Popular Bible Verses from Yasa‘iyáh 41

Share

tú mat ḍar, kyúṉki maiṉ tere sáth húṉ: hirásán na ho, kyúṉki maiṉ terá Ḳhudá húṉ: maiṉ tujhe zor baḳhshúṉgá: yaqínan maiṉ terí madad karúṉgá: aur maiṉ apní sadáqat ke dahine háth se tujhe sambhálúṉgá.

Kyúṉki maiṉ ḲHUDáWAND, terá Ḳhudá, terá dahiná háth pakaṛkar kahúṉgá, Mat ḍar; maiṉ terí madad karúṉgá.

Dekh, wuh sab jo tujh par g̣azabnák haiṉ pashemán aur ruswá hoṉge: wuh jo tujh se jhagaṛte haiṉ náchíz ho jáeṉge, aur halák hoṉge.

tú jis ko maiṉ ne zamín kí intihá se buláyá, aur us ke siwánoṉ se talab kiyá, aur tujh ko kahá, ki Tú merá banda hai; maiṉ ne tujh ko pasand kiyá, aur tujhe radd na kiyá

Tú apne muḳhálifoṉ ko ḍhúṉḍhegá, aur na páegá: tujh se laṛnewále náchíz o nábúd ho jáeṉge.

Hirásán na ho, ai kíṛe Ya‘qúb, ai Isráíl kí qalíl jamá‘at; maiṉ terí madad karúṉgá, ḲHUDáWAND farmátá hai; háṉ, maiṉ jo Isráíl ká Quddús terá fidya denewálá húṉ.

Par tú, ai Isráíl, mere bande, ai Ya‘qúb jis ko maiṉ ne pasand kiyá, jo mere dost Abrahám kí nasl se hai

Maiṉ naṉge ṭíloṉ par nahreṉ aur wádíoṉ meṉ chashme kholúṉgá: sahrá ko táláb aur ḳhushk zamín ko pání ká chashma baná dúṉgá.

Muhtáj aur miskín pání ḍhúṉḍhte phirte haiṉ, par miltá nahíṉ, un kí zabán piyás se ḳhushk hai; maiṉ ḲHUDáWAND un kí sunúṉgá; maiṉ Isráíl ká Ḳhudá un ko tark na karúṉgá.

Yih kis ne kiyá aur ibtidáí pushtoṉ ko talab karke anjám diyá? maiṉ ḲHUDáWAND ne, jo awwal o áḳhir húṉ; wuh maiṉ hí húṉ.

Biyábán meṉ deodár, aur babúl, aur ás, aur zaitún ke daraḳht lagáúṉgá; sahrá meṉ chíṛ, aur saro o sanaubar ikaṭṭhe lagáúṉgá: táki wuh sab dekheṉ, aur jáneṉ, aur g̣aur kareṉ, aur samjheṉ, ki ḲHUDáWAND hí ke háth ne yih banáyá, aur Isráíl ke Quddús ne yih paidá kiyá.