chhoṭí bát dikháí detí hai, ki Isráíl ke Ḳhudá ne tum ko baní Isráíl kí jamá‘at meṉ se chunkar alag kiyá, táki tum ko wuh apní qurbat baḳhshe, aur tum Ḳhudáwand ke maskan kí ḳhidmat karo, aur jamá‘at ke áge khaṛe hokar us kí bhí ḳhidmat bajá láo. 10Aur tujhe aur tere sab bháiyoṉ ko, jo baní Láwí haiṉ, apne nazdík áne diyá? so kyá ab tum kahánat ko bhí cháhte ho? 11Isí liye tú aur tere faríq ke log, yih sab ke sab Ḳhudáwand ke ḳhiláf ikaṭṭhe húe haiṉ, aur Hárún kaun hai, jo tum us kí shikáyat karte ho? 12Phir Músá ne Dátan aur Abírám ko, jo Ilíáb ke beṭe the, bulwá bhejá: unhoṉ ne kahá, Ham nahíṉ áte; 13kyá yih chhoṭí bát hai ki tú ham ko ek aise mulk se, jis meṉ dúdh aur shahd bahtá hai, nikál láyá hai, ki ham ko biyábán men halák kare, aur us par bhí yih turra hai, ki ab tú sardár bankar ham par hukúmat jatátá hai? 14Másiwá is ke, tú ne ham ko us mulk meṉ bhí nahíṉ pahuṉcháyá, jaháṉ dúdh aur shahd bahtá hai, aur na ham ko khetoṉ aur tákistánoṉ ká wáris banáyá: kyá tú in logoṉ kí áṉkheṉ nikál ḍálegá? ham to nahíṉ áne ke. 15Tab Músá niháyat taish meṉ ákar Ḳhudáwand se kahne lagá, Tú un ke hadye kí taraf tawajjuh mat kar. Maiṉ ne un se ek gadhá bhí nahíṉ liyá, na un meṉ se kisí ko koí nuqsán pahuṉcháyá hai. 16Phir Músá ne Qorah se kahá, Kal tú apne sáre faríq ke logoṉ ko lekar Ḳhudáwand ke áge házir ho; tú bhí ho, aur wuh bhí hoṉ, aur Hárún bhí ho. 17Aur tum meṉ se har shaḳhs apná baḳhúrdán lekar us meṉ baḳhúr ḍále, aur tum apne apne baḳhúrdán ko, jo shumár meṉ ḍháí sau hoṉge, Ḳhudáwand ke huzúr láo, aur tú bhí apná baḳhúrdán láná aur Hárún bhí láe. 18So unhoṉ ne apná apná baḳhúrdán lekar, aur un meṉ ág rakhkar, us par baḳhúr ḍálá, aur ḳhaima e ijtimá‘ ke darwáze par, Músá aur Hárún ke sáth ákar khaṛe húe. 19Aur Qorah ne sárí jamá‘at ko un ke ḳhiláf ḳhaima e ijtimá‘ ke darwáze par jama‘ kar liyá thá; tab Ḳhudáwand ká jalál sárí jamá‘at ke sámne numáyáṉ húá.
20Aur Ḳhudáwand ne Músá aur Hárún se kahá, 21ki Tum apne áp ko is jamá‘at se bi’lkull alag kar lo, táki maiṉ un ko ek pal meṉ bhasam kar dúṉ. 22Tab wuh muṉh ke bal girke kahne lage, Ai Ḳhudá, sáre bashar kí rúhoṉ ke Ḳhudá! Kyá ek ádmí ke gunáh ke sabab se terá qahr sárí jamá‘at par hogá? 23Tab Ḳhudáwand ne Músá se kahá, 24Tú jamá‘at se kah, ki Tum Qorah, aur Dátan, aur Abírám ke ḳhaimoṉ ke ás pás se dúr haṭ jáo. 25Aur Músá uṭhkar Dátan aur Abírám kí taraf gayá, aur baní Isráíl ke buzurg us ke píchhe píchhe gaye. 26Aur us ne jamá‘at se kahá, In sharír ádmíoṉ ke ḳhaimoṉ se nikal jáo, aur un kí kisí chíz ko háth na lagáo, tá na ho, ki tum bhí un ke sáre gunáhoṉ ke sabab se nest ho jáo. 27So wuh log Qorah, aur Dátan, aur Abírám ke ḳhaimoṉ ke ás pás se dúr haṭ gaye; aur Dátan, aur Abírám apní bíwiyoṉ aur beṭoṉ, aur bál bachchoṉ samet nikalkar apne ḳhaimoṉ ke darwázoṉ par khaṛe húe. 28Tab Músá ne kahá, Is se tum ján loge, ki Ḳhudáwand ne mujhe bhejá hai, ki yih sab kám karúṉ; kyúṉki maiṉ ne apní marzí se kuchh nahíṉ kiyá. 29Agar yih ádmí waisí hí maut se mareṉ, jo sab logoṉ ko átí hai, yá in par waise hí hádise guzreṉ, jo sab par guzarte haiṉ, to maiṉ Ḳhudáwand ká bhejá húá nahíṉ húṉ. 30Par agar Ḳhudáwand koí nayá karashma dikháe, aur zamín apná muṉh khol de, aur in ko in ke ghar bár samet nigal jáe, aur yih jíte jí pátál meṉ samá jáeṉ, to tum jánná, ki in logoṉ ne Ḳhudáwand kí tahqír kí hai. 31Us ne yih báteṉ ḳhatm hí kí thíṉ, ki zamín un ke páṉwoṉ tale phaṭ gayí. 32Aur zamín ne apná muṉh khol diyá, aur un ko aur un ke ghar bár ko, aur Qorah ke háṉ ke sab ádmíoṉ ko, aur un ke sáre mál o asbáb ko, nigal gayí. 33So wuh aur un ká sárá ghar bár jíte jí pátál meṉ samá gaye, aur zamín un ke úpar barábar ho gayí, aur wuh jamá‘at meṉ se nábúd ho gaye. 34Aur sáre Isráílí, jo un ke ás pás the, un ká chilláná sunkar yih kahte húe bháge, ki Kahíṉ zamín ham ko bhí nigal na le. 35Aur Ḳhudáwand ke huzúr se ág niklí, aur un ḍháí sau ádmíoṉ ko, jinhoṉ ne baḳhúr guzráná thá, bhasam kar ḍálá.
36Aur Ḳhudáwand ne Músá se kahá, ki 37Hárún káhin ke beṭe Ilí‘azar se kah, ki Wuh baḳhúrdánoṉ ko shu‘loṉ meṉ se uṭhá le, aur ág ke angároṉ ko udhar hí bakher de, kyúṉki wuh pák haiṉ. 38Jo ḳhatákár apní hí ján ke dushman húe, un ke baḳhúrdánoṉ ke píṭ píṭkar pattar banáe jáeṉ, táki wuh mazbah par maṉḍhe jáeṉ, kyúṉki unhoṉ ne in ko Ḳhudáwand ke huzúr rakkhá thá, is liye wuh pák haiṉ, aur wuh baní Isráíl ke liye ek nishán bhí ṭhahreṉge. 39Tab Ilí‘azar káhin ne pítal ke un baḳhúrdánoṉ ko uṭhá liyá, jin meṉ unhoṉ ne, jo bhasam kar diye gaye the, baḳhúr guzráná thá, aur mazbah par maṉḍhne ke liye un ke pattar banwáe; 40táki baní Isráíl ke liye ek yádgár ho, ki koí g̣air shaḳhs, jo Hárún kí nasl se nahíṉ, Ḳhudáwand ke huzúr baḳhúr jaláne ko nazdík na jáe, tá na ho, ki wuh Qorah aur us ke faríq kí tarah halák ho, jaisá Ḳhudáwand ne us ko Músá kí ma‘rifat batá diyá thá.
41Lekin dúsre hí din baní Isráíl kí sárí jamá‘at ne Músá aur Hárún kí shikáyat kí, aur kahne lage, ki Tum ne Ḳhudáwand ke logoṉ ko már ḍálá hai. 42Aur jab wuh jamá‘at Músá aur Hárún ke ḳhiláf ikaṭṭhí ho rahí thí, to unhoṉ ne ḳhaima e ijtimá‘ kí taraf nigáh kí, aur dekhá ki abr us par chháyá húá hai, aur Ḳhudáwand ká jalál numáyáṉ hai. 43Tab Músá aur Hárún ḳhaima e ijtimá‘ ke sámne áe, 44aur Ḳhudáwand ne Músá aur Hárún se kahá, ki 45Tum is jamá‘at ke bích se haṭ jáo, táki maiṉ in ko ek pal meṉ bhasam kar ḍálúṉ. Tab wuh muṉh ke bal gire. 46Aur Músá ne Hárún se kahá, Apná baḳhúrdán le, aur mazbah par se ág lekar us meṉ ḍál, aur us par baḳhúr jalá, aur jald jamá‘at ke pás jákar un ke liye kaffára de, kyúṉki Ḳhudáwand ká qahr názil húá hai, aur wabá shurú‘ ho gayí. 47Músá ke kahne ke mutábiq, Hárún baḳhúrdán lekar jamá‘at ke bích meṉ dauṛtá húá gayá, aur dekhá, ki wabá logoṉ meṉ phailne lagí hai: so us ne baḳhúr jaláyá, aur un logoṉ ke liye kaffára diyá. 48Aur wuh murdoṉ aur zindoṉ ke bích meṉ khaṛá húá; tab wabá mauqúf húí. 49So ‘aláwa un ke, jo Qorah ke mu‘ámale ke sabab se halák húe the, chaudah hazár sát sau ádmí wabá se chhej gaye. 50Phir Hárún lauṭkar ḳhaima e ijtimá‘ ke darwáze par Músá ke pás áyá: aur wabá mauqúf ho gayí.
Currently Selected:
Gintí 16: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)