Yasa‘iyáh 59
59
1Dekho, Ḳhudáwand ká háth chhoṭá nahíṉ ho gayá ki bachá na sake, aur us ká kán bhárí nahíṉ ki sun na sake. 2Balki tumhárí badkirdárí ne tumháre aur tumháre Ḳhudá ke darmiyán judáí kar dí hai, aur tumháre gunáhoṉ ne use tum se rúposh kiyá, aisá ki wuh nahíṉ suntá. 3Kyúṉki tumháre háth ḳhún se, aur tumhárí ungliyáṉ badkirdárí se álúda haiṉ: tumháre lab jhúṭh bolte, aur tumhárí zabán sharárat kí báteṉ baktí hai. 4Koí insáf kí bát pesh nahíṉ kartá, aur koí sachcháí se hujjat nahíṉ kartá; wuh batálat par tawakkul karte haiṉ, aur jhúṭh bolte haiṉ: wuh ziyánkárí se bárdár hokar badkirdárí ko janam dete haiṉ. 5Wuh afa‘í ke anḍe sete, aur makṛí ká jálá tante haiṉ; jo un ke anḍoṉ meṉ se kuchh kháe, mar jáegá, aur jo un meṉ se toṛá jáe, us se afa‘í niklegá. 6Un ke jále se poshák nahíṉ banegí, wuh apní dastkárí se mulabbas na hoṉge; un ke a‘mál badkirdárí ke haiṉ, aur zulm ká kám un ke háthoṉ meṉ hai. 7Un ke páṉw badí kí taraf dauṛte haiṉ, aur wuh begunáh ká ḳhún baháne ke liye jaldí karte haiṉ: un ke ḳhayálát badkirdárí ke haiṉ; tabáhí aur halákat un kí ráhoṉ meṉ hai. 8Wuh salámatí ká rásta nahíṉ jánte, aur un kí rawish meṉ insáf nahíṉ; wuh apne liye teṛhí ráh banáte haiṉ; jo koí us meṉ jáegá, salámatí ko na dekhegá. 9Is liye insáf ham se dúr hai, aur sadáqat hamáre nazdík nahíṉ átí; ham núr ká intizár karte haiṉ, par dekho, táríkí hai; aur raushní ká, par andhere meṉ chalte haiṉ. 10Ham díwár ko andhe kí tarah ṭaṭolte haiṉ; háṉ, yúṉ ṭaṭolte haiṉ, ki goyá hamárí áṉkheṉ nahíṉ; ham do pahar ko yúṉ ṭhokar kháte haiṉ, goyá rát ho gayí; ham tandurustoṉ ke darmiyán goyá murda haiṉ. 11Ham sab ke sab ríchhoṉ kí mánind g̣urráte haiṉ, aur kabútaroṉ kí tarah kuṛhte haiṉ; ham insáf kí ráh takte haiṉ, par wuh kahíṉ nahíṉ; aur naját ke muntazir haiṉ, par wuh ham se dúr hai. 12Kyúṉki hamárí ḳhatáeṉ tere huzúr bahut haiṉ, aur hamáre gunáh ham par gawáhí dete haiṉ; kyúṉki hamárí ḳhatáeṉ hamáre sáth haiṉ, aur ham apní badkirdárí ko jánte haiṉ: 13ki ham ne ḳhatá kí, Ḳhudáwand ká inkár kiyá, aur apne Ḳhudá kí pairawí se bargashta ho gaye; ham ne zulm aur sarkashí kí báteṉ kíṉ, aur dil meṉ bátil tasawwur karke darog̣goí kí. 14‘Adálat haṭáí gayí, aur insáf dúr khaṛá ho rahá; sadáqat bázár meṉ gir paṛí, aur rástí dáḳhil nahíṉ ho saktí. 15Háṉ, rástí gum ho gayí, aur wuh jo badí se bhágtá hai, shikár ho játá hai: Ḳhudáwand ne yih dekhá, aur us kí nazar meṉ burá ma‘lúm húá, ki ‘adálat játí rahí. 16Aur us ne dekhá ki koí ádmí nahíṉ, aur ta‘ajjub kiyá, ki koí shafá‘at karnewálá nahíṉ; is liye usí ke bázú ne us ke liye naját hásil kí, aur usí kí rástbází ne use sambhálá. 17Háṉ, us ne rástbází ká baktar pahiná, aur naját ká ḳhod apne sir par rakkhá; aur us ne libás kí jagah intiqám kí poshák pahiní, aur g̣airat ke jubbe se mulabbas húá. 18Wuh un ko un ke a‘mál ke mutábiq jazá degá, apne muḳhálifoṉ par qahr karegá, aur apne dushmanoṉ ko sazá degá, aur jazíroṉ ko badla degá. 19Tab mag̣rib ke báshinde Ḳhudáwand ke nám se ḍareṉge, aur mashriq ke báshinde us ke jalál se; kyúṉki wuh daryá ke sailáb kí tarah áegá, jo Ḳhudáwand ke dam se rawáṉ ho. 20Aur Ḳhudáwand farmátá hai, ki Siyyún meṉ, aur un ke pás jo Ya‘qúb meṉ ḳhatákárí se báz áte haiṉ, ek fidya denewálá áegá. 21Kyúṉki un ke sáth merá ‘ahd yih hai, Ḳhudáwand farmátá hai, ki merí rúh jo tujh par hai, aur merí báteṉ jo maiṉ ne tere muṉh meṉ ḍálí haiṉ, tere muṉh se, aur terí nasl ke muṉh se, aur terí nasl kí nasl ke muṉh se ab se lekar abad tak játí na raheṉgí; Ḳhudáwand ká yihí irshád hai.
Currently Selected:
Yasa‘iyáh 59: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
