Yasa‘iyáh 35
35
1Biyábán aur wírána shádmán hoṉge, aur dasht ḳhushí karegá, aur nargis kí mánind shigufta hogá. 2Us meṉ kasrat se kaliyáṉ nikleṉgí: wuh shádmání se gákar ḳhushí karegá; Lubnán kí shaukat aur Karmil aur Shárún kí zínat use dí jáegí: wuh Ḳhudáwand ká jalál aur hamáre Ḳhudá kí hashmat dekheṉge.
3Kamzor háthoṉ ko zor aur nátawán ghuṭnoṉ ko tawánáí do. 4Un ko jo kachdile haiṉ kaho, Himmat báṉdho, mat ḍaro; dekho, tumhárá Ḳhudá sazá aur jazá liye átá hai; háṉ, Ḳhudá hí áegá, aur tum ko bacháegá. 5Us waqt andhoṉ kí áṉkheṉ wá kí jáeṉgí, aur bahroṉ ke kán khole jáeṉge. 6Tab laṉgṛe hiran kí mánind chaukaṛiyáṉ bhareṉge, aur gúṉge kí zabán gáegí; kyúṉki biyábán meṉ pání, aur dasht meṉ nadiyáṉ phúṭ nikleṉgí. 7Balki saráb táláb ho jáegá, aur piyásí zamín chashma ban jáegí: gídaṛoṉ kí máṉdoṉ meṉ jaháṉ wuh paṛe the, nai aur nal ká ṭhikáná hogá. 8Aur waháṉ ek sháhráh aur guzargáh hogí, jo muqaddas ráh kahláegí; jis se koí nápák guzar na karegá, lekin yih musáfiroṉ ke liye hogí, ahmaq bhí us meṉ gumráh na hoṉge. 9Waháṉ sher i babar na hogá, aur na koí daranda us par chaṛhegá, na waháṉ páyá jáegá; lekin jin ká fidya diyá gayá, waháṉ sair kareṉge. 10Aur jin ko Ḳhudáwand ne maḳhlasí baḳhshí, lauṭeṉge, aur Siyyún meṉ gáte húe áeṉge, aur abadí surúr un ke siroṉ par hogá: wuh ḳhushí aur shádmání hásil kareṉge, aur g̣am o andoh káfúr ho jáeṉge.
Currently Selected:
Yasa‘iyáh 35: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
