Aiyúb 3
3
1Is ke ba‘d Aiyúb ne apná muṉh kholkar apne janam din par la‘nat kí. 2Aur Aiyúb kahne lagá:
3Nábúd ho wuh din jis meṉ maiṉ paidá húá,
Aur wuh rát bhí jis meṉ kahá gayá, ki Dekho, beṭá húá.
4Wuh din andherá ho jáe;
Ḳhudá úpar se us ká liház na kare,
Aur na us par raushní paṛe.
5Andherá aur maut ká sáya us par qábiz hoṉ;
Badlí us par chháí rahe,
Aur din ko tárík kar denewálí chízeṉ use dahshatzada kareṉ.
6Gahrí táríkí us rát ko daboch le;
Wuh sál ke dinoṉ ke darmiyán ḳhushí na karne páe,
Aur na mahínoṉ ke shumár meṉ áe.
7Wuh rát báṉjh ho jáe;
Us meṉ ḳhushí kí koí sadá na áe.
8Din par la‘nat karnewále us par la‘nat kareṉ,
Aur wuh bhí jo azhdaha ko chheṛne ko taiyár haiṉ.
9Us kí shám ke táre tárík ho jáeṉ;
Wuh raushní kí ráh dekhe, jab ki wuh hai nahíṉ,
Aur na wuh subh kí palakoṉ ko dekhe.
10Kyúṉki us ne merí máṉ ke rihm ke darwázoṉ ko band na kiyá,
Aur dukh ko merí áṉkhoṉ se chhipá na rakkhá.
11Maiṉ rihm hí meṉ kyúṉ na mar gayá?
Aur maiṉ ne peṭ se nikalte hí ján kyúṉ na de dí?
12Mujhe qubúl karne ko ghuṭne kyúṉ the?
Aur chhátiyáṉ ki maiṉ un se píúṉ?
13Nahíṉ to is waqt maiṉ paṛá hotá, aur beḳhabar rahtá,
Maiṉ so játá, tab mujhe árám miltá,
14Zamín ke bádsháhoṉ aur mushíroṉ ke sáth,
Jinhoṉ ne apne liye maqbare banáe;
15Yá un sháhzádoṉ ke sáth hotá, jin ke pás soná thá,
Jinhoṉ ne apne ghar chándí se bhar liye the;
16Yá poshída isqát i haml kí mánind wujúd meṉ na átá;
Yá un bachchoṉ kí mánind, jinhoṉ ne raushní hí na dekhí.
17Waháṉ sharír fasád se báz áte haiṉ,
Aur thake mánde ráhat páte haiṉ.
18Waháṉ qaidí milkar árám karte haiṉ,
Aur dárog̣e kí áwáz sunne meṉ nahíṉ átí.
19Chhoṭe aur baṛe donoṉ wahíṉ haiṉ,
Aur naukar apne áqá se ázád hai.
20Dukhyáre ko raushní,
Aur talḳhján ko zindagí kyúṉ miltí hai?
21Jo maut kí ráh dekhte haiṉ, par wuh átí nahíṉ;
Aur chhipe ḳhazánoṉ se ziyáda us ke joyán haiṉ;
22Jo niháyat shádmán
Aur ḳhush hote haiṉ jab qabr ko pá lete haiṉ.
23Aise ádmí ko raushní kyúṉ miltí hai, jis kí ráh chhipí hai,
Aur jise Ḳhudá ne har taraf se band kar diyá hai?
24Kyúṉki mere kháne kí jagah merí áheṉ haiṉ,
Aur merá karáhná pání kí tarah járí hai.
25Kyúṉki jis bát se maiṉ ḍartá húṉ, wuhí mujh par átí hai;
Aur jis bát ká mujhe ḳhauf hotá hai, wuhí mujh par guzartí hai.
26Kyúṉki mujhe na chain hai, na árám, na mujhe kal paṛtí hai,
Balki musíbat hí átí hai.
Currently Selected:
Aiyúb 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
