Yasa‘iyáh 66
66
1 Ḳhudáwand yúṉ farmátá hai, ki Ásmán merá taḳht hai, aur zamín mere páṉw kí chaukí; tum mere liye kaisá ghar banáoge, aur kaun sí jagah merí árámgáh hogi? 2Kyúṉki yih sab chízeṉ to mere háth ne banáíṉ, aur yúṉ manjúd húíṉ, Ḳhudáwand farmátá hai; lekin maiṉ us shaḳhs par nigáh karúṉgá, usí par jo g̣aríb aur shikastadil hai, aur mere kalám se káṉp játá hai. 3Jo bail zabh kartá hai, us kí mánind hai, jo kisí ádmí ko már ḍáltá hai; aur jo barra kí qurbání kartá hai, us ke barábar hai, jo kutte kí gardan káṭtá hai; jo hadya látá hai, goyá súar ká lahú guzrántá hai; jo lubán jalátá hai, us kí mánind hai, jo but ko mubárak kahtá hai; háṉ, unhoṉ ne apní apní ráheṉ chun líṉ, aur un ke dil un kí nafratí chízoṉ se masrúr haiṉ; 4maiṉ bhí un ke liye áfatoṉ ko chun lúṉgá; aur jin bátoṉ se wuh ḍarte haiṉ, un par láúṉgá; kyúṉki jab maiṉ ne pukárá, to kisí ne jawáb na diyá; jab maiṉ ne kalám kiyá, to unhoṉ ne na suná; balki unhoṉ ne wuhí kiyá jo merí nazar meṉ burá thá, aur wuh chíz pasand kí jis se maiṉ ḳhush na thá.
5 Ḳhudáwand kí bát suno, ai tum jo us ke kalám se káṉpte ho: Tumháre bháí jo tum se kína rakhte haiṉ, aur mere nám kí ḳhátir tum ko ḳhárij kar dete haiṉ, kahte haiṉ, Ḳhudáwand kí tamjíd karo, táki ham tumhárí ḳhushí ko dekheṉ; lekin wuhí sharminda hoṉge. 6Shahr se hujúm ká shor, haikal kí taraf se ek nidá, Ḳhudáwand kí áwáz hai, jo apne dushmanoṉ ko badla detá hai. 7Peshtar is se ki use dard lage, us ne janam diyá; aur is se pahle ki us ko dard ho, us se beṭá paidá húá. 8Aisí bát kis ne suní? aisí chízeṉ kis ne dekhíṉ? Kyá ek din meṉ koí mulk paidá ho saktá hai? kyá yakbáragí ek qaum paidá ho jáegí? kyúṉki Siyyún ko dard lage hí the, ki us kí aulád paidá ho gayí. 9Ḳhudáwand farmátá hai, Kyá maiṉ use wiládat ke waqt tak láúṉ, aur phir us se wiládat na karáúṉ? terá Ḳhudá farmátá hai, Kyá maiṉ jo wiládat tak látá húṉ, wiládat se báz rakkhúṉ?
10Tum Yarúshalem ke sáth ḳhushí manáo, aur us ke sabab se shádmán ho, us ke sab dosto: jo us ke liye mátam karte the, us ke sáth niháyat ḳhush ho: 11táki tum dúdh piyo, aur us ke tasallí ke pistánoṉ se ser ho; táki tum níchoṛo, aur us kí shaukat kí firáwání se hazz uṭháo. 12Kyúṉki Ḳhudáwand yúṉ farmátá hai, ki Dekh, maiṉ salámatí nahr kí mánind, aur qaumoṉ kí daulat sailáb kí tarah us ke pás rawáṉ karúṉgá, tab tum dúdh píoge; aur bag̣al meṉ uṭháe jáoge; aur ghuṭnoṉ par kudáe jáoge. 13Jis tarah máṉ apne beṭe ko dilásá detí hai, usí tarah maiṉ tum ko dilásá dúṉgá; Yarúshalem hí meṉ tum tasallí páoge. 14Aur tum dekhoge, aur tumhárá dil ḳhush hogá, aur tumhárí haḍḍiyáṉ sabze kí mánind nashw o numá kareṉgí: aur Ḳhudáwand ká háth apne bandoṉ par záhir hogá, par us ká qahr us ke dushmanoṉ par bhaṛkegá. 15Kyúṉki dekho, Ḳhudáwand ág ke sáth áegá, aur us ke rath girdbád kí mánind hoṉge; táki apne qahr ko josh ke sáth aur apní tambíh ko ág ke shu‘le meṉ záhir kare. 16Kyúṉki ág se aur apní talwár se Ḳhudáwand tamám baní Ádam ká muqábala karegá: aur Ḳhudáwand ke maqtúl bahut se hoṉge. 17Wuh jo bág̣oṉ ke wasat meṉ kisí ke píchhe khaṛe hone ke liye apne áp ko pák o sáf karte haiṉ, jo súar ká gosht aur makrúh chízeṉ aur chúhe kháte haiṉ; Ḳhudáwand farmátá hai, Wuh báham faná ho jáeṉge. 18Aur maiṉ un ke kám aur un ke mansúbe jántá húṉ. Wuh waqt átá hai, ki maiṉ tamám qaumoṉ aur ahl i lug̣at ko jama‘ karúṉgá; aur wuh áeṉge, aur merá jalál dekheṉge. 19Tab maiṉ un ke darmiyán ek nishán nasb karúṉgá; aur maiṉ un ko jo un meṉ se bach nikleṉ, qaumoṉ kí taraf bhejúṉgá, ya‘ní Tarsís, aur Púl, aur Lúd ko jo tírandáz haiṉ, aur Túbal, aur Yáwán ko, aur dúr ke jazíroṉ ko, jinhoṉ ne merí shuhrat nahíṉ suní, aur merá jalál nahíṉ dekhá; aur wuh qaumoṉ ke darmiyán merá jalál bayán kareṉge. 20Aur Ḳhudáwand farmátá hai, ki Wuh tumháre sab bháiyoṉ ko tamám qaumoṉ meṉ se ghoṛoṉ aur rathoṉ par, aur pálkiyoṉ meṉ, aur ḳhachcharoṉ par aur sáṉḍniyoṉ par biṭhákar Ḳhudáwand ke hadye ke liye Yarúshalem meṉ mere koh i muqaddas ko láeṉge, jis tarah se baní Isráíl Ḳhudáwand ke ghar meṉ pák bartanoṉ meṉ hadya láte haiṉ. 21Aur Ḳhudáwand farmátá hai, ki Maiṉ un meṉ se bhí káhin aur Láwí hone ke liye lúṉgá. 22Ḳhudáwand farmátá hai, Jis tarah nayá ásmán aur nayí zamín jo maiṉ banáúṉgá, mere huzúr qáim raheṉge, usí tarah tumhárí nasl aur tumhárá nám báqí rahegá. 23Aur yúṉ hogá, Ḳhudáwand farmátá hai, ki ek naye chánd se dúsre tak, aur ek sabt se dúsre tak har fard i bashar ‘ibádat ke liye mere huzúr áegá. 24Aur wuh nikal nikalkar un logoṉ kí láshoṉ par jo mujh se bágí húe nazar kareṉge; kyúṉki un ká kíṛá na maregá, aur un kí ág na bujhegí, aur wuh tamám baní Ádam ke liye nafratí hoṉge.
Currently Selected:
Yasa‘iyáh 66: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
