Yasa‘iyáh 61
61
1Ḳhudáwand Ḳhudá kí rúh mujh par hai; kyúṉki us ne mujhe masah kiyá, táki ḳhushḳhabarí sunáúṉ; us ne mujhe bhejá hai, ki shikastadiloṉ ko tasallí dúṉ, qaidíoṉ ke liye riháí, aur asíroṉ ke liye ázádí ká i‘lán karúṉ; 2táki Ḳhudáwand ke sál i maqbúl ká, aur apne Ḳhudá ke intiqám ke roz ká ishtihár dúṉ; aur sab g̣amgínoṉ ko dilásá dúṉ; 3Siyyún ke g̣amzadoṉ ke liye yih muqarrar kar dúṉ, ki un ko rákh ke badle sihrá, aur mátam kí jagah ḳhushí ká raug̣an, aur udásí ke badle sitáish ká ḳhil‘at baḳhshúṉ; táki wuh sadáqat ke daraḳht, aur Ḳhudáwand ke lagáe húe kahláeṉ, ki us ká jalál záhir ho.
4Tab wuh puráne ujáṛ makánoṉ ko ta‘mír kareṉge, aur qadím wíráníoṉ ko phir biná kareṉge; aur un ujṛe shahroṉ kí marammat kareṉge, jo pusht dar pusht ujáṛ paṛe the. 5Pardesí á khaṛe hoṉge, aur tumháre galloṉ ko charáeṉge, aur begánoṉ ke beṭe tumháre hal chalánewále aur tákistánoṉ meṉ kám karnewále hoṉge. 6Par tum Ḳhudáwand ke káhin kahláoge: wuh tum ko hamáre Ḳhudá ke ḳhádim kaheṉge: tum qaumoṉ ká mál kháoge, aur tum un kí shaukat par faḳhr karoge. 7Tumhárí ḳhajálat ká ‘iwaz do chand milegá; wuh apní ruswáí ke badle apne hisse se ḳhush hoṉge: pas wuh apne mulk meṉ do chand ke málik hoṉge: aur un ko abadí shádmání hogí. 8Kyúṉki maiṉ Ḳhudáwand insáf ko ‘azíz rakhtá húṉ, aur g̣áratgarí aur zulm se nafrat kartá húṉ; so maiṉ sachcháí se un ke kámoṉ ká ajr dúṉgá, aur un ke sáth abadí ‘ahd báṉdhúṉgá. 9Un kí nasl qaumoṉ ke darmiyán námwar hogí, aur un kí aulád logoṉ ke darmiyán: wuh sab jo un ko dekheṉge, iqrár kareṉge, ki yih wuh nasl hai, jise Ḳhudáwand ne barakat baḳhshí hai.
10Maiṉ Ḳhudáwand se bahut shádmán húṉgá; merí ján mere Ḳhudá meṉ masrúr hogí; kyúṉki us ne mujhe naját ke kapṛe pahináe, us ne rástbází ke ḳhil‘at se mujhe mulabbas kiyá, jaise dulhá sihre se apne áp ko árásta kartá hai, aur dulhan apne zewaroṉ se apná siṉgár kartí hai. 11Kyúṉki jis tarah zamín apní nabátát ko paidá kartí hai, aur jis tarah bág̣ un chízoṉ ko jo us meṉ boí gayí haiṉ ugátá hai; usí tarah Ḳhudáwand Ḳhudá sadáqat aur sitáish ko tamám qaumoṉ ke sámne zuhúr meṉ láegá.
Currently Selected:
Yasa‘iyáh 61: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
