Yasa‘iyáh 36
36
1Aur Hizqiyáh bádsháh kí saltanat ke chaudahweṉ baras yúṉ húá, ki sháh i Asúr Sanherib ne Yahúdáh ke sab fasíldár shahroṉ par chaṛháí kí, aur un ko le liyá. 2Aur sháh i Asúr ne Rab Sháqí ko ek baṛe lashkar ke sáth Lakís se Hizqiyáh ke pás Yarúshalem ko bhejá, aur us ne úpar ke táláb kí nálí par dhobiyoṉ ke maidán kí ráh meṉ maqám kiyá. 3Tab Iliyáqím bin Ḳhilqiyáh jo ghar ká díwán thá, aur Shabnáh munshí aur muharrir Yúáḳh bin Ásaf nikalkar us ke pás áe. 4Aur Rab Sháqí ne un se kahá, Tum Hizqiyáh se kaho, ki Malik i mu‘azzam, sháh i Asúr, yúṉ farmátá hai, ki Tú kyá i‘timád kiye baiṭhá hai? 5Kyá mashwarat aur jang kí quwwat muṉh kí báteṉ hí haiṉ? áḳhir kis ke birte par tú ne mujh se sarkashí kí hai? 6Dekh, tujhe us masle húe sarkanḍe ke ‘asá ya‘ní Misr par bharosá hai; us par agar koí ṭek lagáe, to wuh us ke háth meṉ gaṛ jáegá aur use chhed degá: sháh i Misr Fir‘aun un sab ke liye jo us par bharosá karte haiṉ, aisá hí hai. 7Par agar tú mujh se yúṉ kahe, ki Hamárá tawakkul Ḳhudáwand hamáre Ḳhudá par hai, to kyá wuh wuhí nahíṉ hai, jis ke úṉche maqámoṉ aur mazbahoṉ ko ḍhákar Hizqiyáh ne Yahúdáh aur Yarúshalem se kahá hai, ki Tum is mazbah ke áge sijda kiyá karo? 8Is liye ab zará mere áqá sháh i Asúr ke sáth shart báṉdh, aur maiṉ tujhe do hazár ghoṛe dúṉgá; básharte ki tú apní taraf se un par sawár chaṛhá sake. 9Bhalá, phir tú kyúṉkar mere áqá ke kamtarín mulázimoṉ meṉ se ek sardár ká bhí muṉh pher saktá hai? aur tú rathoṉ aur sawároṉ ke liye Misr par bharosá kartá hai? 10Aur kyá ab maiṉ ne Ḳhudáwand ke bekahe hí is maqám ko g̣árat karne ke liye is par chaṛháí kí hai? Ḳhudáwand hí ne to mujh se kahá, ki Is mulk par chaṛháí kar, aur ise g̣árat kar de. 11Tab Iliyáqím aur Shabnáh aur Yúáḳh ne Rab Sháqí se ‘arz kí, ki Apne ḳhádimoṉ se Arámí zabán meṉ bát kar, kyúṉki ham use samajhte haiṉ, aur díwár par ke logoṉ ke sunte húe Yahúdíoṉ kí zabán meṉ ham se bát na kar. 12Lekin Rab Sháqí ne kahá, Kyá mere áqá ne mujhe yih báteṉ kahne ko tere áqá ke pás yá tere pás bhejá hai? kyá us ne mujhe un logoṉ ke pás nahíṉ bhejá, jo tumháre sáth apní hí najásat kháne aur apná hí qárúra píne ko díwár par baiṭhe haiṉ? 13Phir Rabsháqí khaṛá ho gayá, aur Yahúdíoṉ kí zabán meṉ baland áwáz se yúṉ kahne lagá, ki Malik mu‘azzam, sháh i Asúr, ká kalám suno. 14Bádsháh yúṉ farmátá hai, ki Hizqiyáh tum ko fareb na de, kyúṉki wuh tum ko chhuṛá nahíṉ sakegá. 15Aur na wuh yih kahkar tum se Ḳhudáwand par bharosá karáe, ki Ḳhudáwand zarúr ham ko chhuṛáegá, aur yih shahr sháh i Asúr ke hawále na kiyá jáegá. 16Hizqiyáh kí na suno; kyúṉki sháh i Asúr yúṉ farmátá hai, ki Tum mujh se sulh kar lo, aur nikalkar mere pás áo, aur tum meṉ se har ek apní ták aur apne anjír ke daraḳht ká mewa khátá, aur apne hauz ká pání pítá rahe, 17jab tak ki maiṉ ákar tum ko aise mulk meṉ na le jaúṉ, jo tumháre mulk kí mánind g̣alla aur mai ká mulk, roṭí aur tákistánoṉ ká mulk hai. 18Ḳhabardár, aisá na ho, ki Hizqiyáh tum ko yih kahkar targ̣íb de, ki Ḳhudáwand ham ko chhuṛáegá. Kyá qaumoṉ ke ma‘búdoṉ meṉ se kisí ne bhí apne mulk ko sháh i Asúr ke háth se chhuṛáyá hai? 19Hamát aur Arfád ke deotá kaháṉ haiṉ? Sifrwáim ke deotá kaháṉ haiṉ? kyá unhoṉ ne Sámariya ko mere háth se bachá liyá? 20In mulkoṉ ke tamám deotáoṉ meṉ se kis kis ne apná mulk mere háth se chhuṛá liyá, jo Ḳhudáwand bhí Yarúshalem ko mere háth se chhuṛá legá? 21Lekin wuh ḳhámosh rahe, aur us ke jawáb meṉ unhoṉ ne ek bát bhí na kahí; kyúṉki bádsháh ká hukm yih thá, ki Use jawáb na dená. 22Aur Iliyáqím bin Ḳhilqiyáh jo ghar ká díwán thá, aur Shabnáh munshí aur Yúáḳh bin Ásaf muharrir apne kapṛe chák kiye húe Hizqiyáh ke pás áe, aur Rab Sháqí kí báteṉ use sunáíṉ.
Currently Selected:
Yasa‘iyáh 36: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
