Yasa‘iyáh 40
40
1Tasallí do, tum mere logoṉ ko tasallí do, tumhárá Ḳhudá farmátá hai. 2Yarúshalem ko dilásá do, aur use pukárkar kaho, ki us kí musíbat ke din jo jang o jadal ke the guzar gaye, us ke gunáh ká kaffára húá; aur us ne Ḳhudáwand ke háth se apne sab gunáhoṉ ká badla do chand páyá.
3Pukárnewále kí áwáz; Biyábán meṉ Ḳhudáwand kí ráh durust karo, sahrá meṉ hamáre Ḳhudá ke liye sháhráh hamwár karo. 4Har ek nasheb úṉchá kiyá jáe, aur har ek paháṛ aur ṭílá past kiyá jáe: aur har ek ṭeṛhí chíz sídhí, aur har ek náhamwár jagah hamwár kí jáe: 5aur Ḳhudáwand ká jalál áshkárá hogá, aur tamám bashar us ko dekhegá: kyúṉki Ḳhudáwand ne apne muṉh se farmáyá hai. 6Ek áwáz áí, ki Manádí kar. Aur maiṉ ne kahá, Maiṉ kyá manádí karúṉ? Har bashar ghás kí mánind hai, aur us kí sárí raunaq maidán ke phúl kí mánind: 7ghás murjhátí hai, phúl kumlátá hai; kyúṉki Ḳhudáwand kí hawá us par chaltí hai: yaqínan log ghás haiṉ. 8Háṉ, ghás murjhátí hai, phúl kumlátá hai: par hamáre Ḳhudá ká kalám abad tak qáim hai.
9Ai Siyyún ko ḳhushḳhabarí sunánewálí, úṉche paháṛ par chaṛh já; aur ai Yarúshalem ko bashárat denewálí, zor se apní áwáz baland kar; ḳhúb pukár, aur mat ḍar; Yahúdáh kí bastiyoṉ se kah, Dekho, apná Ḳhudá! 10Dekho, Ḳhudáwand Ḳhudá baṛí qudrat ke sáth áegá, aur us ká bázú us ke liye saltanat karegá: dekho, us ká sila us ke sáth hai, aur us ká ajr us ke sámne. 11Wuh chaupán kí mánind apná galla charáegá, wuh barroṉ ko apne bázúoṉ meṉ jama‘ karegá, aur apní bag̣al meṉ lekar chalegá, aur un ko jo dúdh pilátí haiṉ, áhista áhista le jáegá.
12Kis ne samundar ko chullú se nápá, aur ásmán kí paimáish bálisht se kí, aur zamín kí gard ko paimáne meṉ bhará, aur paháṛoṉ ko palṛoṉ meṉ wazn kiyá, aur ṭíloṉ ko tarázú meṉ tolá? 13Kis ne Ḳhudáwand kí rúh kí hidáyat kí, yá us ká mushír hokar use sikháyá? 14Us ne kis se mashwarat lí hai, jo use ta‘lím de, aur use ‘adálat kí ráh sujháe, aur use ma‘rifat kí bát batáe, aur use hikmat kí ráh se ágáh kare? 15Dekh, qaumeṉ ḍol kí ek búṉd kí mánind haiṉ, aur tarázú kí bárík gard kí mánind giní játí haiṉ: dekh, wuh jazíroṉ ko ek zarra kí mánind uṭhá letá hai. 16Lubnán índhan ke liye káfí nahíṉ, aur us ke jánwar soḳhtaní qurbání ke liye bas nahíṉ. 17Sab qaumeṉ us kí nazar meṉ hech haiṉ; balki wuh us ke nazdík batálat aur náchíz se bhí kamtar giní játí haiṉ. 18Pas tum Ḳhudá ko kis se tashbíh doge? aur kaun sí chíz us se mushábih ṭhahráoge? 19Taráshí húí múrat, kárígar ne use ḍhálá, aur sunár us par soná maṛhtá hai, aur us ke liye chándí kí zanjíreṉ banátá hai. 20Aur jo aisá tihídast hai ki us ke pás nazar guzránne ko kuchh nahíṉ, wuh aisí lakṛí chun letá hai jo saṛnewálí na ho: wuh hoshyár kárígar kí talásh kartá hai, táki aisí múrat banáe, jo qáim rah sake. 21Kyá tum nahíṉ jánte? kyá tum ne nahíṉ suná? kyá yih bát ibtidá hí se tum ko batáí nahíṉ gayí? kyá tum biná e ‘álam se nahíṉ samjhe? 22Wuh muhít i zamín par baiṭhá hai, aur us ke báshinde ṭiḍḍoṉ kí mánind haiṉ: wuh ásmán ko parde kí mánind tántá hai, aur us ko sukúnat ke liye ḳhaime kí mánind phailátá hai: 23jo sháhzádoṉ ko náchíz kar ḍáltá; aur dunyá ke hákimoṉ ho hech ṭhahrátá hai. 24Wuh hanoz lagáe na gaye; wuh hanoz boe na gaye: un ká tana hanoz zamín meṉ jaṛ na pakaṛ chuká, ki wuh faqat un par phúṉk mártá hai, aur wuh ḳhushk ho játe haiṉ, aur girdbád un ko bhúse kí mánind uṛá le játá hai. 25Wuh Quddús farmátá hai, Tum mujhe kis se tashbíh doge? aur maiṉ kis chíz se mushábih húṉgá? 26Apní áṉkheṉ úpar uṭháo, aur dekho, ki in sab ká ḳhaliq kaun hai; wuhí jo in ke lashkar ko shumár karke nikáltá hai; aur un sab ko nám ba nám bulátá hai: us kí qudrat kí ‘azmat, aur us ke bázú kí tawánáí ke sabab se ek bhí g̣airházir nahíṉ rahtá.
27Pas, ai Ya‘qúb, tú kyúṉ yúṉ kahtá hai, aur ai Isráíl, tú kis liye aisí bát kartá hai, ki Merí ráh Ḳhudáwand se poshída hai, aur merí ‘adálat mere Ḳhudá se guzar gayí? 28Kyá tú nahíṉ jántá? kyá tú ne nahíṉ suná, ki Ḳhudáwand Ḳhudá e abadí o tamám zamín ká ḳháliq thaktá nahíṉ aur mánda nahíṉ hotá: us kí hikmat idrák se báhar hai. 29Wuh thake húe ko zor baḳhshtá hai: aur nátawán kí tawánáí ko ziyáda kartá hai. 30Naujawán bhí thak jáeṉge aur mánda hoṉge, aur súrmá bi’lkull gir paṛeṉge: 31lekin Ḳhudáwand ká intizár karnewále az sar i nau zor hásil kareṉge: wuh ‘uqáboṉ kí mánind bál o par se uṛeṉge: wuh dauṛeṉge aur na thakeṉge; wuh chaleṉge aur mánda na hoṉge.
Currently Selected:
Yasa‘iyáh 40: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
