Gintí 17
17
1Phir Ḳhudáwand ne Músá se kahá, ki 2Baní Isráíl se guftogú karke un ke sab sardároṉ se, un ke ábáí ḳhándánoṉ ke mutábiq, fí ḳhándán ek ek láṭhí ke hisáb se bárah láṭhiyáṉ le, aur har sardár ká nám usí kí láṭhí par likh. 3Aur Láwí kí láṭhí par Hárún ká nám likhná, kyúṉki un ke ábáí ḳhándánoṉ ke har sardár ke liye ek láṭhí hogí. 4Aur un ko lekar ḳhaima e ijtimá‘ meṉ shahádat ke sandúq ke sámne, jaháṉ maiṉ tum se muláqát kartá húṉ, rakh dená. 5Aur jis shaḳhs ko maiṉ chunúṉgá, us kí láṭhí se kaliyáṉ phúṭ nikleṉgí; aur baní Isráíl, jo tum par kuṛkuṛáte rahte haiṉ, wuh kuṛkuṛáná maiṉ apne pás se dafa‘ karúṉgá. 6So Músá ne baní Isráíl se guftogú kí, aur un ke sab sardároṉ ne apne ábáí ḳhándánoṉ ke mutábiq fí sardár ek láṭhí ke hisáb se bárah láṭhiyáṉ us ko díṉ: aur Hárún kí láṭhí bhí un kí láṭhiyoṉ meṉ thí. 7Aur Músá ne un láṭhiyoṉ ko shahádat ke ḳhaime meṉ Ḳhudáwand ke huzúr rakh diyá. 8Aur dúsre din, jab Músá shahádat ke ḳhaime meṉ gayá, to dekhá, ki Hárún kí láṭhí meṉ, jo Láwí ke ḳhándán ke nám kí thí, kaliyáṉ phúṭí húí, aur shagúfe khile húe, aur pakke bádám lage haiṉ. 9Aur Músá un sab láṭhiyoṉ ko Ḳhudáwand ke huzúr se nikálkar sáre baní Isráíl ke pás le gayá, aur unhoṉ ne dekhá, aur har shaḳhs ne apní láṭhí le lí. 10Aur Ḳhudáwand ne Músá se kahá, ki Hárún kí láṭhí shahádat ke sandúq ke áge dhar de, táki wuh fitna angezoṉ ke liye ek nishán ke taur par rakkhí rahe; aur is tarah tú un kí shikáyateṉ, jo mere ḳhiláf hotí rahtí haiṉ, band kar de, táki wuh halák na hoṉ. 11Aur Músá ne, jaisá Ḳhudáwand ne use hukm diyá thá, waisá hí kiyá.
12Aur baní Isráíl ne Músá se kahá, Dekh, ham nest húe játe; ham halák húe játe; ham sab ke sab halák húe játe haiṉ. 13Jo koí Ḳhudáwand ke maskan ke nazdík játá hai, mar játá hai: to kyá ham sab ke sab nest hí ho jáeṉge?
Currently Selected:
Gintí 17: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)