Yasa‘iyáh 48
48
1Yih bát suno, ai Ya‘qúb ke gharáne, jo Isráíl ke nám se kahláte ho, aur Yahúdáh ke chashme se nikle ho; jo Ḳhudáwand ká nám lekar qasam kháte ho, aur Isráíl ke Ḳhudá ká iqrár karte ho, par amánat aur sadáqat se nahíṉ. 2Kyúṉki wuh shahr i quds ke log kahláte haiṉ, aur Isráíl ke Ḳhudá par tawakkul karte haiṉ, jis ká nám Rabb u’l afwáj hai. 3Maiṉ ne qadím se honewálí bátoṉ kí ḳhabar dí hai; háṉ, wuh mere muṉh se niklíṉ, maiṉ ne un ko záhir kiyá: maiṉ nágahán un ko ‘amal meṉ láyá, aur wuh wuqú‘ meṉ áíṉ. 4Chúṉki maiṉ jántá thá, ki tú ziddí hai, aur terí gardan ká paṭṭhá lohe ká hai, aur terí peshání pítal kí hai; 5is liye maiṉ ne qadím hí se yih báteṉ tujhe kah sunáíṉ; aur un ke wáqi‘ hone se peshtar tujh par záhir kar diyá: tá na ho ki tú kahe, Mere but ne yih kám kiyá, aur mere khode húe sanam ne aur merí ḍhálí húí múrat ne yih báteṉ farmáíṉ. 6Tú ne yih suná hai; so is sab par tawajjuh kar: kyá tum is ká iqrár na karoge? ab maiṉ tujhe nayí chízeṉ aur poshída báteṉ jin se tú wáqif na thá dikhátá húṉ. 7Wuh abhí ḳhalq kí gayí haiṉ, qadím se nahíṉ; balki áj se pahle tú ne un ko suná bhí na thá; tá na ho, ki tú kahe, Dekh, maiṉ jántá thá. 8Háṉ, tú ne na suná, na jáná; háṉ, qadím hí se tere kán khule na the: kyúṉki maiṉ jántá thá, ki tú bi’lkull bewafá hai, aur rihm hí se ḳhatákár kahlátá hai. 9Maiṉ apne nám kí ḳhátir apne g̣azab meṉ táḳhír karúṉgá, aur apne jalál kí ḳhátir tujh se báz rahúṉgá, ki tujhe káṭ na ḍálúṉ. 10Dekh, maiṉ ne tujhe sáf kiyá, lekin chándí kí mánind nahíṉ: maiṉ ne musíbat kí kuṭhálí meṉ tujhe sáf kiyá. 11Maiṉ ne apní ḳhátir, háṉ, apní hí ḳhátir yih kiyá hai; kyúṉki mere nám kí takfír kyúṉ ho? maiṉ to apní shaukat dúsre ko nahíṉ dene ká.
12Ai Ya‘qúb, merí sun, aur ai Isráíl, jo merá buláyá húá hai: maiṉ wuhí húṉ; maiṉ hí awwal, aur maiṉ hí áḳhir húṉ. 13Yaqínan mere hí háth ne zamín kí bunyád ḍálí, aur mere dahine háth ne ásmán ko phailáyá: maiṉ un ko pukártá húṉ, aur wuh házir ho játe haiṉ. 14Tum sab jama‘ hokar suno: un meṉ se kis ne in bátoṉ kí ḳhabar dí hai? Wuh jise Ḳhudáwand ne pasand kiyá hai: us kí ḳhushí ko Bábul ke muta‘alliq ‘amal meṉ láegá, aur us ká háth Kasdíoṉ kí muḳhálafat meṉ hogá. 15Maiṉ ne, háṉ, maiṉ hí ne kahá; maiṉ hí ne use buláyá: maiṉ use láyá húṉ, aur wuh apní rawish meṉ baromand hogá. 16Mere nazdík áo, aur yih suno; maiṉ ne shurú‘ hí se poshídagí meṉ kalám nahíṉ kiyá; jis waqt se ki wuh thá, maiṉ wahíṉ thá: aur ab Ḳhudáwand Ḳhudá ne aur us kí rúh ne mujh ko bhejá hai. 17Ḳhudáwand terá fidya denewálá, Isráíl ká Quddús, yúṉ farmátá hai, ki Maiṉ hí Ḳhudáwand terá Ḳhudá húṉ, jo tujhe mufíd ta‘lím detá húṉ, aur tujhe us ráh meṉ jis meṉ tujhe jáná hai, le chaltá húṉ. 18Kásh ki tú mere ahkám ká shanawá hotá, aur terí salámatí nahr kí mánind aur terí sadáqat samundar kí maujoṉ kí mánind hotí: 19terí nasl ret kí mánind hotí aur tere sulbí farzand us ke zarroṉ kí mánind bakasrat hote: aur us ká nám mere huzúr se káṭá aur miṭáyá na játá.
20Tum Bábul se niklo, Kasdíoṉ ke darmiyán se bhágo; nag̣ma kí áwáz se bayán karo, ise mashhúr karo, háṉ, is kí ḳhabar zamín ke kanároṉ tak pahuṉcháo: kahte jáo, ki Ḳhudáwand ne apne ḳhádim Ya‘qúb ká fidya diyá. 21Aur jab wuh un ko biyábán meṉ se le gayá, to wuh piyáse na húe: us ne un ke liye chaṭán meṉ se pání nikálá: us ne chaṭán ko chírá, aur pání phuṭ niklá. 22Ḳhudáwand farmátá hai, ki Sharíroṉ ke liye salámatí nahíṉ.
Currently Selected:
Yasa‘iyáh 48: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
