Popular Bible Verses from Yasa‘iyáh 65

Share

Aur yúṉ hogá, ki maiṉ un ke pukárne se pahle jawáb dúṉgá, aur wuh hanoz kah na chukeṉge, ki maiṉ sun lúṉgá.

Kyúṉki dekho, maiṉ naye ásmán aur nayí zamín ko paidá kartá húṉ: aur pahlí chízoṉ ká phir zikr na hogá, aur wuh ḳhayál meṉ na áeṉgí.

Un kí mihnat besúd na hogí, aur un kí aulád nágahán halák na hogí; kyúṉki wuh apní aulád samet ḲHUDáWAND ke mubárak logoṉ kí nasl haiṉ.

Na ki wuh banáeṉ, aur dúsrá base; wuh lagáeṉ, aur dúsrá kháe: kyúṉki mere bandoṉ ke aiyám daraḳht ke aiyám kí mánind hoṉge, aur mere barguzíde apne háthoṉ ke kám se muddatoṉ tak fáida uṭháeṉge.

Phir kabhí waháṉ koí aisá laṛká na hogá, jo kam‘umr rahe, aur na koí aisá búṛhá jo apní ‘umr púrí na kare: kyúṉki laṛká sau baras ká hokar maregá; aur jo gunahgár sau baras ká ho jáe, mal‘ún hogá.

Bheṛiyá aur barra ikaṭṭhe chareṉge, aur sher i babar bail kí mánind bhúsá kháegá: aur sáṉp kí ḳhurák ḳhák hogí. Wuh mere tamám koh i muqaddas par na zarar pahuṉcháeṉge na halák kareṉge, ḲHUDáWAND farmátá hai.

Aur maiṉ Yarúshalem se ḳhush aur apne logoṉ se masrúr húṉgá: aur us meṉ rone kí sadá aur nále kí áwáz phir kabhí sunáí na degí.