Aiyúb 1
1
1‘Úz kí sarzamín meṉ Aiyúb nám ek shaḳhs thá; wuh shaḳhs kámil aur rástbáz thá aur Ḳhudá se ḍartá aur badí se dúr rahtá thá. 2Us ke háṉ sát beṭe aur tín beṭiyáṉ paidá húíṉ. 3Us ke pás sát hazár bheṛeṉ, aur tín hazár úṉṭ, aur páṉch sau joṛí bail, aur páṉch sau gadhiyáṉ, aur bahut se naukar chákar the, aisá ki ahl i mashriq meṉ wuh sab se baṛá ádmí thá. 4Us ke beṭe ek dúsre ke ghar jáyá karte the, aur har ek apne din par ziyáfat kartá thá, aur apne sáth kháne píne ko apní tínoṉ bahinoṉ ko bulwá bhejte the. 5Aur jab un kí ziyáfat ke din púre ho játe, to Aiyúb unheṉ bulwákar pák kartá, aur subh ko sawere uṭhkar un sabhoṉ ke shumár ke muwáfiq soḳhtaní qurbáníáṉ chaṛhátá thá; kyúṉki Aiyúb kahtá thá, ki Sháyad mere beṭoṉ ne kuchh ḳhatá kí ho, aur apne dil meṉ Ḳhudá kí takfír kí ho. Aiyúb hamesha aisá hí kiyá kartá thá.
6Aur ek din Ḳhudá ke beṭe áe ki Ḳhudáwand ke huzúr házir hoṉ; aur un ke darmiyán Shaitán bhí áyá. 7Aur Ḳhudáwand ne Shaitán se púchhá, ki Tú kaháṉ se átá hai? Shaitán ne Ḳhudáwand ko jawáb diyá, ki Zamín par idhar udhar ghúmtá phirtá, aur us meṉ sair kartá húá áyá húṉ. 8Ḳhudáwand ne Shaitán se kahá, Kyá tú ne mere bande Aiyúb ke hál par bhí kuchh g̣aur kiyá? kyúṉki zamín par us kí tarah kámil aur rástbáz ádmí, jo Ḳhudá se ḍartá aur badí se dúr rahtá ho, koí nahíṉ? 9Shaitán ne Ḳhudáwand ko jawáb diyá, Kyá Aiyúb yúṉ hí Ḳhudá se ḍartá hai? 10Kyá tú ne us ke, aur us ke ghar ke gird, aur jo kuchh us ká hai, us sab ke gird chároṉ taraf báṛ nahíṉ banáí hai? Tú ne us ke háth ke kám meṉ barakat baḳhshí hai, aur us ke galle mulk meṉ baṛh gaye haiṉ. 11Par tú zará apná háth baṛhákar jo kuchh us ká hai use chhú hí de, to kyá wuh tere muṉh par terí takfír na karegá? 12Ḳhudáwand ne Shaitán se kahá, Dekh, us ká sab kuchh tere iḳhtiyár meṉ hai; sirf us ko háth na lagáná. Tab Shaitán Ḳhudáwand ke sámne se chalá gayá.
13Aur ek din jab us ke beṭe aur beṭiyáṉ apne baṛe bháí ke ghar meṉ kháná khá rahe, aur mainoshí kar rahe the, 14to ek qásid ne Aiyúb ke pás ákar kahá, ki Bail hal meṉ jute the, aur gadhe un ke pás char rahe the, 15ki Sabá ke log un par ṭúṭ paṛe, aur unheṉ le gaye, aur naukaroṉ ko tah i teg̣ kiyá; aur faqat maiṉ hí akelá bach niklá, ki tujhe ḳhabar dúṉ. 16Wuh abhí yih kah hí rahá thá, ki ek âur bhí ákar kahne lagá, ki Ḳhudá kí ág ásmán se názil húí, aur bheṛoṉ aur naukaroṉ ko jalákar bhasam kar diyá; aur faqat maiṉ hí akelá bach niklá, ki tujhe ḳhabar dúṉ. 17Wuh abhí yih kah hí rahá thá, ki ek âur bhí ákar kahne lagá, ki Kasdí tín gol hokar úṉṭoṉ par á gire, aur unheṉ le gaye, aur naukaroṉ ko tah i teg̣ kiyá; aur faqat maiṉ hí akelá bach niklá, ki tujhe ḳhabar dúṉ. 18Wuh abhí yih kah hí rahá thá, ki ek âur bhí ákar kahne lagá, ki Tere beṭe beṭiyáṉ apne baṛe bháí ke ghar meṉ kháná khá rahe, aur mainoshí kar rahe the; 19aur dekh, biyábán se ek baṛí áṉdhí chalí aur us ghar ke chároṉ konoṉ par aise zor se ṭakráí, ki wuh un jawánoṉ par gir paṛá, aur wuh mar gaye; aur faqat maiṉ hí akelá bach niklá, ki tujhe ḳhabar dúṉ. 20Tab Aiyúb ne uṭhkar apná pairáhan chák kiyá, aur sir munḍáyá, aur zamín par girke sijda kiyá, 21aur kahá, Naṉgá maiṉ apní máṉ ke peṭ se niklá, aur naṉgá hí wápas jáúṉgá; Ḳhudáwand ne diyá, aur Ḳhudáwand ne le liyá; Ḳhudáwand ká nám mubárak ho. 22In sab bátoṉ meṉ Aiyúb ne na to gunáh kiyá, aur na Ḳhudá par bejá kám ká ‘aib lagáyá.
Currently Selected:
Aiyúb 1: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
