Yasa‘iyáh 50
50
1 Ḳhudáwand yúṉ farmátá hai, ki Terí máṉ ká taláqnáma jise likhkar maiṉ ne use chhoṛ diyá, kaháṉ hai? yá apne qarzḳhwáhoṉ meṉ se kis ke háth maiṉ ne tum ko bechá? Dekho, tum apní sharáratoṉ ke sabab se bik gaye, aur tumhárí ḳhatáoṉ ke bá‘is tumhárí máṉ ko taláq dí gayí. 2Pas kis liye, jab maiṉ áyá to koí ádmí na thá? aur jab maiṉ ne pukárá, to koí jawáb denewálá na húá? kyá merá háth aisá kotáh ho gayá hai, ki chhuṛá nahíṉ saktá? aur kyá mujh meṉ naját dene kí qudrat nahíṉ? Dekho, maiṉ apní ek dhamkí se samundar ko sukhá detá húṉ, aur nahroṉ ko sahrá kar ḍáltá húṉ: un meṉ kí machhliyáṉ pání ke na hone se badbú ho játí haiṉ, aur piyás se mar játí haiṉ. 3Maiṉ ásmán ko siyáhposh kartá húṉ, aur us ko ṭáṭ uṛhátá húṉ.
4Ḳhudáwand Ḳhudá ne mujh ko shágird kí zabán baḳhshí, táki maiṉ jánúṉ ki kalám ke wasíle se kis tarah thake mánde kí madad karúṉ: wuh mujhe har subh jagátá hai; aur merá kán lagátá hai, táki shágirdoṉ kí tarah sunúṉ. 5Ḳhudáwand Ḳhudá ne mere kán khol diye, aur maiṉ bág̣í o bargashta na húá. 6Maiṉ ne apní píṭh píṭnewáloṉ ke, aur apní dáṛhí nochnewáloṉ ke hawále kí; maiṉ ne apná muṉh ruswáí aur thúk se nahíṉ chhipáyá. 7Par Ḳhudáwand Ḳhudá merí himáyat karegá, aur is liye maiṉ sharminda na húṉgá; aur isí liye maiṉ ne apná muṉh saṉg i ḳhárá kí mánind banáyá, aur mujhe yaqín hai, ki maiṉ sharmsár na húṉgá. 8Mujhe rástbáz ṭhahránewálá nazdík hai; kaun mujh se jhagṛá karegá? áo, ham ámne sámne khaṛe hoṉ; merá muḳhálif kaun hai? wuh mere pás áe. 9Dekho, Ḳhudáwand Ḳhudá merí himáyat karegá; kaun mujhe mujrim ṭhahráegá? dekh, wuh sab kapṛe kí mánind puráne ho jáeṉge; un ko kíṛe khá jáeṉge.
10Tumháre darmiyán kaun hai, jo Ḳhudáwand se ḍartá aur us ke ḳhádim kí báteṉ suntá hai? jo andhere meṉ chaltá, aur raushní nahíṉ pátá, wuh Ḳhudáwand ke nám par tawakkul kare, aur apne Ḳhudá par bharosá rakkhe. 11Dekho, tum sab jo ág sulgáte ho, aur apne áp ko angároṉ se gher lete ho, apní hí ág ke shu‘loṉ meṉ, aur apne sulgáe húe angároṉ meṉ chalo. Tum mere háth se yihí páoge; tum ‘azáb meṉ leṭ rahoge.
Currently Selected:
Yasa‘iyáh 50: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
