Gintí 15
15
1Aur Ḳhudáwand ne Músá se kahá, 2Baní Isráíl se kah, Jab tum apne rahne ke mulk meṉ, jo maiṉ tum ko detá húṉ, pahuṉcho, 3aur Ḳhudáwand ke huzúr átashín qurbání, ya‘ní soḳhtaní qurbání, yá ḳháss mannat ká zabíha, yá razá kí qurbání guzráno, yá apní mu‘aiyan ‘ídoṉ meṉ ráhatangez ḳhushbú ke taur par Ḳhudáwand ke huzúr gáe bail yá bheṛ bakrí chaṛháo, 4to jo shaḳhs apná chaṛháwá láe, wuh Ḳhudáwand ke huzúr nazr kí qurbání ke taur par aifah ke dasweṉ hisse ke barábar maida, jis meṉ chautháí hín ke barábar tel milá húá ho, 5aur tapáwan ke taur par chautháí hín ke barábar mai bhí láe; tum apní soḳhtaní qurbání yá apne zabíhe ke har barre ke sáth itná hí taiyár kiyá karná; 6aur har meṉḍhe ke sáth aifah ke páṉchweṉ hisse ke barábar maida, jis meṉ tiháí hín ke barábar tel milá húá ho, nazr kí qurbání ke taur par láná. 7Aur tapáwan ke taur par tiháí hín ke barábar mai dená, táki wuh Ḳhudáwand ke huzúr ráhatangez ḳhushbú ṭhahre. 8Aur jab tum Ḳhudáwand ke huzúr soḳhtaní qurbání yá ḳháss mannat ke zabíhe, yá salámatí ke zabíhe ke taur par bachhṛá guzráno, 9to us bachhṛe ke sáth nazr kí qurbání ke taur par aifah ke tín daháí hisse ke barábar maida, jis meṉ nisf hín ke barábar tel milá húá ho chaṛháná. 10Aur tapáwan ke taur par nisf hín ke barábar mai guzránná, táki wuh Ḳhudáwand ke huzúr ráhatangez ḳhushbú kí átashín qurbání ṭhahre. 11Har bachhṛe, aur har meṉḍhe, aur har nar barre yá bakrí ke bachche ke liye aisá hí kiyá jáe. 12Tum jitne jánwar láo, un ke shumár ke mutábiq, ek ek ke sáth aisá hí karná. 13Jitne desí Ḳhudáwand ke huzúr ráhatangez ḳhushbú kí átashín qurbání guzráneṉ, wuh us waqt yih sáre kám isí taríqe se kareṉ. 14Aur agar koí pardesí tumháre sáth búdobásh kartá ho, yá jo koí pushtoṉ se tumháre sáth rahtá áyá ho, aur wuh Ḳhudáwand ke huzúr ráhatangez ḳhushbú kí átashín qurbání guzránná cháhe, to jaisá tum karte ho, wuh bhí waisá hí kare. 15Majma‘ ke liye, ya‘ní tumháre liye, aur us pardesí ke liye, jo tum meṉ rahtá ho, nasl dar nasl sadá ek hí áín rahegá: Ḳhudáwand ke áge pardesí bhí waise hí hoṉ jaise tum ho. 16Tumháre liye aur pardesíyoṉ ke liye, jo tumháre sáth rahte haiṉ, ek hí shara‘ aur ek hí qánún ho.
17Aur Ḳhudáwand ne Músá se kahá, ki 18Baní Isráíl se kah, Jab tum us mulk meṉ pahuṉcho, jaháṉ maiṉ tum ko liye játá húṉ, 19aur us mulk kí roṭí kháo, to Ḳhudáwand ke huzúr uṭháne kí qurbání guzránná. 20Tum apne pahle gúṉdhe húe áṭe ká ek girda uṭháne kí qurbání ke taur par chaṛháná, jaise khalíhán kí uṭháne kí qurbání ko lekar uṭháte ho, waise hí ise bhí uṭháná. 21Tum apní pusht dar pusht apne pahle hí gúṉdhe húe áṭe meṉ se kuchh lekar use Ḳhudáwand ke huzúr uṭháne kí qurbání ke taur par guzránná.
22Aur agar tum se bhúl ho jáe, aur tum ne un sab hukmoṉ par, jo Ḳhudáwand ne Músá ko diye, ‘amal na kiyá ho, 23ya‘ní jis din se Ḳhudáwand ne hukm dená shurú‘ kiyá, us din se lekar áge áge, jo kuchh hukm Ḳhudáwand ne tumhárí nasl dar nasl Músá kí ma‘rifat tum ko diyá hai, 24us meṉ agar sahwan koí ḳhatá ho gayí ho, aur jamá‘at us se wáqif na ho, to sárí jamá‘at ek bachhṛá soḳhtaní qurbání ke liye guzráne, táki wuh Ḳhudáwand ke huzúr ráhatangez ḳhushbú ho, aur us ke sáth shara‘ ke mutábiq us kí nazr kí qurbání aur us ká tapáwan bhí chaṛháe, aur ḳhatá kí qurbání ke liye ek bakrá guzráne. 25Yúṉ káhin baní Isráíl kí sárí jamá‘at ke liye kaffára de, to un ko mu‘áfí milegí, kyúṉki yih mahz bhúl thí, aur unhoṉ ne us bhúl ke badle wuh qurbání bhí chaṛháí, jo Ḳhudáwand ke huzúr átashín qurbání ṭhahartí hai, aur ḳhatá kí qurbání bhí Ḳhudáwand ke huzúr guzrání. 26Tab baní Isráíl kí sárí jamá‘at ko, aur un pardesiyoṉ ko bhí, jo un meṉ rahte haiṉ, mu‘áfí milegí, kyúṉki jamá‘at ke i‘tibár se yih sahwan húá. 27Aur agar ek hí shaḳhs sahwan ḳhatá kare, to wuh yaksála bakrí ḳhatá kí qurbání ke liye chaṛháe. 28Yúṉ káhin us shaḳhs kí taraf se, jis ne sahwan ḳhatá kí, us kí ḳhatá ke liye Ḳhudáwand ke huzúr kaffára de, to use mu‘áfí milegí. 29Jis shaḳhs ne sahwan ḳhatá kí ho, us ke liye tum ek hí shara‘ rakhná, ḳhwáh wuh baní Isráíl meṉ se desí ho, yá pardesí jo un meṉ rahtá ho. 30Lekin jo shaḳhs bebák hokar gunáh kare, ḳhwáh wuh desí ho, yá pardesí, wuh Ḳhudáwand kí ihánat kartá hai; wuh shaḳhs apne logoṉ meṉ se káṭ ḍálá jáegá, 31kyúṉki us ne Ḳhudáwand ke kalám kí hiqárat kí, aur us ke hukm ko toṛ ḍálá; wuh shaḳhs bi’lkull káṭ ḍálá jáegá, us ká gunáh usí ke sir lagegá.
32Aur jab baní Isráíl biyábán meṉ rahte the, un dinoṉ ek ádmí un ko sabt ke din lakṛiyáṉ jama‘ kartá húá milá. 33Aur jin ko wuh lakṛiyáṉ jama‘ kartá húá milá, wuh use Músá aur Hárún aur sárí jamá‘at ke pás le gaye. 34Unhoṉ ne use hawálát meṉ rakkhá, kyúṉki un ko yih nahíṉ batáyá gayá thá, ki us ke sáth kyá karná cháhiye. 35Tab Ḳhudáwand ne Músá se kahá, ki Yih shaḳhs zarúr ján se márá jáe; sárí jamá‘at lashkargáh ke báhar use sangsár kare. 36Chunáṉchi jaisá Ḳhudáwand ne Músá ko hukm diyá thá, us ke mutábiq sárí jamá‘at ne use lashkargáh ke báhar le jákar sangsár kiyá, aur wuh mar gayá.
37Aur Ḳhudáwand ne Músá se kahá, 38Baní Isráíl se kah, ki wuh nasl dar nasl apne pairáhanoṉ ke kanároṉ par jhálar lagáeṉ, aur har kanáre kí jhálar ke úpar ásmání rang ká ḍorá ṭáṉkeṉ. 39Yih jhálar tumháre liye aisí ho, ki jab tum use dekho, to Ḳhudáwand ke sáre hukmoṉ ko yád karke un par ‘amal karo, aur apne dil aur áṉkhoṉ kí ḳhwáhishoṉ kí pairawí meṉ zinákárí na karte phiro, jaisá karte áe ho; 40balki mere sab hukmoṉ ko yád karke un ko ‘amal meṉ láo, aur apne Ḳhudá ke liye muqaddas ho. 41Maiṉ Ḳhudáwand tumhárá Ḳhudá húṉ, jo tum ko mulk i Misr se nikálkar láyá, táki tumhárá Ḳhudá ṭhahrúṉ. Maiṉ Ḳhudáwand tumhárá Ḳhudá húṉ.
Currently Selected:
Gintí 15: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
