Yasa‘iyáh 55
55
1Ai sab piyáso, pání ke pás áo; aur wuh bhí jis ke pás paisa na ho, áo; mol lo, aur kháo, háṉ, áo, mai aur dúdh bezar aur beqímat ḳharído. 2Tum kis liye apná rupaya us chíz ke liye jo roṭí nahíṉ, aur apní mihnat us chíz ke wáste jo ásúda nahíṉ kartí ḳharch karte ho? tum g̣aur se merí suno, aur wuh chíz jo achchhí hai kháo; aur tumhárí ján farbihí se lazzat uṭháe. 3Kán lagáo, aur mere pás áo; suno, aur tumhárí ján zinda rahegí; aur maiṉ tum ko abadí ‘ahd ya‘ní Dáúd kí sachchí ni‘mateṉ baḳhshúṉgá. 4Dekho, maiṉ ne use ummatoṉ ke liye gawáh muqarrar kiyá, balki ummatoṉ ká peshwá aur farmánrawá. 5Dekh, tú ek aisí qaum ko jise tú nahíṉ jántá buláegá, aur ek aisí qaum, jo tujhe nahíṉ jántí thí, Ḳhudáwand tere Ḳhudá aur Isráíl ke Quddús kí ḳhátir tere pás dauṛí áegí; kyúṉki us ne tujhe jalál baḳhshá hai.
6Jab tak Ḳhudáwand mil saktá hai us ke tálib ho; jab tak wuh nazdík hai use pukáro. 7Sharír apní ráh ko tark kare, aur badkirdár apne ḳhayáloṉ ko; aur wuh Ḳhudáwand kí taraf phire, aur wuh us par rahm karegá; aur hamáre Ḳhudá kí taraf, kyúṉki wuh kasrat se mu‘áf karegá. 8Ḳhudáwand farmátá hai, ki Mere ḳhayál tumháre ḳhayál nahíṉ; aur na tumhárí ráheṉ merí ráheṉ haiṉ. 9Kyúṉki jis qadr ásmán zamín se baland hai, usí qadr merí ráheṉ tumhárí ráhoṉ se, aur mere ḳhayál tumháre ḳhayáloṉ se baland haiṉ. 10Kyúṉki jis tarah ásmán se bárish hotí aur barf paṛtí hai, aur phir wuh waháṉ wápas nahíṉ játí, balki zamín ko seráb kartí hai, aur us kí shádábí aur roídagí ká bá‘is hotí hai, táki bonewále ko bíj aur khánewále ko roṭí de, 11usí tarah merá kalám, jo mere muṉh se nikaltá hai, hogá: wuh beanjám mere pás wápas na áegá, balki jo kuchh merí ḳhwáhish hogí, wuh use púrá karegá, aur us kám meṉ jis ke liye maiṉ ne use bhejá mu’assir hogá. 12Kyúṉki tum ḳhushí se nikloge, aur salámatí ke sáth rawána kiye jáoge; paháṛ aur ṭíle tumháre sámne nag̣mapardáz hoṉge, aur maidán ke sab daraḳht tál deṉge. 13Káṉṭoṉ kí jagah sanaubar niklegá, aur jháṛí ke badle ás ká daraḳht hogá; aur yih Ḳhudáwand ke liye nám aur abadí nishán hogá, jo kabhí munqata‘ na hogá.
Currently Selected:
Yasa‘iyáh 55: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
