Popular Bible Verses from Yasa‘iyáh 60

Share

Uṭh, munawwar ho; kyúṉki terá núr á gayá, aur ḲHUDáWAND ká jalál tujh par záhir húá.

Aur qaumeṉ terí raushní kí taraf áeṉgí, aur salátín tere tulú‘ kí tajallí meṉ chaleṉge.

Kyúṉki dekh, táríkí zamín par chhá jáegí, aur tíragí ummatoṉ par; lekin ḲHUDáWAND tujh par táli‘ hogá, aur us ká jalál tujh par numáyáṉ hogá.

Sab se chhoṭá ek hazár ho jáegá, aur sab se haqír ek zabardast qaum: maiṉ ḲHUDáWAND ‘ain waqt par yih sab kuchh jald karúṉgá.

Phir terí raushní na din ko súraj se hogí, na chánd ke chamakne se; balki ḲHUDáWAND terá abadí núr, aur terá Ḳhudá terá jalál hogá.

Terá súraj phir kabhí na ḍhalegá, aur tere chánd ko zawál na hogá; kyúṉki ḲHUDáWAND terá abadí núr hogá, aur tere mátam ke din ḳhatm ho jáeṉge.

Tab tú dekhegí, aur munawwar hogí; háṉ, terá dil uchhlegá, aur kusháda hogá; kyúṉki samundar kí firáwání terí taraf phiregí, aur qaumoṉ kí daulat tere pás faráham hogí.

Apní áṉkheṉ uṭhákar chároṉ taraf dekh, wuh sab ke sab ikaṭṭhe hote haiṉ, aur tere pás áte haiṉ; tere beṭe dúr se áeṉge, aur terí beṭiyoṉ ko god meṉ uṭhákar láeṉge.

Aur tere log sab ke sab rástbáz hoṉge; wuh abad tak mulk ke wáris hoṉge, ya‘ní merí lagáí húí sháḳh aur merí dastkárí ṭhahreṉge, táki merá jalál záhir ho.

Phir kabhí tere mulk meṉ zulm ká zikr na hogá, aur na terí hudúd ke andar ḳharábí yá barbádí ká; balki tú apní díwároṉ ká nám Naját, aur apne pháṭakoṉ ká Hamd rakkhegí.

Aur tere pháṭak hamesha khule raheṉge; wuh din rát kabhí band na hoṉge; táki qaumoṉ kí daulat aur un ke bádsháhoṉ ko tere pás láeṉ.

U ṉṭoṉ kí qatáreṉ, aur Midyán aur ‘Aifah kí sáṉḍniyáṉ ákar tere gird beshumár hoṉgí; wuh sab Sabá se áeṉge, aur soná aur lubán láeṉge, aur ḲHUDáWAND kí hamd ká i‘lán kareṉge.

Aur begánoṉ ke beṭe terí díwáreṉ banáeṉge, aur un ke bádsháh terí ḳhidmatguzárí kareṉge: agarchi maiṉ ne apne qahr se tujhe márá, par apní mihrbání se maiṉ tujh par rahm karúṉgá.

Is liye ki tú tark kí gayí, aur tujh se nafrat húí, aisá ki kisí ádmí ne terí taraf guzar bhí na kiyá; maiṉ tujhe abadí fazílat aur pusht dar pusht kí shádmání ká bá‘is banáúṉgá.

Tú qaumoṉ ká dúdh bhí pí legí; háṉ, bádsháhoṉ kí chhátí chúsegí: aur tú jánegí, ki maiṉ ḲHUDáWAND terá naját denewálá aur Ya‘qúb ká Qádir terá fidya denewálá húṉ.