Yasa‘iyáh 56
56
1 Ḳhudáwand yúṉ farmátá hai, ‘Adl ko qáim rakkho, aur sadáqat ko ‘amal meṉ láo; kyúṉki merí naját nazdík hai, aur merí sadáqat záhir honewálí hai. 2Mubárak hai wuh insán jo is par ‘amal kartá hai, aur wuh ádamzád jo is par qáim rahtá hai; jo sabt ko mántá, aur use nápák nahíṉ kartá, aur apná háth har tarah kí badí se báz rakhtá hai. 3Aur begáne ká farzand jo Ḳhudáwand se mil gayá hazgiz na kahe, Ḳhudáwand mujh ko apne logoṉ se judá kar degá: aur ḳhoja na kahe, ki Dekho, maiṉ to súkhá daraḳht húṉ. 4Kyúṉki Ḳhudáwand yúṉ farmátá hai, ki Wuh ḳhoje jo mere sabtoṉ ko mánte haiṉ, aur un kámoṉ ko jo mujhe pasand haiṉ iḳhtiyár karte haiṉ, aur mere ‘ahd par qáim rahte haiṉ, 5maiṉ un ko apne ghar meṉ, aur apní chárdíwárí ke andar aisá nám o nishán baḳhshúṉgá, jo beṭoṉ aur beṭiyoṉ se bhí baṛhkar hogá; maiṉ har ek ko ek abadí nám dúṉgá, jo miṭáyá na jáegá. 6Aur begáne kí aulád bhí, jinhoṉ ne apne áp ko Ḳhudáwand se paiwasta kiyá hai ki us kí ḳhidmat kareṉ, aur Ḳhudáwand ke nám ko ‘aziz rakkheṉ, aur us ke bande hoṉ, wuh sab jo sabt ko hifz karke use nápák na kareṉ, aur mere ‘ahd par qáim raheṉ; 7maiṉ un ko bhí apne koh i muqaddas par láúṉgá, aur apní ‘ibádatgáh meṉ un ko shádmán karúṉgá; aur un kí soḳhtaní qurbáníáṉ aur un ke zabíhe mere mazbah par maqbúl hoṉge; kyúṉki merá ghar sab logoṉ kí ‘ibádatgáh kahláegá. 8Ḳhudáwand Ḳhudá jo Isráíl ke paráganda logoṉ ko jama‘ karnewálá hai, yúṉ farmátá hai, ki Maiṉ un ke siwá jo usí ke hokar jama‘ húe haiṉ, auroṉ ko bhí us ke pás jama‘ karúṉgá.
9Ai dashtí haiwáno, tum sab ke sab kháne ko áo, háṉ, ai jangal ke sab darando. 10Us ke nigahbán andhe haiṉ, wuh sab jáhil haiṉ; wuh sab gúṉge kutte haiṉ, jo bhauṉk nahíṉ sakte; wuh ḳhwáb dekhnewále haiṉ, jo paṛe rahte haiṉ, aur úṉghte rahná pasand karte haiṉ. 11Aur wuh lálachí kutte haiṉ, jo kabhí ser nahíṉ hote; wuh nádán charwáhe haiṉ, wuh sab apní apní ráh ko phir gaye; har ek har taraf se apná hí nafa‘ ḍhúṉḍhtá hai. 12Har ek kahtá hai, Tum áo, maiṉ sharáb láúṉgá, aur ham ḳhúb nashe meṉ chúr hoṉge, aur kal bhí áj hí kí tarah hogá, balki is se bahut bihtar.
Currently Selected:
Yasa‘iyáh 56: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
