Yasa‘iyáh 60
60
1Uṭh, munawwar ho; kyúṉki terá núr á gayá, aur Ḳhudáwand ká jalál tujh par záhir húá. 2Kyúṉki dekh, táríkí zamín par chhá jáegí, aur tíragí ummatoṉ par; lekin Ḳhudáwand tujh par táli‘ hogá, aur us ká jalál tujh par numáyáṉ hogá. 3Aur qaumeṉ terí raushní kí taraf áeṉgí, aur salátín tere tulú‘ kí tajallí meṉ chaleṉge. 4Apní áṉkheṉ uṭhákar chároṉ taraf dekh, wuh sab ke sab ikaṭṭhe hote haiṉ, aur tere pás áte haiṉ; tere beṭe dúr se áeṉge, aur terí beṭiyoṉ ko god meṉ uṭhákar láeṉge. 5Tab tú dekhegí, aur munawwar hogí; háṉ, terá dil uchhlegá, aur kusháda hogá; kyúṉki samundar kí firáwání terí taraf phiregí, aur qaumoṉ kí daulat tere pás faráham hogí. 6U ṉṭoṉ kí qatáreṉ, aur Midyán aur ‘Aifah kí sáṉḍniyáṉ ákar tere gird beshumár hoṉgí; wuh sab Sabá se áeṉge, aur soná aur lubán láeṉge, aur Ḳhudáwand kí hamd ká i‘lán kareṉge. 7Qídár kí sab bheṛeṉ tere pás jama‘ hoṉgí, Nabáyot ke meṉḍhe terí ḳhidmat meṉ házir hoṉge: wuh mere mazbah par maqbúl hoṉge, aur maiṉ apní shaukat ke ghar ko jalál baḳhshúṉgá. 8Yih kaun haiṉ, jo bádal kí tarah uṛe chale áte haiṉ, aur jaise kabútar apní kábuk kí taraf? 9Yaqínan jazíre merí ráh dekheṉge, aur Tarsís ke jaház pahle áeṉge, ki tere beṭoṉ ko un kí chándí aur un ke sone samet dúr se Ḳhudáwand tere Ḳhudá aur Isráíl ke Quddús ke nám ke liye láeṉ; kyúṉki us ne tujhe buzurgí baḳhshí hai. 10Aur begánoṉ ke beṭe terí díwáreṉ banáeṉge, aur un ke bádsháh terí ḳhidmatguzárí kareṉge: agarchi maiṉ ne apne qahr se tujhe márá, par apní mihrbání se maiṉ tujh par rahm karúṉgá. 11Aur tere pháṭak hamesha khule raheṉge; wuh din rát kabhí band na hoṉge; táki qaumoṉ kí daulat aur un ke bádsháhoṉ ko tere pás láeṉ. 12Kyúṉki wuh qaum aur wuh mamlukat jo terí ḳhidmatguzárí na karegí barbád ho jáegí; háṉ, wuh qaumeṉ bi’lkull halák kí jáeṉgí. 13Lubnán ká jalál tere pás áegá, saro aur sanaubar aur deodár sab áeṉge; táki mere maqdis ko árásta kareṉ; aur maiṉ apne páṉwoṉ kí kursí ko raunaq baḳhshúṉgá. 14Aur tere g̣áratgaroṉ ke beṭe tere sámne jhukte húe áeṉge; aur terí tahqír karnewále sab tere qadamoṉ par gireṉge; aur wuh terá nám Ḳhudáwand ká shahr, Isráíl ke Quddús ká Siyyún rakkheṉge. 15Is liye ki tú tark kí gayí, aur tujh se nafrat húí, aisá ki kisí ádmí ne terí taraf guzar bhí na kiyá; maiṉ tujhe abadí fazílat aur pusht dar pusht kí shádmání ká bá‘is banáúṉgá. 16Tú qaumoṉ ká dúdh bhí pí legí; háṉ, bádsháhoṉ kí chhátí chúsegí: aur tú jánegí, ki maiṉ Ḳhudáwand terá naját denewálá aur Ya‘qúb ká Qádir terá fidya denewálá húṉ. 17Maiṉ pítal ke badle soná láúṉgá, aur lohe ke badle chándí, aur lakṛí ke badle pítal, aur pattharoṉ ke badle lohá: aur maiṉ tere hákimoṉ ko salámatí, aur tere ‘ámiloṉ ko sadáqat banáúṉgá. 18Phir kabhí tere mulk meṉ zulm ká zikr na hogá, aur na terí hudúd ke andar ḳharábí yá barbádí ká; balki tú apní díwároṉ ká nám Naját, aur apne pháṭakoṉ ká Hamd rakkhegí. 19Phir terí raushní na din ko súraj se hogí, na chánd ke chamakne se; balki Ḳhudáwand terá abadí núr, aur terá Ḳhudá terá jalál hogá. 20Terá súraj phir kabhí na ḍhalegá, aur tere chánd ko zawál na hogá; kyúṉki Ḳhudáwand terá abadí núr hogá, aur tere mátam ke din ḳhatm ho jáeṉge. 21Aur tere log sab ke sab rástbáz hoṉge; wuh abad tak mulk ke wáris hoṉge, ya‘ní merí lagáí húí sháḳh aur merí dastkárí ṭhahreṉge, táki merá jalál záhir ho. 22Sab se chhoṭá ek hazár ho jáegá, aur sab se haqír ek zabardast qaum: maiṉ Ḳhudáwand ‘ain waqt par yih sab kuchh jald karúṉgá.
Currently Selected:
Yasa‘iyáh 60: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
