Yasa‘iyáh 65
65
1Jo mere tálib na the, maiṉ un kí taraf mutawajjih húá; jinhoṉ ne mujhe ḍhúṉḍhá na thá, mujhe pá liyá: maiṉ ne ek qaum se jo mere nám se nahíṉ kahlátí thí, farmáyá, Dekh, maiṉ házir húṉ. 2Maiṉ ne sarkash logoṉ kí taraf jo apní fikroṉ kí pairawí meṉ burí ráh par chalte haiṉ, hamesha háth phailáe; 3aise log jo hamesha mere rúbarú bág̣oṉ meṉ qurbáníáṉ karne aur íṉṭoṉ par ḳhushbú jaláne se mujhe barafroḳhta karte haiṉ; 4jo qabroṉ meṉ baiṭhte aur poshída jagahoṉ meṉ rát káṭte: aur súar ká gosht kháte haiṉ, aur jin ke bartanoṉ meṉ nafratí chízoṉ ká shorbá maujúd hai; 5jo kahte haiṉ, ki Alag hí khaṛá rah, mere nazdík na á, kyúṉki maiṉ tujh se ziyáda pák húṉ: yih merí nák meṉ dhuweṉ kí mánind aur din bhar jalnewálí ág kí tarah haiṉ. 6Dekho, mere áge yih qalamband húá hai, pas maiṉ ḳhámosh na rahúṉgá, balki badla dúṉgá, Ḳhudáwand farmátá hai; háṉ, un kí god meṉ ḍál dúṉgá, 7tumhárí aur tumháre bápdádá kí badkirdárí ká badla ikaṭṭhá dúṉgá, jo paháṛoṉ par ḳhushbú jaláte aur ṭíloṉ par merí takfír karte the: pas maiṉ pahle un ke kámoṉ ko un kí god meṉ nápkar dúṉgá.
8 Ḳhudáwand yúṉ farmátá hai, ki Jis tarah shíra ḳhosha e angúr meṉ maujúd hai, aur koí kahe, Use ḳharáb na kar, kyúṉki us meṉ barakat hai: usí tarah maiṉ apne bandoṉ kí ḳhátir karúṉgá, táki un sab ko halák na karúṉ. 9Aur maiṉ Ya‘qúb meṉ se ek nasl aur Yahúdáh meṉ se apne kohistán ká wáris barpá karúṉgá: aur mere barguzída log us ke wáris hoṉge, aur mere bande waháṉ baseṉge. 10Aur Shárún galloṉ ká ghar hogá, aur ‘Akúr kí wádí bailoṉ ke baiṭhne ká maqám, mere un logoṉ ke liye jo mere tálib húe. 11Lekin tum jo Ḳhudáwand ko tark karte, aur us ke koh i muqaddas ko farámosh karte, aur Mushtarí ke liye dastarḳhwán chunte, aur Zuhra ke liye sharáb i mamzoj ká jám pur karte ho; 12maiṉ tum ko gin ginkar talwár ke hawála karúṉgá, aur tum sab zabh hone ke liye ḳham hoge: kyúṉki jab maiṉ ne buláyá, to tum ne jawáb na diyá; jab maiṉ ne kalám kiyá, to tum ne na suná; balki tum ne wuhí kiyá, jo merí nazar meṉ burá thá, aur wuh chíz pasand kí, jis se maiṉ ḳhush na thá.
13Is liye Ḳhudáwand Ḳhudá yúṉ farmátá hai, ki Dekho, mere bande kháeṉge, par tum bhúke rahoge: mere bande píeṉge, par tum piyáse rahoge: mere bande shádmán hoṉge, par tum sharminda hoge: 14aur mere bande dil kí ḳhushí se gáeṉge, par tum dilgírí ke sabab se nálán hoge, aur jánkáhí se wáwailá karoge. 15Aur tum apná nám mere barguzídoṉ kí la‘nat ke liye chhoṛ jáoge, Ḳhudáwand Ḳhudá tum ko qatl karegá; aur apne bandoṉ ko ek dúsre nám se buláegá; 16yaháṉ tak ki jo koí rú e zamín par apne liye du‘á e khair kare, Ḳhudá e barhaqq ke nám se karegá; aur jo koí zamín meṉ qasam kháe, Ḳhudá e barhaqq ke nám se kháegá; kyúṉki guzashta musíbateṉ farámosh ho gayíṉ, aur wuh merí áṉkhoṉ se poshída haiṉ. 17Kyúṉki dekho, maiṉ naye ásmán aur nayí zamín ko paidá kartá húṉ: aur pahlí chízoṉ ká phir zikr na hogá, aur wuh ḳhayál meṉ na áeṉgí. 18Balki tum merí is nayí ḳhilqat se abadí ḳhushí aur shádmání karo: kyúṉki dekho, maiṉ Yarúshalem ko ḳhushí aur us ke logoṉ ko ḳhurramí banáúṉgá. 19Aur maiṉ Yarúshalem se ḳhush aur apne logoṉ se masrúr húṉgá: aur us meṉ rone kí sadá aur nále kí áwáz phir kabhí sunáí na degí. 20Phir kabhí waháṉ koí aisá laṛká na hogá, jo kam‘umr rahe, aur na koí aisá búṛhá jo apní ‘umr púrí na kare: kyúṉki laṛká sau baras ká hokar maregá; aur jo gunahgár sau baras ká ho jáe, mal‘ún hogá. 21Wuh ghar banáeṉge, aur un meṉ baseṉge; wuh tákistán lagáeṉge, aur un ke mewe kháeṉge. 22Na ki wuh banáeṉ, aur dúsrá base; wuh lagáeṉ, aur dúsrá kháe: kyúṉki mere bandoṉ ke aiyám daraḳht ke aiyám kí mánind hoṉge, aur mere barguzíde apne háthoṉ ke kám se muddatoṉ tak fáida uṭháeṉge. 23Un kí mihnat besúd na hogí, aur un kí aulád nágahán halák na hogí; kyúṉki wuh apní aulád samet Ḳhudáwand ke mubárak logoṉ kí nasl haiṉ. 24Aur yúṉ hogá, ki maiṉ un ke pukárne se pahle jawáb dúṉgá, aur wuh hanoz kah na chukeṉge, ki maiṉ sun lúṉgá. 25Bheṛiyá aur barra ikaṭṭhe chareṉge, aur sher i babar bail kí mánind bhúsá kháegá: aur sáṉp kí ḳhurák ḳhák hogí. Wuh mere tamám koh i muqaddas par na zarar pahuṉcháeṉge na halák kareṉge, Ḳhudáwand farmátá hai.
Currently Selected:
Yasa‘iyáh 65: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
