Popular Bible Verses from Aiyúb 2

Share

Tab us kí bíwí us se kahne lagí, ki Kyá tú ab bhí apní rástí par qáim rahegá? Ḳhudá kí takfír kar aur mar já. Par us ne us se kahá, ki Tú nádán ‘auratoṉ ki sí báteṉ kartí hai. Kyá ham Ḳhudá ke háth se sukh páeṉ aur dukh na páeṉ? In sab bátoṉ meṉ Aiyúb ne apne laboṉ se ḳhatá na kí.

ḲHUDáWAND ne Shaitán se kahá, Kyá tú ne mere bande Aiyúb ke hál par bhí kuchh g̣aur kiyá? Kyúṉki zamín par us kí tarah kámil aur rástbáz ádmí, jo Ḳhudá se ḍartá aur badí se dúr rahtá ho, koí nahíṉ; aur go tú ne mujh ko ubhárá, ki besabab use halák karúṉ, taubhí wuh apní rástí par qáim hai.

ḲHUDáWAND ne Shaitán se kahá, ki Dekh, wuh tere iḳhtiyár meṉ hai, faqat us kí ján mahfúz rahe.

Jab Aiyúb ke tín dostoṉ Temání Ilífaz aur Súḳhí Bildad aur Na‘mátí Súfar ne us sárí áfat ká hál, jo us par áí thí, suná, to wuh apní apní jagah se chale, aur unhoṉ ne ápas meṉ ‘ahd kiyá, ki jákar us ke sáth roeṉ, aur use tasallí deṉ. Aur jab unhoṉ ne dúr se nigáh kí, aur use na pahcháná, to wuh chillá chillákar rone lage, aur har ek ne apná pairáhan chák kiyá, aur apne sir ke úpar ásmán kí taraf dhúl uṛáí. Aur wuh sát din aur sát rát us ke sáth zamín par baiṭhe rahe, aur kisí ne us se ek bát na kahí, kyúṉki unhoṉ ne dekhá ki us ká g̣am bahut baṛá hai.