Yasa‘iyáh 41
41
1Ai jazíro, mere huzúr ḳhámosh raho; aur ummateṉ az sar i nau zor hásil kareṉ: wuh nazdík ákar ‘arz kareṉ; áo, ham milkar ‘adálat ke liye nazdík hoṉ. 2Kis ne mashriq se us ko barpá kiyá, jis ko wuh sadáqat se apne qadamoṉ meṉ bulátá hai? wuh qaumoṉ ko us ke hawále kartá, aur use bádsháhoṉ par musallit kartá hai; aur un ko ḳhák kí mánind us kí talwár ke, aur uṛtí húí bhúsí kí mánind us kí kamán ke hawále kartá hai. 3Wuh un ká píchhá kartá, aur us ráh se jis par peshtar qadam na rakkhá thá salámat guzartá hai. 4Yih kis ne kiyá aur ibtidáí pushtoṉ ko talab karke anjám diyá? maiṉ Ḳhudáwand ne, jo awwal o áḳhir húṉ; wuh maiṉ hí húṉ. 5Jazíroṉ ne dekhá, aur ḍar gaye: zamín ke kanáre tharrá gaye: wuh nazdík áte gaye. 6Un meṉ se har ek ne apne paṛausí kí madad kí; aur apne bháí se kahá, Hausala rakh. 7Baṛhaí ne sunár kí aur us ne jo hathauṛí se sáf kartá hai, us kí jo niháí par píṭtá hai himmat baṛháí, aur kahá, Joṛ to achchhá hai: so unhoṉ ne us ko meḳhoṉ se mazbút kiyá táki qáim rahe.
8Par tú, ai Isráíl, mere bande, ai Ya‘qúb jis ko maiṉ ne pasand kiyá, jo mere dost Abrahám kí nasl se hai; 9tú jis ko maiṉ ne zamín kí intihá se buláyá, aur us ke siwánoṉ se talab kiyá, aur tujh ko kahá, ki Tú merá banda hai; maiṉ ne tujh ko pasand kiyá, aur tujhe radd na kiyá; 10tú mat ḍar, kyúṉki maiṉ tere sáth húṉ: hirásán na ho, kyúṉki maiṉ terá Ḳhudá húṉ: maiṉ tujhe zor baḳhshúṉgá: yaqínan maiṉ terí madad karúṉgá: aur maiṉ apní sadáqat ke dahine háth se tujhe sambhálúṉgá. 11Dekh, wuh sab jo tujh par g̣azabnák haiṉ pashemán aur ruswá hoṉge: wuh jo tujh se jhagaṛte haiṉ náchíz ho jáeṉge, aur halák hoṉge. 12Tú apne muḳhálifoṉ ko ḍhúṉḍhegá, aur na páegá: tujh se laṛnewále náchíz o nábúd ho jáeṉge. 13Kyúṉki maiṉ Ḳhudáwand, terá Ḳhudá, terá dahiná háth pakaṛkar kahúṉgá, Mat ḍar; maiṉ terí madad karúṉgá. 14Hirásán na ho, ai kíṛe Ya‘qúb, ai Isráíl kí qalíl jamá‘at; maiṉ terí madad karúṉgá, Ḳhudáwand farmátá hai; háṉ, maiṉ jo Isráíl ká Quddús terá fidya denewálá húṉ. 15Dekh, maiṉ tujhe gaháí ká nayá aur tez dandánadár ála banáúṉgá: tú paháṛoṉ ko kúṭegá, aur un ko reza reza karegá, aur ṭíloṉ ko bhúse kí mánind banáegá. 16Tú un ko usáegá, aur hawá un ko uṛá le jáegí, aur girdbád un ko tittar bittar karegá: par tú Ḳhudáwand se shádmán hogá, aur Isráíl ke Quddús par faḳhr karegá. 17Muhtáj aur miskín pání ḍhúṉḍhte phirte haiṉ, par miltá nahíṉ, un kí zabán piyás se ḳhushk hai; maiṉ Ḳhudáwand un kí sunúṉgá; maiṉ Isráíl ká Ḳhudá un ko tark na karúṉgá. 18Maiṉ naṉge ṭíloṉ par nahreṉ aur wádíoṉ meṉ chashme kholúṉgá: sahrá ko táláb aur ḳhushk zamín ko pání ká chashma baná dúṉgá. 19Biyábán meṉ deodár, aur babúl, aur ás, aur zaitún ke daraḳht lagáúṉgá; sahrá meṉ chíṛ, aur saro o sanaubar ikaṭṭhe lagáúṉgá: 20táki wuh sab dekheṉ, aur jáneṉ, aur g̣aur kareṉ, aur samjheṉ, ki Ḳhudáwand hí ke háth ne yih banáyá, aur Isráíl ke Quddús ne yih paidá kiyá.
21 Ḳhudáwand farmátá hai, Apná da‘wá pesh karo: Ya‘qúb ká bádsháh farmátá hai; apní mazbút dalíleṉ láo. 22Wuh un ko házir kareṉ, táki wuh ham ko honewálí chízoṉ kí ḳhabar deṉ: ham se aglí báteṉ bayán karo, ki kyá thíṉ, táki ham un par socheṉ, aur un ke anjám ko samjheṉ; yá áyanda ko honewálí bátoṉ se ham ko ágáh karo. 23Batáo ki áge ko kyá hogá, táki ham jáneṉ ki tum iláh ho: háṉ, bhalá yá burá kuchh to karo, táki ham muta‘ajjib hoṉ, aur báham use dekheṉ. 24Dekho, tum hech aur bekár ho: tum ko pasand karnewálá makrúh hai.
25Maiṉ ne shimál se ek ko barpá kiyá hai, wuh á pahuṉchá: wuh áftáb ke matla‘ se hokar merá nám legá: aur sháhzádoṉ ko gáre kí tarah latáṛegá, jaise kumhár miṭṭí gúṉdhtá hai. 26Kis ne yih ibtidá se bayán kiyá, ki ham jáneṉ? aur kis ne áge se ḳhabar dí, ki ham kaheṉ, ki Sach hai? koí us ká bayán karnewálá nahíṉ, koí us kí ḳhabar denewálá nahíṉ, koí nahíṉ jo tumhárí báteṉ sune. 27Maiṉ hí ne pahle Siyyún se kahá, ki Dekh, un ko dekh: aur maiṉ hí Yarúshalem ko ek bashárat denewálá baḳhshúṉgá. 28Kyúṉki maiṉ dekhtá húṉ ki koí nahíṉ; un meṉ se koí mushír nahíṉ, jis se púchhúṉ, aur wuh mujhe jawáb de. 29Dekho, wuh sab ke sab batálat haiṉ, un ke kam hech haiṉ: un kí ḍhálí húí múrateṉ bi’lkull náchíz haiṉ.
Currently Selected:
Yasa‘iyáh 41: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
