Yasa‘iyáh 49
49
1Ai jazíro, merí suno; ai ummato jo dúr ho, kán lagáo; Ḳhudáwand ne mujhe rihm hí se buláyá; batn i mádar hí se us ne mere nám ká zikr kiyá: 2aur us ne mere muṉh ko tez talwár kí mánind banáyá, aur mujh ko apne háth ke sáye tale chhipáyá: us ne mujhe tír i ábdár kiyá, aur apne tarkash meṉ mujhe chhipá rakkhá: 3aur us ne mujh se kahá, Tú merá ḳhádim hai; tujh meṉ, ai Isráíl, maiṉ apná jalál záhir karúṉgá. 4Tab maiṉ ne kahá, Maiṉ ne befáida mashaqqat uṭháí, maiṉ ne apní quwwat befáida batálat meṉ sarf kí: taubhí yaqínan merá haqq Ḳhudáwand ke sáth, aur merá ajr mere Ḳhudá ke pás hai. 5Chúṉki maiṉ Ḳhudáwand kí nazar meṉ jalílu’l qadr húṉ, aur wuh merí tawánáí hai, is liye wuh jis ne mujhe rihm hí se banáyá, táki us ká ḳhádim hokar Ya‘qúb ko us ke pás wápas láúṉ, aur Isráíl ko us ke pás jama‘ karúṉ, yúṉ farmátá hai, 6háṉ, Ḳhudáwand farmátá hai, ki Yih to halkí sí bát hai, ki tú Ya‘qúb ke qabáil ko barpá karne aur mahfúz Isráílíoṉ ko wápas láne ke liye merá ḳhádim ho: balki maiṉ tujh ko qaumoṉ ke liye núr banáúṉgá; ki tujh se merí naját zamín ke kanároṉ tak pahuṉche. 7Ḳhudáwand Isráíl ká fidya denewálá aur us ká Quddús us ko jise insán haqír jántá hai, aur jis se qaum ko nafrat hai, aur jo hákimoṉ ká chákar hai, yúṉ farmátá hai, ki Bádsháh dekheṉge, aur uṭh khaṛe hoṉge; aur umará sijda kareṉge, Ḳhudáwand ke liye jo sádiqu’l qaul aur Isráíl ká Quddús hai jis ne tujhe barguzída kiyá hai. 8Ḳhudáwand yúṉ farmátá hai, ki Maiṉ ne qubúlíyat ke waqt terí suní, aur naját ke din terí madad kí: aur maiṉ terí hifázat karúṉgá, aur logoṉ ke liye tujhe ek ‘ahd ṭhahráúṉgá, táki mulk ko bahál kare, aur wírán mírás wárisoṉ ko de; 9táki tú qaidíoṉ ko kahe, ki Nikal chalo; aur un ko jo andhere meṉ haiṉ, ki Apne áp ko dikhláo. Wuh rástoṉ meṉ chareṉge, aur sab naṉge ṭíle un kí charágáheṉ hoṉge. 10Wuh na bhúke hoṉge, na piyáse; aur na garmí aur dhúp se un ko zarar pahuṉchegá: kyúṉki wuh jis kí rahmat un par hai, un ká rahnumá hogá, aur pání ke sotoṉ kí taraf un kí rahbarí karegá. 11Aur maiṉ apne sáre kohistán ko ek rásta baná dúṉgá, aur merí sháhráheṉ úṉchí kí jáeṉgí. 12Dekh, yih dúr se, aur yih shimál aur mag̣rib se, aur yih Síním ke mulk se áeṉge. 13Ai ásmáno, gáo; ai zamín, shádmán ho; ai paháṛo, nag̣mapardází karo; kyúṉki Ḳhudáwand ne apne logoṉ ko tasallí baḳhshí hai, aur apne ranjúroṉ par rahm farmáegá.
14Lekin Siyyún kahtí hai, Yahowáh ne mujhe tark kiyá hai, aur Ḳhudáwand mujhe bhúl gayá hai. 15Kyá yih mumkin hai, ki koí máṉ apne shírḳhwár bachche ko bhúl jáe, aur apne rihm ke farzand par tars na kháe? háṉ, wuh sháyad bhúl jáe, par maiṉ tujhe na bhúlúṉgá. 16Dekh, maiṉ ne terí súrat apní hatheliyoṉ par khod rakkhí hai; aur terí shahrpanáh hamesha mere sámne hai. 17Tere farzand jaldí karte haiṉ; aur wuh jo tujhe barbád karne aur ujáṛnewále the, tujh se nikal jáeṉge. 18Apní áṉkheṉ uṭhákar chároṉ taraf nazar kar, yih sab ke sab milkar ikaṭṭhe hote haiṉ, aur tere pás áte haiṉ. Ḳhudáwand farmátá hai, Mujhe apní hayát kí qasam, ki tú yaqínan in sab ko zewar kí mánind pahin legí, aur in se dulhan kí mánind árásta hogí. 19Kyúṉki terí wírán aur ujṛí jagahoṉ meṉ aur tere barbád mulk meṉ ab yaqínan basnewále gunjáish se ziyáda hoṉge, aur tujh ko g̣árat karnewále dúr ho jáeṉge. 20Balki tere wuh beṭe jo tujh se le liye gaye the, tere kánoṉ meṉ phir kaheṉge, ki Basne kí jagah bahut tang hai; ham ko basne kí jagah de. 21Tab tú apne dil meṉ kahegí, Kaun mere liye in ká báp húá? ki maiṉ to láwalad ho gayí, aur akelí thí; maiṉ to jiláwataní aur áwáragí meṉ rahí, so kis ne in ko pálá? Dekh, maiṉ to akelí rah gayí thí; phir yih kaháṉ the?
22 Ḳhudáwand Ḳhudá yúṉ farmátá hai, ki Dekh, maiṉ qaumoṉ par háth uṭháúṉgá, aur ummatoṉ par apná jhanḍá khaṛá karúṉgá; aur wuh tere beṭoṉ ko apní god meṉ liye áeṉge, aur terí beṭiyoṉ ko apne kandhoṉ par biṭhákar pahuṉcháeṉge. 23Aur bádsháh tere murabbí hoṉge, aur un kí bíwiyáṉ terí dáya hoṉgí: wuh tere sámne muṉh ke bal zamín par gireṉge, aur tere paṉwoṉ kí ḳhák cháṭeṉge; aur tú jánegí ki maiṉ hí Ḳhudáwand húṉ, jis ke muntazir sharminda na hoṉge. 24Kyá zabardast se shikár chhín liyá jáegá? aur kyá rástbáz ke qaidí chhuṛá liye jáeṉge? 25Ḳhudáwand yúṉ farmátá hai, ki Zoráwar ke asír bhí le liye jáeṉge, aur muhíb ká shikár chhuṛá liyá jáegá: kyúṉki maiṉ us se jo tere sáth jhagaṛtá hai jhagṛá karúṉgá, aur tere farzandoṉ ko bachá lúṉgá. 26Aur maiṉ tum par zulm karnewáloṉ ko un hí ká gosht khiláúṉgá; aur wuh míṭhí mai kí mánind apná hí lahú píkar badmast ho jáeṉge: aur har fard i bashar jánegá, ki maiṉ Ḳhudáwand terá naját denewálá, aur Ya‘qúb ká Qádir terá fidya denewálá húṉ.
Currently Selected:
Yasa‘iyáh 49: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
