Yasa‘iyáh 42
42
1Dekho merá ḳhádim, jis ko maiṉ sambháltá húṉ; merá barguzída, jis se merá dil ḳhush hai: maiṉ ne apní rúh us par ḍálí; wuh qaumoṉ meṉ ‘adálat járí karegá. 2Wuh na chilláegá, aur na shor karegá, aur na bázároṉ meṉ us kí áwáz sunáí degí. 3Wuh masle húe sarkanḍe ko na toṛegá, aur ṭamṭamátí battí ko na bujháegá: wuh rástí se ‘adálat karegá. 4Wuh mánda na hogá, aur himmat na háregá, jab tak ki ‘adálat ko zamín par qáim na kare; jazíre us kí sharí‘at ká intizár kareṉge. 5Jis ne ásmán ko paidá kiyá, aur tán diyá; jis ne zamín ko aur un ko jo us meṉ se nikalte haiṉ phailáyá; jo us ke báshindoṉ ko sáṉs aur us par chalnewáloṉ ko rúh ‘ináyat kartá hai, ya‘ní Ḳhudáwand Ḳhudá yúṉ farmátá hai: 6Maiṉ Ḳhudáwand ne tujhe sadáqat se buláyá, maiṉ hí terá háth pakṛúṉgá, aur terí hifázat karúṉgá, aur logoṉ ke ‘ahd aur qaumoṉ ke núr ke liye tujhe dúṉgá; 7ki tú andhoṉ kí áṉkheṉ khole, aur asíroṉ ko qaid se nikále, aur un ko jo andhere meṉ baiṭhe haiṉ qaidḳháne se chhuṛáe. 8Yahowáh maiṉ húṉ; yihí merá nám hai: maiṉ apná jalál kisí dúsre ke liye, aur apní hamd khodí húí múratoṉ ke liye rawá na rakkhúṉgá. 9Dekho, purání báteṉ púrí ho gayíṉ, aur maiṉ nayí báteṉ batátá húṉ: is se peshtar ki wáqi‘ hoṉ maiṉ tum se bayán kartá húṉ.
10Ai samundar par guzarnewálo, aur us meṉ basnewálo, ai jazíro aur un ke báshindo, Ḳhudáwand ke liye nayá gít gáo, zamín par sar tá sar usí kí sitáish karo. 11Biyábán aur us kí bastiyáṉ, Qídár ke ábád gáṉw apní áwáz baland kareṉ; Sila‘ ke basnewále gít gáeṉ, paháṛoṉ kí choṭiyoṉ par se lalkáreṉ. 12Wuh Ḳhudáwand ká jalál záhir kareṉ, aur jazíroṉ meṉ us kí sanáḳhwání kareṉ. 13Ḳhudáwand bahádur kí mánind niklegá; wuh jangí mard kí mánind apní g̣airat dikháegá: wuh na‘ra máregá, háṉ, wuh lalkáregá; wuh apne dushmanoṉ par g̣álib áegá. 14Maiṉ bahut muddat se chup rahá: maiṉ ḳhámosh ho rahá, aur zabt kartá rahá: par ab maiṉ dard i zihwálí kí tarah chilláúṉgá; maiṉ háṉpúṉgá, aur zor zor se sáṉs lúṉgá. 15Maiṉ paháṛoṉ aur ṭíloṉ ko wírán kar ḍálúṉgá, aur un ke sabzazároṉ ko ḳhushk karúṉgá; aur un kí nadiyoṉ ko jazíre banáúṉgá, aur táláboṉ ko sukhá dúṉgá. 16Aur andhoṉ ko us ráh se jise wuh nahíṉ jánte le jáúṉgá; maiṉ un ko un rástoṉ par jin se wuh ágáh nahíṉ le chalúṉgá: maiṉ un ke áge táríkí ko raushní, aur úṉchí níchí jagahoṉ ko hamwár kar dúṉgá. Maiṉ un se yih sulúk karúṉgá, aur un ko tark na karúṉgá. 17Jo khodí húí múratoṉ par bharosá karte, aur ḍhále húe butoṉ se kahte haiṉ, Tum hamáre ma‘búd ho, wuh píchhe haṭeṉge, aur bahut sharminda hoṉge.
18Ai bahro, suno; ai andho, nazar karo, táki tum dekho. 19Mere ḳhádim ke siwá andhá kaun hai? aur kaun aisá bahrá hai jaisá merá rasúl jise maiṉ bhejtá húṉ? mere dost kí aur Ḳhudáwand ke ḳhádim kí mánind nábíná kaun hai? 20Tú bahut sí chízoṉ par nazar kartá hai, par dekhtá nahíṉ; kán to khule haiṉ, par suntá nahíṉ. 21Ḳhudáwand ko pasand áyá, ki apní sadáqat kí ḳhátir sharí‘at ko buzurgí de, aur use qábil i ta‘zím banáe. 22Lekin yih wuh log haiṉ jo luṭ gaye, aur g̣árat húe: wuh sab ke sab zindánoṉ meṉ giriftár, aur qaidḳhánoṉ meṉ poshída haiṉ: wuh shikár húe, aur koí nahíṉ chhuṛátá; wuh luṭ gaye, aur koí nahíṉ kahtá, Pher do. 23Tum meṉ kaun hai, jo is par kán lagáe? jo áyanda kí bábat tawajjuh se sune? 24Kis ne Ya‘qúb ko hawála kiyá ki g̣árat ho, aur Isráíl ko ki luṭeroṉ ke háth meṉ paṛe? kyá Ḳhudáwand ne nahíṉ, jis ke ḳhiláf ham ne gunáh kiyá? kyúṉki unhoṉ ne na cháhá ki us kí ráhoṉ par chaleṉ, aur wuh us kí sharí‘at ke tábi‘ na húe. 25Is liye us ne apne qahr kí shiddat aur jang kí saḳhtí ko us par ḍálá; aur use har taraf se ág lag gayí, par wuh use daryáft nahíṉ kartá; wuh us se jal játá hai, par ḳhátir meṉ nahíṉ látá.
Currently Selected:
Yasa‘iyáh 42: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
