Aiyúb 2
2
1Phir ek din Ḳhudá ke beṭe áe, ki Ḳhudáwand ke huzúr házir hoṉ, aur Shaitán bhí un ke darmiyán áyá, ki Ḳhudáwand ke áge házir ho. 2Aur Ḳhudáwand ne Shaitán se púchhá, ki Tú kaháṉ se átá hai? Shaitán ne Ḳhudáwand ko jawáb diyá, ki Zamín par idhar udhar ghúmtá phirtá, aur us meṉ sair kartá húá áyá húṉ. 3Ḳhudáwand ne Shaitán se kahá, Kyá tú ne mere bande Aiyúb ke hál par bhí kuchh g̣aur kiyá? Kyúṉki zamín par us kí tarah kámil aur rástbáz ádmí, jo Ḳhudá se ḍartá aur badí se dúr rahtá ho, koí nahíṉ; aur go tú ne mujh ko ubhárá, ki besabab use halák karúṉ, taubhí wuh apní rástí par qáim hai. 4Shaitán ne Ḳhudáwand ko jawáb diyá, ki Khál ke badle khál, balki insán apná sárá mál apní ján ke liye de ḍálegá. 5Ab faqat apná háth baṛhákar us kí haḍḍí aur us ke gosht ko chhú de, to wuh tere muṉh par terí takfír karegá. 6Ḳhudáwand ne Shaitán se kahá, ki Dekh, wuh tere iḳhtiyár meṉ hai, faqat us kí ján mahfúz rahe. 7Tab Shaitán Ḳhudáwand ke sámne se chalá gayá, aur Aiyúb ko talwe se cháṉd tak dardnák phoṛoṉ se dukh diyá. 8Aur wuh apne ko khujláne ke liye ek ṭhíkrá lekar rákh par baiṭh gayá. 9Tab us kí bíwí us se kahne lagí, ki Kyá tú ab bhí apní rástí par qáim rahegá? Ḳhudá kí takfír kar aur mar já. 10Par us ne us se kahá, ki Tú nádán ‘auratoṉ ki sí báteṉ kartí hai. Kyá ham Ḳhudá ke háth se sukh páeṉ aur dukh na páeṉ? In sab bátoṉ meṉ Aiyúb ne apne laboṉ se ḳhatá na kí.
11Jab Aiyúb ke tín dostoṉ Temání Ilífaz aur Súḳhí Bildad aur Na‘mátí Súfar ne us sárí áfat ká hál, jo us par áí thí, suná, to wuh apní apní jagah se chale, aur unhoṉ ne ápas meṉ ‘ahd kiyá, ki jákar us ke sáth roeṉ, aur use tasallí deṉ. 12Aur jab unhoṉ ne dúr se nigáh kí, aur use na pahcháná, to wuh chillá chillákar rone lage, aur har ek ne apná pairáhan chák kiyá, aur apne sir ke úpar ásmán kí taraf dhúl uṛáí. 13Aur wuh sát din aur sát rát us ke sáth zamín par baiṭhe rahe, aur kisí ne us se ek bát na kahí, kyúṉki unhoṉ ne dekhá ki us ká g̣am bahut baṛá hai.
Currently Selected:
Aiyúb 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
