Popular Bible Verses from Yasa‘iyáh 35

Share

Aur jin ko ḲHUDáWAND ne maḳhlasí baḳhshí, lauṭeṉge, aur Siyyún meṉ gáte húe áeṉge, aur abadí surúr un ke siroṉ par hogá: wuh ḳhushí aur shádmání hásil kareṉge, aur g̣am o andoh káfúr ho jáeṉge.

Kamzor háthoṉ ko zor aur nátawán ghuṭnoṉ ko tawánáí do. Un ko jo kachdile haiṉ kaho, Himmat báṉdho, mat ḍaro; dekho, tumhárá Ḳhudá sazá aur jazá liye átá hai; háṉ, Ḳhudá hí áegá, aur tum ko bacháegá.

Aur waháṉ ek sháhráh aur guzargáh hogí, jo muqaddas ráh kahláegí; jis se koí nápák guzar na karegá, lekin yih musáfiroṉ ke liye hogí, ahmaq bhí us meṉ gumráh na hoṉge.

Us waqt andhoṉ kí áṉkheṉ wá kí jáeṉgí, aur bahroṉ ke kán khole jáeṉge.

Tab laṉgṛe hiran kí mánind chaukaṛiyáṉ bhareṉge, aur gúṉge kí zabán gáegí; kyúṉki biyábán meṉ pání, aur dasht meṉ nadiyáṉ phúṭ nikleṉgí.